كۆلانێن تەنگ
مێهڤان چێی
سپێدەیەكا زوی بوو، خوناڤێ هێشتا رویێ ئەردی بەرنەدابوو و چپكێن وێ یێن هویر ل بەر تیرۆژكێن لاواز یێن سحارێ د برسقین، باژێرێ دهۆكێ د رۆژێن دەستپێكا بوهارێ دا بوو، وی حەز ژ دەستپێكا ڤی وەرزی نەدكر، ژبەر كو سپێدا ئەو ل سەر شوستەیان د قەرسی و نیڤرۆ گەرمەك دژوار دبوو، دەستێ وی ل سەر گۆپالێ وی بوو، ل بن چاكێتێ شۆڕ یێ گران ب دلەكێ خۆش و ب جەستەیەكێ لاوازڤە بەرەف جهێ جاران پێنگاڤ دهاڤێتن.
دەمێ گەهشتی، وەكی هەر رۆژ هەڤپیشەیێن وی یێن جاران ل دۆر ئاگرەكێ ب كارتۆنانڤە كۆم ببوون و خۆ گەرم دكرن، ئەو چەند پێنگاڤەكا ل دویری وان راوەستیا، گۆپالێ خو دانا و روینشتە خارێ، ئەو یێ ب شەوق بوو وی سۆز دابوو نەڤیا خو یا ئێكانە كو ئەڤرۆ دەمێ د زڤریتە مال دێ پیتزایەكێ بو وێ كڕیت ژبەر نمرێن بلند یێن وێ ل پۆلا چارێ بنەرەت ب دەست خۆڤە ئینای، گەلەك هەول ددا پێشبینیێن نەخۆش ژ هزرا خۆ دویر كەت و حەز نەدكر وەكی گەلەك جاران بێی كار و دەست ڤالا ب زڤریتە مال و یێ نەچار بوو ئەڤرۆ ب بڕەك پاران ڤە بزڤریت، ژبەر كو ئەڤرۆ یا جودا بوو ژ جاران و وی نەدڤیا نەڤیا خو یا ئێتیم خەمگین ببینیت.
هێدی هێدی قەرەبالغا ترومبێلان زێدە دبوو و جادە تژی كربوون، هەروەسا هژمارا كرێكاران ژی ب شێوەیەكێ بەرچاڤ بلند ببوو، جار جار ترومبێل ل بەرامبەر وان رادوەستیان هندەك ژ وان هەلدگرتن و دچوون، هەر ترومبێلەكا رادوەستیا وی هەول ددا خۆ نێزیك بكەت، بەلێ ڤێرێ بازارێ هێزا جەستەی بوو، وان خودان زەند و باسك دهەلبژارتن و بێی كو پویتەی ب وی بكەن بلەز دچوون..
پشتی چەند هەولەكێن بێی ئەنجام ئێدی گیانێ وی هیڤی ژناڤ خۆ دكرنە دەر و كوریشكێن ل سەر دێمێ وی كویرتر لێ دهاتن، دەمێ هزرا بۆری دكر وی تەمەنەك د كرێكاریێ دا بوراندبوو، جار برسی و جار تێر، د سەر هندێ را یێ سوپاسدار بوو، بەلێ ئەڤرۆ وی هەست ب كێماسیێ دكر، دەمێ هزر دكر دێ دەستڤالا زڤریتە مال و یا ئەو ئازار ددا بتنێ ئەو بوو كو ئەو سۆزا دایە نەڤیا خۆ بجه نەئینیت. رۆژ بلند ببوو، سەرمایا سحارێ شكەستبوو و گەرما نیڤرۆ جادە ژ پەیادەیان ڤالا كربوون، هژمارەكا كێم یا هەڤپیشەیێن وی ب بێزاری هێشتا ل هیڤیا دەلیڤەیەكێ بوون، بەلێ پشتی ڤێ دەمژمێرێ ئێدی یا ب زەحمەت بوو كار ب دەست وان بكەڤیت، لەورا دەم بۆ دەمی ئەو بەربەلاڤ دبوون، چەند یا گران بیت ئێدی بریارا ڤەگەڕیانێ یا ب نەچاری بوو، وی گۆپالێ خو هەلگرت، هێدی هێدی ب رێكەفت، مێشكێ وی ئالۆز ببوو، ل رێكەكێ دگەڕیا وی ژ ڤێ شكەستنێ رزگار بكەت، د هزرا وی دا گەلەك رێك هەبوون بەلێ هەمی د وێ كۆلانا تەنگ، دوێ دوكانا كڕین و فرۆتنا بكارهاتییان را دەرباز دبوون.
پشتی چەند خۆلەكەكان پێ یێن وی ئەو گەهاندبوون نیڤەكا وێ كۆلانا هزرا وی مژویل كری یا كو بەری نوكە چەند جارەكان نەچاربووی تێدا ڤەگەریتە مال.
د دەرگەهێ حەوشا خانییەكێ كەڤن دا زارۆكەكا تەمەن نەه – دەه سالی یا خودان پرچەكا زەر، ب دێمەكێ لاواز و ب جلكێن قوتابخانێ ڤە چاڤێ وێ ل بنێ كۆلانێ یا روینشتی بوو، دەمێ باپیرێ وێ دیاربووی وكارتۆنەكا تەنك دناڤ دەستێن وی دا دیتی وێ كرە غار و بلەز بەرەف وی ڤە چوو، كارتۆنا تەنك ژ وی وەرگرت، دەستێ وی ماچی كر و ب هەمان لەزاتی بەرەف ژۆرا خۆ یا بچویك ڤە چوو، دەمێ وی كەیفا مەزن یا نەڤیا وی كەفتیە تێدا دیتی گڕنژینەكا جوان دێمێ وی هەمبێز كر و د شانازییەكا مەزن دا بوو، ئەو گەهشتە د دەرگەهێ حەوشێ دا، پیرەژنا وی ئەوا ل بەندا وی دەملدەست تێبینییا جوداهیەكێ كر وگۆتێ: «جامێرۆ، كانێ چاكیتێ تە؟» وی بەرسڤ نەدا، دەستێ خو برە د بەرویكا شەلوالێ خۆ دا، دو – سێ هزارەكێن زەر ئینان دەرێ، بەرەف خانما خۆ ڤە درێژكرن و ب بێدەنگی ژ وێ بۆری بەرەف ژۆرڤە چوو.
