ئەو پەرداخا ژیانا من شلکری
جیریە غازی
ل شەڤەک ژ شەڤێن هاڤینێ پشتێ پێنوسێ خۆ دناڤبەرا هەردو لاپەڕاندا هێلای، قەستا جهێ خۆ یێ نڤستنێ کر و وەک پڕانییا شەڤان هزرێن وی ل دۆر ژیانێ زڤڕین، ڤێ شەڤێ وی قەستا بیرهاتنێن خۆ کر، ئەو وێنە د مێشکێ خۆدا دوبارەکر دەمێ دگەل بابێ خۆ چوویە پەرتووکخانەیەکێ، ژنەک دگەل زارۆیەکی ل پشت وی بوون و دەنگێ زارۆکی دهات و دگۆتە دایکا خۆ:» دادێ بۆ من ڤێ پەرتووکێ بکڕە، من دڤێت ئەز پەرتووکان بخوینم». دگەل هندێ دا کو وی دزانی ئەو پەرتووکێن زارۆکانە د دەستێ ویدا، لێ دایکا وی ئاخفتنا وی ب چڤە وەرنەگرت، لەورا گۆتێ:» ئەو نە پەرتووکێن زارۆکانە و ب کێری تە ناهێن». داکو پتر باوەرییێ بۆ زارۆکێ خۆ دروست بکەت، ب مەرەما هندێ کو گەل پەرتووکفرۆشی د ئاخفیت، ب دەنگەک سست و خاڤ دگۆت: « مانە چ پەرتووکێن زارۆکان نینن؟ ب تنێ یێن مەزنان هەنە؟».
ئاها، ل وی دەمی، وی ئەو پەرتووکێن بابێ وی بۆ وی کڕین ل بەر سینگێ خۆڤە گڤاشتن و ترسیا بابێ وی ژی وان پەرتووکان ژ دەستان بهینیتە دەر و هەمان ئاخفتن بێژیت، ئەوا وێ ژنێ گۆتییە زارۆکێ خۆ، لێ ئەو کەسەکێ ب بەخت بوو، کا چاوا بابێ وی دڤییا ئەو پەرتووکان بخوینیت، وەسا دڤیا کوڕێ خۆ ژی فێری خواندنا پەرتووکان بکەت.
هەناسەیەکا کویر هەلکێشا، داکو ژ خەما وی زارۆکی دەربکەڤیت، سەرێ خۆ بادا بۆ ڕەخێ دیتر، داکو هزرێن خۆ کونتڕۆل بکەت و ب ڕاوەستینیت، لێ نەشییا، ڤێ جارێ گەلەک دویر نەچوو، هزرا وی کەفتە سەر هەڤالێ وی نیازی، دەمێ بەری دو – سێ ڕۆژە گۆتییە وی:»
هەردەم دەمێ ئەز خوشکا خۆ یا مەزن دبینم، کو زارۆکێ خۆ ل بەر سینگی خۆ گڤاشتییە، بیرا من ل وێ رۆژێ دهێت دەمێ هێشتا ئەز زارۆک من و خوشکا خۆ یا بچووکتر یاری دکرن، ئەز چوومە سەر مێزەیێ دا پەرداخەک ئاڤێ ڤەخۆم، لێ پەرداخ ژ دەستێ من کەڤت و هویربوو، د جهدە دەنگێ خوشکا من یا مەزن دگەل دەنگێ پرتێن پەرداخێ تێکەلبوون و بلەز بەرەڤ مەڤە هات و گۆت: «ئەو کێ ئەڤ پەرداخ شکاندییە؟.» ژبەرکو خوشکا من یا بچووک هێشتا زمانێ وێ نەگەڕابوو، ژ ترساندا من ب دەنگەک لەرزڤە گۆت:» ڤێ شکاند». پاشی من هند دیت دەنگەکێ جیاوازتر هات و کرە شەپێن ل ناڤ چاڤێن خوشکا من یا بچوک و بێ گونەهدا، ئەز ژ گونەها خۆدا ساربووم وقیژیا من ب سەر یا وێدا کەفت. هەتا نهۆ ژی ئەو رۆژ ل پێش چاڤێن من ناچیت، چنکو هێشتا من دانپێدان ب گونەها خۆ نەکرییە و داخوازا لێبۆرینێ ژێ نەکرییە».
بێهنا وی تەنگتربوو و بۆ خۆ گۆت: ئەرێ ما هند لێبۆرین کارەک زەحمەتە؟! هیڤییا من ئەوە، نیازی شیرەتا من وەرگرتبیت و بشێت داخوازا لێبۆرینێ ژ خوشکا خۆ بکەت، دا هەر چنەبیت دەمێ دمریت دا د گۆڕێ خۆدا یێ ئارام بیت.
ل ڤێرێ پیچەک مێشکێ وی سافی و بێ دەنگبوو، هەست ب ئارامییەکێ کر، دەمێ زانی شەڤێن وی ب هەروە نەچوونە و شیایە ببیتە کەسەک ناڤدار ب نڤیسینێن خۆ ئەوێن ل دەمێ شەڤێدا دنڤیسیت، لێ ژ‌نشکانڤە پێلەکا دی یا خەمگینییێ بەرەڤ ویڤە هات، دەمێ هەڤالێ وی ساهی هاتییە هزرا وی، ئەوێ ژبەر ئێش و ژانێن خۆ ل نیڤا شەڤێدا خۆ سێدارەدای. هەناسەیەکا دیتر ژ هەموو هناڤان هەلکێشا و هێدی بەردا و گۆتە خۆ: مخابن هەڤالێ من هەر شەڤ بالیفکا خۆ ژ رۆندکان پڕدکر، لێ من بەرپەر ژ پەیڤان پڕدکرن، نەهێلا ئەم هەردو پێکڤە وەک ناڤێ خۆ بمینین نەمر.
دوبارە ڕابوو و بەرەڤ پێنوس و لاپەڕین خۆ چووڤە و ئەوا ڕویدای هەمی ئێخستە سەر ئەوان بەرپەڕان.
