لێبۆرینا تایبه‌ت بۆ هندەک زیندانیان دێ هێته ده‌ركرن
هه‌ولێر، قائید میرۆ:
ڕێڤه‌رێ گشتی یێ چاكسازیێن هه‌رێما كوردستانێ، د دیدارەکێ دا بۆ ڕۆژنامەیا ئەڤرۆ دیار کر کو ، بزاڤێن وان بۆ ده‌ركرنا لێبۆرینا گشتی د به‌رده‌وامن، به‌لێ كارنه‌بوونا په‌رله‌مانی پرۆسا لێبۆرینا گشتی پاشخستیه و گۆت: نوكه ئه‌م كار لسه‌ر لێبۆرینا تایبه‌ت دكه‌ین.
ئیحسان بابان، رێڤه‌به‌رێ گشتی یێ چاكسازیێن هه‌رێما كوردستانێ بۆ رۆژنامەیا ئه‌ڤرۆ دیار کر، قه‌له‌بالغیه‌كا زۆر لسه‌ر چاكسازیێن هه‌رێما كوردستانێ هه‌یه و هنده‌ك هۆلێن چاكسازیان هه‌نه هژماره‌كا زۆر یا زیندانیان تێدانه، ئه‌ڤێ چه‌ندێ ژی بارگرانی بۆ چاكسازیان په‌یداكریه و گۆت: هه‌موو بزاڤه‌كێ دكه‌ین چاره‌سه‌ری بۆ زۆریا رێژه‌یا زیندانیان بهێته دیتن، چونكه هۆل هه‌یه بۆ هژماره‌كا دیاركری یا زیندانیان هاتیه چێكرن و به‌رۆڤاژی هژماره‌كا ئێكجار زۆر یا زیندانیان تێدانه.
بابان گۆتژی: بزاڤێن مه ژ چه‌ند ئالیانڤه هاتینه ده‌ستپێكرن ژ وانژی لێبۆرینا گشتی، مه پڕۆژه‌یه‌ك به‌رهه‌ڤكریه و مە دخواست دگه‌ل ده‌ست بكاربوونا په‌رله‌مانێ كوردستانێ لێبۆرینا گشتی بهێته ده‌ركرن، به‌لێ مخابن یا دیاره هێشتا په‌رله‌مانێ كوردستانێ كارا نه‌بوویه و كۆمبوونێن په‌رله‌مانی نه‌هاتینه ده‌ستپێكرن، ئه‌ڤه‌ژی نیشانا هندێ یه کو پرۆسا لێبۆرینا گشتی دێ گیرو بیت، هەکە لێبۆرینا گشتی بهێته ده‌ركرن دێ هژماره‌كا زۆر یا كه‌سێن هاتینه حوكمکرن مفادار بن و قەلەبالغیا دناڤا چاكسازیان ژی وه‌كی نوكه نامینیت.
رێڤه‌به‌رێ گشتی یێ چاكسازیان د بەردەوامیا ئاخفتنێن خۆدا گۆت: نوكه مه پرۆسه‌یەكا دی ده‌ستپێكریه ئه‌وژی ده‌ركرنا لێبۆرینا تایبه‌ته، بێگومان دو ساله كار بۆ لێبۆرینا تایبه‌ت دهێته كرن و ئاماره‌ك مه وه‌رگرتیه ل سه‌رانسه‌ری هه‌رێما كوردستانێ 135 زیندانی هه‌نه نه‌خۆشیێن دوم درێژ هه‌نه، ئەڤجا ژبۆ به‌رچاڤ وەرگرتنا ره‌وشا وان یا مرۆڤی ل سالا بۆری پشتی رێكارێن قانوونی 35 ژوان هاتنه ئازادكرن.
ئیحسان بابان ئەو چەندە ژی گۆت: حه‌فتیا بۆری مه كۆمبوونه‌ك ل سه‌رۆكایه‌تیا هه‌رێما كوردستانێ ئه‌نجامدا و تێدا ب هویری پرۆسا قۆناغا دویێ یا لێبۆرینا گشتی گه‌نگه‌شه كر و چاڤه‌ڕێ دكه‌ین پشتی رێكارێن قانوونی قۆناغا دویێ یا لێبۆرینا تایبه‌ت بهێته ده‌ركرن و هژماره‌كا زیندانیان مفادار ببن.
بابان دا زانین کو لیژنه‌یه‌ك ل سه‌رۆكایه‌تیا هه‌رێما كوردستانێ و وه‌زاره‌تێن ناڤخۆ و ساخله‌می و جڤاتا ئاسایشێ و كاربارێن جڤاكی و نوێنه‌رێن مافێن مرۆڤی و داخوازكارێ گشتی هاتیه پێكئینان و گۆت: نوكه ئه‌م ل گوره‌ی راپۆرتێن پزیشكی كار دكه‌ین و نێزیكی 100 زیندانیێن دی دێ هێنه ئازادكرن.
ئیحسان بابان، ڕێڤەبەرێ گشتی یێ چاکسازیێن هەرێما کوردستانێ دیار کر، مه‌رجێن مفاداربوون ژ لێبۆرینا تایبه‌ت ئه‌وە ئەو كه‌سێ هاتیە حوكم کرن چو مه‌ترسی لسه‌ر جڤاكی نه‌بن و لگوره‌ی راپۆرتا پزیشكی نه‌خۆشیا دوم درێژ هه‌بیت وه‌كی په‌نجه‌شێرێ و شه‌له‌ل ده‌ماغ و نه‌خۆشیێن دی یێن دوم درێژ، هه‌ر زیندانیه‌كێ ئه‌ف مه‌رجه هه‌بن دێ مفادار بیت و گۆت: ئه‌ز یێ گه‌شبینم دێ ل داهاتیه‌كێ نێزیك و ئه‌ڤ ساله لێبۆرینا تایبه‌ت هێته ده‌ركرن.
