خولا ستێرێن ئیراقێ و خالێن پۆزتێڤ و نێگەتێڤ
ئیحسان حەسەن
ئێكەمین خولا ستێرێن ئیراقێ یا فوتبۆلێ ب كراسێ خوە یێ نوو، ب روودانێن خوە یێن خۆش و نەخۆش ب داوی هات، یا گرنگ ژی ئەوە هەر یانەیەكا پشكدار پشتی هەر وەرزەكێ وەرزشی ڤەكولینێ لسەر هەموو وان روودانان بكەت یێن كو كەڤتینە درێكا واندا، داكو بەردەوامییێ ب خالێن خوە یێن پوزتیف بدەن، دیسان سنورەكی بۆ خالین نێكەتیف بدانن، بۆ هندێ خوە باشتر نیشان بدەن و پتر باوەریێ بۆ پشتەڤان و جەماوەرێ خوە چێبكەن كو دێ شێن گەهنە وان ئارمانجان یێن كو نەشیاین ل وەرزێ بوری بجهبینێن، ئەگەر ئەم لدەستێكێ بەحسێ خالێن پۆزەتیڤ بكەین، یا ئێكێ و ژ هەمیا گرنكتر هێزا هەڤركییێ بوو ب تایبەتی دناڤبەرا هەردو یانەیێن بەغدایی شورتە و زەورا یێن كو دگەرێن داویێ دا یانەیا شورتە دبەرژوەندیا خوەدا ئێكلاكری، هەر چەندە دشیان دابوو هەردو نوونەرێن كوردستانێ و پارێزگەها دهۆكێ، یانەیا زاخۆ وەكو قارەمانا قۆناغا زڤستانێ و خودانا رێزا سێیێ، دهۆك هەلگرا ناسناڤێ خولا یانەیێن كەنداڤی ببنە هەڤركێن راستەقینە، ئەگەر شیابان بەردەوامییێ بدەنە ئاستێ خوە، دیسان نەچار نەببان دەستەكێن خوە یێن راهێنانێ ب گوهۆڕن، یا دویێ دیاربوونا هژمارەكا راهێنەرێن بیانی یێن زیرەك دناڤا خولێ دا ئەوێن شیاین ب شارەزاهییا خوە گهورینەكێ د شێوازێ فوتبۆلا ئیراقێ دا پەیدابكەن كو جەماوەرێ فوتبۆلێ خوشییەكێ ژێ بینیت، یا سێیێ پرۆتوكولا فێدراسیونا ئیراقێ دگەل لالیگایا ئسپانی وەكر، راگەهاندنا ئەرەبی و بیانی پتر پووتەی بدەنە هەڤركیێن خولێ، دیسان ئەڤ رێكەڤتنە دێ بیتە ئەگەرێ هندێ كو بۆ وەرزێ بهێت پیشەكارێن باشتر ژ یاریزان و راهێنەران هەڤبەستان دگەل یانەیێن ئیراقێ گرێدەن، یا چارێ ئامادەبوونا جەماوەری بتایبەتی یێن یانەیێن كوردستانێ، ئەو وێنێن جوان یێن كو برێكا دەستەكێن خوە یێن پشتەڤانان دیسان ئولتراسێن خوە نیشان داین، جوانییەكا دی دا هەڤركیێن خولا ڤی وەرزی، یا پێنجێ ڤەگوهاستنا هەموو یاریان، نخافتنا رۆژنامەڤانی و شرۆڤەكرنا زۆربەی یاریان خالەكا دی یا باشییا ڤێ خولێ بوو، یا شەشێ هەبوونا ژێرخانەیەكا باش ژ یاریگەهان لدووڤ ستاندارتێن جیهانی ل زۆربەی یانەیێن پشكدار، یا حەفتێ دەركەڤتتنا هژمارەكا یاریزانێن كەنج و بەهرەمەند دناڤا هژمارەكا تیمێن پشكدار دا كو ل پاشەرۆژێ دێ بنە نڤشەكێ باش بۆ فوتبۆلا ئیراقێ و هەلبژارتیێن وێ یێن نیشتمانی، دەربارەی خالێن نێكەتێڤ ژی، هەردێ مینیت شاشیێن دادڤانان، كارتێكرنا وان لسەر ئەنجامێن هندەك ژ تیمان ب تایبەت یێن هەرێما كوردستانێ، زێدەباری ئەو كریارێن تێكدانێ و توندو وتیژیێ یێن كو دناڤبەرا هژمارەكا یانەیان ب تایبەت یێن كوردستانێ هاتینە رووداین وبووینە ئەگەرێ سزادانا جەماوەر و یاریزانان، ژبلی زیانێن مادی، هەروەسا نەدادییا حكومەتا ئیراقێ ئەوێن یانەیێن كوردستانێ بێ بەهر كرین ژ هاریكاریێن خوە یێن دارایی، بەرۆڤاژی دەڤەرێن دی یێن ئیراقێ، خالێن هەرە نەباشێن هەڤركیێن خولێ بوون، ل دووماهییێ یا من دڤێت بێژم ب تایبەت بۆ یانەیێن كوردستانێ، هیڤییا مە ئەوە بۆ وەرزێ بهێت خالێن هەوە یێن پوزتێف پتر لێ بهێن، بۆ هندێ فوتبۆلا مە پتر پێشكەڤتنێ بخوەڤە بینیت، بشێین پشكداریەكا سەرفەرازتر بكەین.
