ڕاوێژكار و ڕاوێژكاری
غیاس خـالد زێباری
ڕاوێژكار و ڕاوێژكاری ئەو كەس و ئۆرگانن ئەوێن ل پشت سەرۆك و بەرپرس و پلەدارێن وەڵاتی بۆ هەڵسەنگاندنا رەوش و بۆیەرا و دەست نیشانكرنا باشترین رێكێن چارەسەریێ بۆ دەركرنا بریارێن د بەرژەوەندا گشتیدا بن یان دارشتنا ستراتیژیەتا درێژخایەن ب بووارێن خوەدا بۆ كارێن رێڤەبرنێ، ئەركەكێ دیتر یێ ڕاوێژكار و ڕاوێژكاریێ هەلسەنگاندنا رەوش و بوویەرایە بۆ كەس و لایەنێن بریاردەر دا باشترین هەلوەست بهێنە وەرگرتن، ئەڤ چەندە رێكخراوێن ججەماوەری و پیشەیی و جڤاكێ سڤیل و یانەیێن وەرشی و …هتد ڤەدگریت. هەبوونا ڕاوێژكاران پێدڤییەكا فەرە و د كەڤن دا هەبوویە، لێ یا ژ هەمیێ گرنگتر ئەوە ڕاوێژكار بسپۆر و تایبەتمەن بن د وارێن خوەدا و ل دەمێن پێدڤی پسیار پێ بهێتەكرن، ل كوردستانێ و ئیراقێ سازیێن دەولەتێ و حوكمەتێ لەشكرەكێ راوێژكاران هەیە، لێ جهێ پسیارێ یە ئەرێ ئەڤ هەمی راوێژكارە د پسپۆر و تایبەتمەندن د وارێن خوەدا ..؟ ئەگەر پسپۆر و تایبەتمەند بن ئیراق نە دكەڤتە دڤێ رەوشا بێ سەروبەر یا سیاسی و كارگێری و ئاڤەدانی دا، یان ژی ئەو لەشكرێ راوێژكارا تنێ ژبووی ڕازیكرنێ و پركرنا جهی یە و پسیار پێ ناهێنەكرن، تنێ بریار دگەهنێ. ئەگەر وەسا نەبیت دڤان بیست ساڵاندا پارەكێ خەیالی بۆ رێك و پڕا و ئاڤ و كارەبێ هاتیە مەزاختن هێشتا نیڤەكا پێدڤیێن خەلكی نەهاتینە دابینكرن .
هەرێما كوردستانێ ژی كو بەشەكە ژ دەولەتا ئیراقێ جوداهیەكا زۆر ل گەل ئیراقێ هەیە، نەخاسمە ژلایێ سیاسی و ئێمناهیێ و سەقامگیریێ و ئاڤەدانیێ و خزمەتگۆزاریان، ئەڤە ژی نیشانێ هندێ یە ئاستێ راوێژكار و ڕاوێژكاریێ یێ ئەكتیڤە و پرس پێ دهێتەكرن، ب تایبەت ل سەردەمێ كابینەیا نەهێ یا حوكمەتا هەرێما كوردستانێ ب سەرۆكایەتیا مەسرۆر بارزانی، لێ ئەڤە ڕامانا هندێ یە چ كێماسی نینە و هەمی راوێژكار د ئاستێ پێدڤی دانە، چونكی د هندەك واران دا ستراتیژیەتا درێژخایەن نینە و زۆ پلان و بەرنامە دهێنە گۆهڕین، ئەگەر بووارێ پەروەردێ بكەینە نموونە دێ دیار بیت، یان پسیار ب راوێژكارا ناهێتەكرن یان راوێژكار د ئاستێ پێدڤی دا نینە، چونكی ڤان سالان چەندین جاران بەرنامە و سیستەمێ پەروەردێ هاتیە گوهۆڕین، بەری مامۆستا و سەرپەرشتێن پەروەردێ لێ شەهرەزا ببن جارەكا دیتر گۆهڕین ب سەردا دهێن، هەر وەسا بوارێ چاندنێ، ب تایبەت ل گوند و دەڤەرێن چیایی رۆژ بۆ رۆژێ ئاستێ چاندنێ ب تایبەت چاندنا ئاڤی و خودانكرنا مەڕ و مالاتی كێم دبیت، ئەرێ وەزارەتا چاندنێ بۆچی چ پلان و بەرنامە بۆ ڤێ چەندێ نینە؟.
