رەفتارێن ئیراقێ و چارەسەریا مووچەی
غیاس خـالد زێباری
2 ــــ 2
لێ هەتا ئەو دەم دهێت پێدڤی یە حوكمەتا هەرێما كوردستانێ و دەستهەلاتێن دیتر ژی ل هەرێمێ خەلكێ كوردستانێ د ڤێ رەوشا دژوارا ئابوورییدا نەهێلیت، هەوڵ و گاڤێن خوە یێن بەردەوام بۆ چارەسەركرنا قەرانان ب تایبەت یا دارایی بكەتە كریار، ئەگەر دەولەت و حوكمەتا ئیراقێ یا بەردەوام بوو ل سەر نەهنارتنا مووچێ خەلكێ كوردستانێ و دادگەها فیدراڵا بریارا راگرتنێ ب قانوونی دانا، ئەو گاڤێن هاتینە هاڤێتن ل سەر ئاستێ سازیا نەتەوەیێن ئێكگرتی و رێكخراوێن نیڤدەولەتی یێن مافێ مرۆڤ و وەڵاتێن دوست و هەڤپەیمان جهێ دلخۆشیێ نە، لێ تەكەز دكەینەڤە نابیت حوكمەتا هەرێمێ دڤی بوارەی دا خوە ل هیڤیا دەمی بگرین، چونكی رەوشا پشكەكا زۆرا مووچەخۆرێن كوردستانێ د ئاستەكێ لاواز دایە و ب بەردەوامیا ڤێ رەوشێ دێ كاریگەریێن خراپ لسەر دەروونێ خەلكی كەت و دۆرنینە ئاریشێن جڤاكێ پەیدا ببن، ژلایەكێ دیتر هژمارەكا كەسایەتی و ئالیێن سیاسی یێن كوردستانێ زێدەتر ل دەستهەلاتدارێن ئیراقێ و گرۆپێن میلیشیایی د پیلاناندانە و چەكێن خوە یێن راگەهاندنێ و سۆشیال میدیایێ دۆر ل بەرژەوەندێن گشتی و هەستا نشتیمانی و نەتەوایەتی یێن ژەهركری ئاراستە حوكمەتا هەرێمێ دكەن و ل دەلڤەكێ دگەڕێن بۆ تێكدانا ئارامی و سەقامگیریا كوردستانێ و ژ دەست دانا ڤان دەسكەفتا ژ پێخەمەت هندەك بەرژەوەندیێن بەرتەسكێن ماددی و سەلام و مەرحەبایەكا نەیارێن كوردستانێ . راستە دەولەتا ئیراقێ ب هەستەكا نە ئیراقیانە سەرەدەریێ ل گەل هەرێما كوردستانێ دكەت و زۆر ئارستەنگ درۆستكرینە، لێ هەرێما كوردستانێ ژی د وێ لاوازیێ دا نیە رادەست ببیت، ژبووی چارەسەركرنا پرسا مووچەی ئەگەر حوكمەتا هەرێمێ د ڤان كاودانان دا ژبلی پرۆژەیێن زۆر فەر هەمی پرۆژێن خزمەتگۆزاری راوەستینیت و مووچێن بلند بكەتە ئێك مەلیۆن و نیڤ ئەز باوەرم ب داهاتێ ناڤخوە مووچە دێ هێنە دابینكرن، چونكی ئەو پلەدارێن هەتا نهۆ خوەدی مووچێن بلند رەوشا ژیانا وان گەهشتیە وی ئاستی كو پێدڤی ب مووچەی نەبیت و پڕانیا وان خوەدی كار و كارگەهن، ئەركەكێ وان یێ سرۆشتی یە ژی دڤێ رەوشێ دا پشتەڤانیا حوكمەتا هەرێمێ بكەن، داكو ڤێ رەوشێ دەرباز بكەن و هەست و سۆزا خەلكێ كوردستانێ ژی ب هەرێمێ و حوكمەتا وێ دێ مۆكۆمتر بیت. گاڤەكا ب ڤی رەنگی بۆ حوكمەتێ ژی دەرفەتە ل ساڵێن داهاتی چاكسازیێ و پێداچوونەڤێ د ئاستێ مووچەخۆرێن كوردستانێ بكەت و وێ دووراتیا زۆرا د ناڤبەرا مووچەیێن ئاسایی و یێن پلە بلند كێمتر بكەت كو هەتا نهۆ چهێ گازندا خەلكینە.
