خەمێن خانمێ
سەیفوللا محەمەد
وەرە خانم
خەمێن خوە ژدەف من ببە
یان وەرە لێ ببە خودان
ما ئەڤرۆ بوو تە جەماندین؟
ب ناڤێ عەشقێ لمن حەواندین
تە یێن كرین…
بەلا سەرێ من
كولا دلێ من
نە ڕۆژێن من ڕۆژەڤن
نە خەو ب شەڤێن من دكەڤن
تە پشتا خوە دا من و
ڤان خەما
خۆشی نەما
هاتنا تە
گەلەك گیرۆ بوو و ڤەما
بەس بێژە من…
دێ چەوا قەرەبوو كی
ئەڤان هەمی سال و دەما؟
دەمێن عەشقێ
پڕ دژوار بوون
كەلا غەریبییێ
تژی ئێش و ئازار بوون
ژ دویرییا تە
خەمێن د ڤی دلێ مندا
گەلەك گەلەك حێج و هار بوون
بەس بێژە من…
چەوا كەلا ئەڤینییێ
هەست و نەستێن دلینییێ
هۆ هندا زوی
لدەف تە سار بوون؟
وەرە خانم
ما ئەڤینی هۆیە؟!
هەر ئێكی بۆ خۆیە؟
ما تە نە بهیستییە
داستانا مەم و زینێ؟
سیابەند و خەجۆكا
فەرهاد و شرینێ؟
چ هات سەرێ وان
سەرا عەشق و ئەڤینێ
بەس بێژە من ..
ما ڤان چیڕۆكا نا خوینی
دا بێی و
ئەم ژی پێكڤە
بۆ ئەڤینێ ببین قوربان
ببین چیڕۆك.. ببین داستان
یان ژی پێكڤە سەری دانین سەر بالگهەكێ و
ب ڕەڤینین
تەڤ خەیال و
خەمێن ژینێ
