سکالایێن سوشیال میدیایێ پێدڤی ب بەلگەیانە
بێوار حەمدی:
پارێزەرەکی بۆ ڕۆژنامەیا ئەڤرۆ دیار کر کو هەکە شەڕەدەڤەک ب ڕێیا سوشیال میدیایێ و تێلەفۆنێ هاتە کرن و ئاخفتنێن نەجوان هاتنە گۆتن، ئەو کەسێ بڤی کاری ڕادبیت دێ تووشی سزایێن یاسایی بیت و گۆت: ڕێکارێن یاسایی بۆ سزادانێ ژبو هەردو رەگەزان وەکو ئێکن.
پارێزەر دیار عەبدوللا ددیدارەکێ دا بۆ ڕۆژناما ئەڤرۆ دیار کر کو د ماددەیێ 2 دا ژ یاسایا قەدەغەکرنا خراب بکارئینانا ئامیرێن پەیوەندیکرنێ یا سالا 2008 بەحس ل ڤێ چەندێ دکەت و گۆت: چ جیاوازی نینە دناڤبەرا کچێ و کوڕی گەر سوشیال میدیایێ خەلەت بکاربینن، ژبەرکو هەردو رەگەز وەکو ئێک دێ تووشی سزادانێ بن.
پارێزەری د بەردەوامیا ئاخفتنێن خۆدا گۆت: هەر شەرەدەڤەکێ بهێتە کرن بڕێیا تێلەفونێ یان سوشیال میدیایێ و بگەهیتە وی رادەی کو ئاخفتنێن نەجوان بهێنە گۆتن، هەکە خو ئەو ئاخفتنە یا نورمال ژی بیت وەکو (گەفکرن، یان بێ ڕێزیکرن) ل وی دەمی ئەو کەسێ ئەڤ بێ ڕێزیە ل هەمبەر هاتیە کرن، مافێ هەی سکالایێ لسەر تومار بکەت و ئەو کەسێ ئەڤ کارە کری دێ بەرپرسیار بیت بەرامبەر یاسایێ لدووڤ وی ماددێ ئاماژە پێهاتیە کرن.
دیار عەبدوللا ئەو چەندە ژی دازانین، هندەک جاران ب ڕێیا ئاخفتنا تێلەفونێ دادگەهێ پێدڤی ب بەلگەیان هەیە، لێ بەلگە بزەحمەت بدەست دکەڤن، لەوما کەسێ سکالا تومار کری دڤێت بەلگە هەبن، یان ژی دەنگێ وی کەسێ ئەڤ کارە کری هاتبیتە تومارکرن و گۆت: هەکە کەسەکی سیفەتەک یان پیشەیەکا فەرمی هەبیت ل وی دەمی دێ سزایێ وی توندتر بیت ژ کەسەکێ نورمال.
