پێدڤیە ژیریا دەستكرد د پرۆگرامێن زانكۆ و پەیمانگەهان دا بهێتە زێدەكرن
هەرهین محەمەد:
رێڤەبەرێ پەیمانگەهەكا تایبەت ددەتە دیاركرن، ل سەرانسەری هەرێما كوردستانێ 14 پەیمانگەهێن تایبەت هەنە و ل سەر دامەزراوەكێ ڤە نە و ئەڤ دامەزراوە ژی دەلیڤا كاری بۆ قوتابیێن خوە دبینن و گۆت: دنوكەدا ژێریا دەستكرد یا هاتیە د مەیدانێ دا و گرنگە ل پرۆگرامێن زانكۆ و پەیمانگەهان بهێتە زێدەكرن و ئەڤە دێ بیتە دەلیڤە قوتابی پتر كاری بدەست خوە ڤە بینت.
سەردار عومەر، رێڤەبەرێ پەیمانگەها زاخۆ یا تایبەت ل ئیدارەیا سەربەخۆیا زاخۆ گۆت: پەیمانگەها مە ل سالا 2019 هاتیە دامەزراندن و ژ چوار پشكان پێكهاتیە (كومپیوتەر، پەترول و گاز، كارگێری، ژمێریاری) و پتریا قوتابێن مە خەلكێ زاخۆ نە و گەلەك كێم ژ سێمێلێ دهێن و سەرجەمێ هەموو قوتابیان دبنە 582 قوتابی و ل دووڤ ئامارێن مە ئەو قوتابیێن دهێن لنك مە دخوینن نێزیكی 33% تێكرایێ وان ژ50- 59 یە ئانكو یێ كێمە، یان ژمێژە ژ خۆاندنێ دووركەفتین و جارەكا دی بزڤرنە خواندنێ و دیسان باوەرنامەكێ ژی بخوە وەربگرن و نێزیكی 50% قوتابێن دهێنە پەیمانگەهێ دخوینن ژ تەمەنی ژ من مەزنترن.
گۆتیشی: هەموو كەس دزانن ل سەرانسەری هەرێما كوردستانێ هەتا بۆ زانكۆ پەیمانگەهێن حكومی نینە، بەلێ ئەڤە ئەوێ چەندێ ناگەهینت دەمێ قوتابی ژ زانكۆیەكێ، یان پەیمانگەهەكێ دەرچیت چ یا حكومی، یان تایبەت بیت، بەلێ ئەڤ چەندە وێ یەكێ ناگەهینت دەمێ قوتابی دەردچیت دەلیڤەیا كاری بۆ نینە و ئەو تشتە ژی ل سەر شیانێن قوتابی دمینن، مە گەرەكا دەرچوونێ ژی هەیە و 97 قوتابی دەرچووینە و 53 قوتابی مە ل پشكا كومپیوتەری هەبوون و 40 قوتابی بۆ خوە كارەكی دكەن و 30 قوتابی ل پشكا كارگێری 22 بۆ خوە كارەكی دكەن و دیسان 13 قوتابی ل پشكا ژمێریاری هەشت قوتابی بخوە كارەكی دكەن و دبیت 60% قوتابی دامەزراندی بن ل جهەكی و ئەوان باوەرنامە نەبیت و ب رێیا ئەڤێ باوەرنامێ پوستەكێ باشتر یێ وەرگرتی ل سازیا خۆ.
خویاژی كر، مە گەلەك قوتابێن دی ژی هەنە و پشتی ژ پەیمانگەهێ دەردچن ئەم دووڤچوونا وان دكەین و مە سیستەمەك هەیە و هەموو پێزانینێن قوتابیان تێدانە و ئەم ل سەر دامەزراوا شەهیدن و مەزنترین دامەزراوا پەروەردە و خواندنا بلندە و ل سەرانسەری هەرێما كوردستانێ دامەزراوا شەهید 14 پەیمانگەهێن تایبەت هەنە و ئەڤ دامەزراوە ژی دەلیڤا كاری بۆ قوتابیێن خوە دبینت.
رێڤەبەرێ پەیمانگەها زاخۆ یا تایبەت زێدەتر گۆت: ئەو هەر چوار پشكێن مە هەین د ئەڤی سەردەمی دا گەلەك دگرنگن، ب تایبەتی نوكە سەردەمێ تەكنەلوژیایێ و كومپیوتەر و ئەنترنێتێ یە و پشتی هاتنا ژێریا دەستكرد تەكنەلوژیا یا چوویە جیهانەكا دی و ئەم ب گۆهورینێن وێ را ناگەهین، هەر جهەكێ بچیێ ئێكەمین پرسیار ئەوە دێ بێژن تو كومپوتەری دزانی. ل پەیمانگەهێ ئەم قوتابی فێردكەین دەمێ دەردچیت سیستەم و ویب سایتان چێكەت و سالانە ئەم فێستیڤالێن تەكنەلوژیایێ ڤە دكەین و ئەڤە بۆ دەمێ سێ سالە بەردەوام ڤەدكەین و مەرەم ژ ئەوان فێستیڤالان ژی ئەوە قوتابی خوە نەهێلیتە ب هیڤیا دامەزراندنێ ڤە و بۆ خوە كارەكی بكەت و ل كومپانیان كاربكەن و د دەمێ سێ سالێن بوریدا 120 پرۆژەیێن قوتابیان هاتینە چێكرن ب هاریكاریا مامۆستایێن وان و 240 قوتابی تێدا پشكداربووینە.
ئەو چەندە گۆتژی: ئەم وەكو پەیمانگەهێن ب سەر پەروەردێ ڤە مە ئاریشەكا مەزن هەیە ئەو ژی ژلایێ پرۆگرامی ڤەیە و ئەڤ پرۆگرامێ قوتابی دخوینن ژلایێ وەزارەتێ ڤە هاتیە دان و گەلەك جاران ئەم دانوستاندنێ ل سەر دكەین و ئەو پرۆگرامە ل گەل نوكەدا ناگونجیت، بۆ نمونە ل پشكا كومپیوتەری هندەك بابەت هەنە دكەڤنن و تەكنەلوژیا سال بۆ سالێ یا پێشكەفتنی بخوە ڤە دبینت و دنوكەدا ژێریا دەستكرد یا هاتیە د مەیدانێ دا و گرنگە ل پرۆگرامێن زانكۆ و پەیمانگەهان بهێتە زێدەكرن و ئەڤە دێ بیتە دەلیڤە قوتابی پتر كاری بدەست خوە ڤە بینت.
