ژبیرکرن

رەحیما بەرواری

وەختێ «هۆشەنگ» ژمالێ دەرکەفتی بلەز قەستا ترومبێلا خوە کر، لێ هندی ل سویچێن ترومبێلا خوە گەڕیا نەدیتن و نە چاربوو ب بزڤریتە ڤە مالێ. هەرچەندە دەمێ وی گەلەک نەمابووو پێدڤی بوو زوی بچیتە سەر کارێ خوە . لێ گەهشتە بەر دەرگەهی و تبلا خوە دانا سەر زەنگێ و گەلەک بلەز زەنگ لێدا، هەڤژینا وی دەرگەهێ مالێ بۆ ڤەکر و ئیکسەر سویچ کرنە ددەستی دا، ب کەنیڤە گۆت:
من زانی دی هەر زڤریە ڤە. هۆشەنگی ژی ب کەنی ڤە بەرسڤ دا گۆت: خاتین، باوەربکە ئەگەر من تو نەبای من چ نەدبوو. ئەڤە ئەز دێ چم تە چ نەڤێت وەختێ دزڤرم بۆ تە دگەل خوە بینم؟ هەڤژینا وی گۆت:
بەلێ، هەر وەکی هەر جار نانی ژبیر نەکەی. هۆشەنگ: نە.. نە، خاتین، دێ چاوا ژبیرکەم؛ مانێ ئەڤە وانا هەڕویە ئەگەر تشتەکێ دی پێدڤی بووی پەیوەندیێ ب من بکە. هەڤژینا وی ژی گۆت: دێ باشە، هەرە تە خەم پێ نەبیت، ئەز بخۆ دێ پەیوەندیێ ب تە کەم. هۆشەنگی خاترا خوە ژێ خوازت و بەرەڤ ترومبێلا خوەڤە چوو. دەمێ گەهشتی جادەیا گشتی گەلەک قەرەبالغ بوو، هۆشەنگ: ئوهووو، ئەڤە چیە؟؟ نێ ئەو ب خوە یال من بوویە درەنگی. بێهنا وی تەنگ بوو، جاران هەول ددان رێکەکێ ببینیت ژبەر وەختێ وی بسەرڤە چوو، لێ ژبەر قەرەبالغێ ترومبێل ببونە سێ رێزی، نەچار بوو خوە ل هیڤیێ ب گریت. پیچ – پیچە رێک ڤەبوو لێ پشتی نیڤ دەمژمێر ب سەر ژڤانێ وی ڤە ڤەچووی.
ب هەر حالێ هەبیت گەهەشتە بەر دەرێ قوتابخانەیێ ژبەرکو مامۆستایێ وانا کوردیێ بوو و ل قوتابخانەیێ دەوام دکر .»هۆشەنگ» گەلەکێ تووڕە بوو و د بن لێڤێن خوە ڤە د ئاخڤیت و جاران یێ دبژیت: ئەگەر من خەمساری نەکربا و من دژۆرڤە بەری دەرکەڤم من پشکنینا بەرویکێن خوە کربا دا زانم من سویچ یێن هێلاینە ل سەر مێزا خوارنێ، نە نە والله خەمسارییا هەڤژینا من بوو؛ بلا گۆتبا من کا تە چ ژبیر نەکریە دا ئەز ژی دەست دەمە بەرویکێن خوە و زانم کا من چ تشت ژبیر کریە.. بەردەوام یێ گازندا ژخوە دکەت و رەخنەیێ ل خوە دگریت . هەتا گەهشتی د ژۆرڤە، دیت هەمی هەڤالێن وی ب خەمن، وی ژی گۆت:
هەوە خێر چ چێبوویە؟ یان هوین ژی وەکی من بێزاربوونە و ئێشا ژبیرکرنێ هوین گرتینە.؟ ئێکی ژوان گۆت:
نەخێر، کەرەمکە هەرە رێڤەبەریێ، رێڤەبەر یێ ل هیڤیا تە. هۆشەنگ: بلا ئەز دێ چم و ئەز دزانم نیڤ دەمژمێرێ ئەز یێ گیرۆبوویم . هۆشەنگی دەرگەهێ رێڤەبەری قوتا و چوو ژۆرڤە.
رێڤەبەری گۆتێ: کەرەمکە.
هۆشنەگ: سپێدە باش مامۆستا.
رێڤەبەر: سپێدە باشتر .
لێ ژبەری رێڤەبەر چ پەیڤان بێژیت هۆشەنگی داخوازا لێبۆرینێ کر و گۆت:
باوەربکە مامۆستا نە ب دەستێ من بو ئەز گیروبوم و من گەلەک پێ نەخوشبوو، بەلێ ژبەر قەرەبالغا تورومبێلا ئەز ژ نەچاری گیروبوویمە.
رێڤەبەر: کوڕێ من، ئاریشە نە ئەوە یا تو هزر ژێ دکەی، ئەگەر بیرا تە بهیت دوهی دەوام ب دوماهی هاتی تە دەرگەه نە گرت بوو و دزیکەرا پرسیارێن ویزاری یێ پولا ١٢ یێن برین و ئەم نەشێن تاقیکرنا ئەڤرۆ ب قوتابیان بکەین، و مە چارە نینن ژبلی ئالیێن پەیوەندیدار پێ ئاگاداربکەین.
