ئاخینك
قەهرەمان عەبدوللا حەمید بەرواری
من دڤێتن
تو ل كەنارێ شادییێ ب راوەستی
تو ل جەڤەنگێن قەشەنگ ب گەڕهی
مۆركێن زێری و
دنكێن خیزی
د گەل رۆندكێن خۆشیێ ژ چاڤێن تە
ریبارەكی دروست بكەن و
دەریا یا سۆرا خوینا برینێن من
وەكو دارێ (موسا)ی شەق بكەت
من دڤێتن
ژ نیڤا هناڤا بكەمە گری
لێ گری ناهێت ژ بەر كررێنا دلی
بەختێ وەختەكێ باركری
هەناسا من هێلا ئاسێ
ل دەشتەكا پان و حلی
سینگێ منێ بهێن هەلمای
وەكو دۆژەهێ هلهلی
من دڤێتن
چاڤان ڤەكەم
لێ شەڤێ تەڤ دا و ب پێبەزێ
عەبایەكێ تاری د سەرێ خۆ پێچا و
د گەل رەنگێ خۆ كەتە ڕكێ
ستێران هەمیا
وەكو تیڤارێزكا مێریا
دا دویڤ ئێك و
وەكو پیلەكا ژ فیستانێ ئەسمانێ
عشقێ ڤەبوون
ئاخینكا من
د حەفكا من ڕا ما و
نە ئەز شیام بكەم هەوار
نە ژی ب داعویرم و ببەمە خوار
بەلێ كزگریۆكێ گەوریا من گرت و
كۆڤانەكا مەزن د دلێ من دا ما
