بـاوەر ژ ئـاخفتنان نـەكـەن ل مێژوویێ بنێڕن
عەمەر هەرگۆشی
دەمەكە هندەك ل ژێر ناڤێن جودا جودا پەنایێ بۆ جەواشەكاریان و شێواندنا راستیان دبەن، وەسا دیار دكەن كو قەوارەیێ هەرێما كوردستانێ یێ د بن مەترسیان دا و رەنگە بهێتە ژناڤبرن، ئەو كەسانە هەر چ ژدەست هاتبیت یا ئەنجامدای، داكو راستیێ بڤەشێرن و بەروڤاژی رویدانان نیشا خەلكی بدەن، هەمی جاران ب فیتا داگیركەرێن كوردستانێ ل دژی دەستكەفت و پیرۆزیێن مللەتێ خۆ یێن راوەستایین و ب هەردو دەستان چەپلان بۆ داگیركەران لێ ددەن و ل بەر زورنا وان دیالانا دكەن، نوكە ژی كو گەلێ كوردستانێ پێدڤی ب هەمی ئامۆژگاری و وانەیێن وەلاتپارێزیێ و كوردایەتیێ هەی، هەق نینە هندەك كورد كو سەر ب هندەك لایەنێن سیاسی یێن دۆڕیایینە پرۆپاگەندەیان بۆ داگیركەران بكەن و ترسێ و بێ ئومێدیێ د ناڤ گەلێ كوردستانێ و خانەوادێن شەهید و پێشمەرگەی دا بچینن و ببنە پشكەك ژ راگەهاندا ناحەزێن كورد و كوردستانێ، ئێك ژ بەدبەختیێن گەلێ كوردستانێ ئەوەبوویە كوب درێژهیا دیرۆكێ هەمی جاران هندەك كەس هەبوونە كو دژی گەلێ خو وە ل دژی شۆرەش و سەرهەلدانێن گەلێ كوردستانێ و د بەرژەوندیا داگیركەران دا سەنگەر گرتیە و ژ دوژمنان پتر دەستێ خۆ ب خوینا گەلێ كوردستانێ سۆڕ كریە، جهێ داخێ یە كو هەتا نوكە ئەوێ رۆلێ جاشان و خاكفرۆشیێ دبینن د ناڤ مللەتێ مەدا هەنە، بەلێ جهێ دلخۆشیێ یە كو ئەڤرۆ گەلێ مە قووناخەكا باشا پێشكەفتنێ یا بری و كو دكارن زویكا مەرامێن نا حەز و كرێگرتیێن داگیركەران تێبگەهن و ب ساناهی بزانن كی د بەرژەوەندیان دا كورد و كوردستانێ دا دخەبتیت و كی د بەرژەوەندیا داگیركەر و بیانیان دا، لەوما هەر زویكا ئەوێن نیازێن پیس هەیی، شەرمەزاری گەلێ كوردستانێ دبن و چ سەنگ و نرخ د ناڤ دلسۆزێن كوردستانێ دا نامینیت.
پارتی هەمی جاران پشتا ب گەلێ كوردستانێ و پێشمەرگەهێن كوردستانی بەستی و ل تەنگاڤترین كاودانان دا ئومێدا رزگاریێ یا بۆ خەلكێ كوردستانێ چێكری و گوە نەدایە ئاخفتن و هەلوەستێن وەلاتفرۆشان، رۆژێن كیمیاباران و ئەنفالان دا پارتی ل مەیدانا خەباتێ هیڤیێن رزگاریێ و سەرفرازیان ددانە خەلكی و هندەكان ژێ هاری دوژمنێ مرۆڤ كوژ د كر و دگەل دوژمنی بریارا نەهێلانا كوردان ددا.
ئەم كوردێن هەتا نوكە چ سوود ژ وانەیێن كوردایەتیێ نەدیتی و هێشتا ب پێنڤیس و زمان و ب هەردو دەستان د خزمەتان داگیركەرێن كوردستانێ دا دخەبتن گەرەكە رووی رەشێم مێژوویێ و شەرمەزاری خانەوادەیێن شەهیدان بكەن، ئەڤرۆ جەنابێ سەرۆك بارزانی ل هەمی دەمەكی پتر ل گەل پێشمەرگە و هەمی دلسۆزێن كوردستانێ سەنگەرا كوردایەتیێ یا موكم كری و مزگینێ ددەتە هەمی ئازادیخوازان كو ئاسۆیەكی گەش یێ ل پێشییا گەلێ كوردستانێ و دەولەت سەرێ خوینا شەهیدان و خۆراگریا گەلێ كوردستانێ هەمی خۆزیك و هیڤیێن شەهیدان و داخوازێن كوردپەروەرا دێ هێنەجی. ئاخفتنا مە بۆ وان كوردێن وژدان فرۆش ئەوە بلا هێڤدەنێ كا گەلێ كوردستانێ ل چ تەنگاڤیان و كاودانێن خراب دا گەهشتە چ ئاستێ رزگاریێ و خۆراگریێ و بلا هێڤدەنێ ئەو لایەنێن دوژمنایەتیا كوردان دكر ل چ كاودانان دا بوون و نوكە ژی د چ دۆخێ سەخت و شەپرزەیی و بێسەروبەریێ دانە كو ب هزاران خاكفرۆشێن وەكی وان كوردێن نوكە نۆكەراتیا دوژمنان دا بوون و خزمەتا داگیركەران دكر، بلا بزانن چ شەرەف ل پێشمەرگەی دباریت و چ سەرشۆڕی ژی بۆ وان دمینیت.
