هیڤییا من
شیان مەهدی کانیسارکی
هیڤییا من و هەڤژینا من ئەو بوو، کۆ ئێکەم زارۆکێ خودێ ب ڕزقێ مە بکەت کوڕ بیت، ڕاستە من گوهـلێ بوویە دبێژن خودێ پتر حەزژ کچان دکەت لێ دلێ مە پتر ل سەر کوڕانبوو. پاشی پشتی چەندین سەرەدانێن نۆژداران و لاڤەیان یا دلێ مە ڤیایی خودێ پێشکێشی مە کر، کوڕەکێ وەکی دەیکا خوە ئەسمەر و وەکی باپیرێ خوە چاڤبەلەک. چونکی ئەو چەندین سالبوون خێزان و بنەمالا مە د نەخوەشی و دەردەسەریاندا دەربازدبوو و ژبەر ئەوا ڕژێما ژناڤچوویی ئینایە سەرێ مە ژ رەڤ و ئاوارەبوونێ چ شەڤ ب دلخوەشی و سلامەتی د سەر مە دا دەربازنەدبوون. لێ ژ نیشکەکێ ڤە ب هاتنا ڤی کوڕی بۆ ناڤ خێزانێ، ئەو ئێش و کەسەرە هەمی ژ بیرا مە چوون. ئەز وەکی بابەک هەر ژ ڕۆژێن دەستپێکێ من دڤییا ئەز و کوڕێ خوە وەکی دو هەڤالێن نێزیک بین، پێ من و وی هەردەم پێکڤەبوو. چ جاران بێی من نەدقەداند ! من تێدئینادەر دڤییا خوە ب هێز دیاربکەت وەکی من، لێ دناخێ خوە دا یێ پێدڤی من بوو. ئەز بابێ وی بووم و باش تێدگەهەشتم، لەوڕا چ جاران من ب تنێ نەدهێلا. (چاڤێن خوە، ڤەکرن ڤە): خوەزی من زانیبا نوکە کوڕێ من د وێ دونیا بەرتەنگ و نەخوەشدا چ دکەت. ئەڤە سەرێ سالەکێ یە من های ژ حالێ وی نینە و ژ نیشکەکێ ڤە ژ ئێک دویرکەفتین. ب تنێ تشتێ من کەیفخوەش دکەت دویماهی ماچ من ل ڕوو یێ وی یێ نیڤ کەیف دابوو، هەر ئەو بوو دویماهیا هەمیان من هەمبێز کری. هێژ ددان و گڕنژینا وی یا ل بەر چاڤێن من، خاترا خوە ژی من ژێ خواست، لێ ئەز نزانم وی های ژ من هەبوو یان نە، ژبەر کەیفخوەشیا دەیک و بابێن من و تلیلیێن خویشکێن من. نوکە هیڤیا من یا ئێکانە، دیدارا کوڕێ منە.
