لێزانینا كوردستانێ د ناڤبەرا ئسرائیلێ و ئیرانێ دا
غیاس خـالد زێباری
پاراستیبوونا هەرێما كوردستانێ د ناڤبەرێ شەرێ گرانێ یازدە رۆژییێ ئسرائیل و ئیرانێ ئەوێ ل رۆژا ١٣/٦/٢٠٢٥ بەرپابووی، روودانەكا نە ژ خافلی نەبوو، بەلكی ژ ئەنجامێ دۆربینی و لێزانینا سیاسەتەكا نشتیمانی و ئێمناهی یا پارتی دیموكراتی كوردستان بوو ب سەرۆكایەتیا سەرۆك مەسعود بارزانی، كو هەردو سەرۆكایەتیێن هەرێمێ و حوكمەتێ د دەستی دانە، ل دەمێ گەفێن شەری هەتا ئاگربەستا دناڤبەرا هەردو ئالیا هەرێما كوردستانێ سیاسەتەكا هەڤسەنگ و بێ لایەن گرتەبەر . ئەڤە ژی بەڵگە و پشتراستبوونە كو هەرێما كوردستانێ ب سیاسەتا پارتی خوەدی پیلان و ستراتیژیەتكا خوە یا تایبەتە و ناكەڤیتە بن باندۆڕا چ لایەنا، ژلایەكێ دیتر كوردستان هەردەم فاكتەرێ ئێمناهی و سەقامگیریا دەڤەرێ یە و چ جارا نەبوویە ئەگەرێ پەیدابوون و درۆستبوونا نە ئارامیێ و نە سەقامگیریێ بۆ ئیراقێ و وەڵاتێن دەڤەرێ ب تایبەت ئیرانێ، بەرۆڤاژی وێ چەندێ ئەوا نەیارێن نهۆ یێن قەوارێ هەرێما كوردستانێ و دوژمێن وێ یێن دێرین ئەوێن هەردەم پارتی ب لایەنگیریا ئسرائیلێ و هندەك جاران ب ئسرائیلا دویێ ددەنە نیاسین، داكۆ خوە وەكی لایەنەكێ نشتیمانی و نەتەوەیی دیار بكەن و خەلكەكێ ساویلكە و خوەش باوەر ب ڤان پڕ و پاكندا ب سەردا ببەن و جهێ خوە ل دەسهەڵاتێ مۆكۆمتر بكەن و ل دەڤ نەتەوە پەست شرین ببن . ب ڤێ سیاسەتا هەڤسەنگ و بێ لایەنیا پارتی و هەرێما كوردستانێ و حوكمەتا وێ ب سەرۆكایەتیا نێچیرڤان بارزانی و مەسرۆر بارزانێ، كوردستانێ ل مەترسیكا مەزن و دژواردا هاتە پاراستن، چونكی دناڤبەرا ئاگرێ هەردو وەڵاتاندایە و هندەك كەسایەتی و ئالیێن سیاسی ل سەر ئاستێ ئیراقێ و هەرێما كوردستانێ چ درێغی نەكرن بۆ ئینانا ئاگرێ وی شەری بۆ سەر هەرێما كوردستانێ، ئەڤ ل راگەهاندن و سۆشیال میدیایا وان دیاربوو دەمێ ل دەسپێكا شەری هەتا داویێ بەردەوام پەیامێن ترساندنا خەلكی بەڵاڤ دكرن و هەرێم ب لایەنگیریا ئسرائیلێ نیشا ئیرانێ ددا، هەر وەسا ئەڤ هەڵویستێ پارتی و هەرێما كوردستانێ، بەڵگەهەكێ پشتراستكریە كۆ ئەو زانیاریێن چەندین جارا ئیرانێ هەرێما كوردستانێ پێ مۆشەكباران دكر، چ ڕاستی بۆ نەبوویە و ژبووی ژێك دوركرنا هەرێم و ئیرانێ بوویە . پێدڤی یە ئیران پشتی ڤی هەڵویستەی پەیوەندیێن بەرژەوەند پارێزێن دو ئالیێ لگەل هەرێما كوردستانێ و پارتی مۆكۆمتر بكەت و بێ بەڵگەهـ و زانیاریێن دۆرست ئێك و دو تاوانبار نەكەن، چونكێ هەرێما كوردستانێ و ئیرانێ زۆر بەرژەوەندێن هەڤپشك هەنە، چ لسەر ئاستێ سیاسی و ئابووی، یان یێن جڤاكی و كلتووری، دشێن ب وی رەنگی ببنە دو جیرانێن باش كۆ خزمەتا ئێمناهی و سەقامگیری و بازرگانی و پێشڤەچوونێن هەردو ئالیا بهێتە كرن، خەلكێ كوردستانێ ژی پێدڤی هەڵویستەكێ نشتیمانی بەرامبەر وان ئالیێن تێكدەر یێن كوردستانێ هەبیت ئەوێن بووینە دار و دەستەكێن چەند گرۆپێن شۆفینیێن شیعی یێن ئیراقێ ئەوێن بەردەوام هەوڵ ددەن قەوارێ هەرێما ژ ناڤ ببەن و داوی پیلانا وان بڕینا مووچێ مووچەخۆرێن كوردستانێ یە، پارتی و سەرۆكاتیا هەرێمێ و حوكمەتا وێ جارەكا دی سەلماند كو هێزا پاراستن و پێشڤەچوونا قەوارەیێ هەرێما كوردستانێ و ماف و داخوازێن خەلكێ وێنە.
