چاڤەڕێبوون
رەیان پیرۆمەری
د بێدەنگیا شەڤێ دا
و بیریا چاڤێن تە
رۆندکێن من
ل ئاسمانی رێیا هاتنا تە
یێن بووینە ستێرێن هەلاویستی
ڤولکانا غەریبیێ
دناخێ من دا هاردکەت
بالندێ هۆزانان
د گریا من دا گازی دکەت
د هەبوونا تەدا
خەم دهێنە رەڤان
و خەم دبنە سەماڤان
حەژێکرنا تە
ئاستەنگەکا کویر و نە شرینە
دناڤا دلێ من دا
هەردەم یا تژی برینە
د وەریێم
دناڤا دەستێ قەدەرێ دا
هەتا هەستێن من
ئێدی وەک پێنوسێن شکەستینە
وەکی گولەکا جوان و چرمسی
دهێم و دچم
ناڤا ڤی واری
و رۆندکێن من
دبنە رۆناهیا چاڤی.