هەر وێ گاڤێ ترس کەتە دلێ مامۆستا هۆشەنگی ود دلێ خودا گۆت: ئەڤە تاوانەکا مەزنە و تنێ ئەز ژێ بەرپرسیارم .ژبەرکو دوهی ئەز بلەز دەرکەفتم و من ژبیرکر دەرگەهی بگرم . پشتی رێڤەبەری پەیوەندی ب جهێن شولەژێ کری ب چەند خولەکەکان پۆلیس ل وێرێ ئامادەبوون و هۆشەنگ برە بنگەهی و دانوستاندن دگەل ویدا هاتە کرن..
لێ چ تشتێن باش د بەرژەوەندیا وی دا نەبوون . مامۆستا هۆشەنگ هاتە دەستەسەرکرن بو ماوەکێ نە دیارکری، و بەردەوام دویڤچوونا وی بابەتی ژ ئالیێ هیزێن پەیوەندیار و ڤەکۆلەران ڤە دهاتە کرن .»هۆشەنک» دزیندانێ ڤە گەلەک بێزار دبیت لەورا هاتە سەردابرن ژ ئالیێ کۆمەکا هەڤالێن تاوانبار ڤە پشتی رێکەفتین کو ژ زیندانێ ب رەڤن بۆ خوە پلانەک دانا و دەمژمێر( 12)ێ شەڤ، ژبەر کو وی دەمی زێرەڤان د هێنە گوهارتن؛ بەلکی مفای ژ وی وەختی وەربگرن . لێ ژبەری دەست ب رەڤینێ بکەن پلان هاتە ئاشکراکرن و ژ ناڤ چوو .
کەیسەکا نوی ل سەر وی و هەڤالێن وی هاتە ڤەکرن و سزاێن توند لسەر هاتن سەپاندن . بریار هاتە دان ژ ئالیێ دادوەری ڤە کو (چوار) سالان دگەل کارێن ب زحمەت بو هاتنە دانان؛ ژبەر پێکۆلا رەڤینێ ژ زیندانێ . پشتی دادگەها وان ب دوماهی هاتی دو پۆلیس هاتن و ملێن وی گرتن و راکرنه ژ پێرڤە و بەر ب زیندانێ ڤە برن .
هەر دوی دەمی دا دزیکەرێن پرسیارێن تاقیکرنا پۆلا (١٢) هاتبوونە ئاشکرا کرن لێ هۆشەنک نەهاتبوو ئاگەهدارکرن؛ ژبەر پتر پشت راستکرنا بابەتی و وی چ تشت نە دزانین، لێ نوکە ب تومەتا رەڤینێ ژ زیندانێ هاتە سزادان. وەختێ وی ئەو تشتە زانی هشێن وی ل سەرێ وی دا نەمان و تنێ دکرە هەوار و دگۆت ئەز یێ بێ گوننەهم، ئەز بێ گوننەهم! . هەر چاوا بیت هۆشەنگی وێ شەڤا زۆرا ب زحمەت و نەخوەش یا دزیندانێ ڤە مای گەلەک هزرێن خو کرن لێ چ هیڤی نەمان ژبلی کو ئەو سالێن سزایێ خو بهەژمێریت و دوان هزران دا دخەو چوو. لێ گەلەک نە ڤەکێشا پۆلیسەک هاتە هنداڤی سەرێ وی و دەستێ خوە ل ملێ وی دا و ب دەنگەکی بلند گۆت: دێ رابە «هۆشەنگ» ما ئەڤە تو چەندێ خەو گرانی دێ رابە ڤە دێ . وی ژی ب دەنگەکێ بلند کرە هەوار، خودێ من وەنە کریە.. ئەزێ بێ گوننەهم!
ما دێ هوین من کیڤە بەن، دێ چ لمن کەن؟! رابوو ژپیاڤە و هەردو چاڤێن وی دسەرێ وی را سۆرببوون. سەرێ خوە راکر و بەرێ خوە دایێ هەڤژینا خوە ل هنداڤی سەرێ خوە دیت. هەڤژینا وی گۆت: تەخێرە، مالا ته، دێ رابە، تە خێرە تو هوسا مەندەهۆش بوویە؟ هەرە نانی بینە..
تو دزانی ئەڤرۆ تاقیکرنە و پێدڤیە بەری وەختی تو ل قوتابخانەیێ ئامادەببی. پشتی چەند خۆلەکان هشێن وی هاتن سەری وی گۆت: سوپاس بۆ خودێ ئەڤا من دیتی خەون بو نە راستی بوو. ژکەیفان دا نەزانی دەرگەهێ مالێ ل کیژان رەخی ڤەدبیت، لێ ژبەری بچیت بیرا وی هات و گۆت: ئاها! کا دا هەردو بەرویکێن خوە باش پشکنین بکەم کا سویچێن ترومبێلێ تێداهەنە یان ژی نە، دا جارەکادی نە بمە قوربانی و توشی ئاریشە و ئێشا ژبیرکرنێ نە بمەڤە.

کۆمێنتا تە