پـارتـی پێدڤی ب هەر كوردەكی یە و نابیت كادرێ پارتی ژ خەلكێ بڕەڤیت
دیدار: سەدیق سنداڤی، هەڤلێر
پێشمەرگێ رێبازا كوردینێ و بەرپرسێ پەیمانگەها پێگەهاندنا كادرا – پارتی دیموكراتی كوردستان و خودانێ ٢٧ بەرهەمێن چاپكری ژ پەرتووكان، قادر قەچاخ بۆ رۆژنامەیا ئەڤرۆ راگەهاند:
كو پارتی پێدڤی هەر كوردەكێ یە و نابیت كادرێ پارتی ژ خەلكێ برەڤیت، بەلكو پێدڤیە پتر خوە نێزیكێ مللەتی بكت، ژ هەر پارت و بزاڤەكا دی و ب دروستی داخوازێن خەلكێ خوە بگەهینیتە سەركردایەتیێ.
دیسا گۆت: كو ئەڤە خولا ٢٠ یە، یا فێرخوازێن پەیمانگەها كادرێن پێگەهاندی دئێت برێڤەبرن، نێزیكێ هەیڤەكێ یە ب ئامادەبوونا هەردو جێگڕین سەرۆكێ پارتی دیموكراتی كوردستان، هێژا كاك نێچیرڤان بارزانی و هێژا كاك مەسرۆر بارزانی یا هاتیە دەستپێكرن. مە ٩٧ فێرخواز یێن هەنە و ٢١ ژ وان خانمن، فێركارێن مە ژی هەمی ئەندامێن سەركردایەتییا پارتینە و مامۆستاێن زانینگەهێنە و بسپۆرن هەر ئێك د چەندین واران دا. جهێ وانەگۆتنێ و خوارنێ و نڤستنێ مە یێ بۆ فێرخوازان د پەیمانگەهێ دا یێ دابینكری. هەر خۆلەك ٦ هەیڤا بەردەوام دكت، ب وەرگرتنا باوەرنامێ ب دوماهی دئێت. ب فەرمانا بارزانیێ نەمر ل سالا ١٩٦٨ پەیمانگەها پێگەهاندانا كادرێن پارتی دیموكراتی كوردستان یا هاتیە دامەزراندن.
هەر وەسا قادر قەچاخ گۆت: دڤێت كادر ژیانا خوە هەمیێ بۆ كوردبوونێ و پارتیبوونێ تەرخان بكەت و رەوشتێ وی ژ هەمی ئالیەكێ ڤە سەركەفتی و دورست بیت. یا ژ هەمیێ گرنكتر ژی ئەوە مرۆڤایەتیێ و نیشتیمان پەروەریێ بگەهینتە جەماوەری و ببیتە خەلەكەكا ب هێز د ناڤبەرا جەماوەری و سەركردایەتیێ دا، دیسا كادر دڤێت یێ بێ لایەن بیت و ژبەری هەر تشتی خوە ب كوردستانی بزانیت، ئەو كارێ پارتی بۆ دیار دكەت دڤێت یێ پێ رازی بیت و بكەت، نە ئەوا ئەوی بڤێت، هەر وەسا دڤێت یێ جهبجهكاربیت و خودان بریار و هەلوەست بیت. قادر دبێژیت: مرۆڤ ئانكو هەلوەست و هەلوەست ئانكو قوربانی. دڤێت جوداهیێ د ناڤبەرا چ پارچێن كوردستانێ و دەڤەرێن كوردستانێ و خەلكێ كوردستانێ دا نەكت، ئەو نوونەرێ پارتی و كوردایەتێ یە، نە نوونەرێ بنەمالێ و عەشیرێ و مەزهەبی و دەڤەرا خۆیە.
هەر دیساڤە گۆت: كادرێ سەركەفتی دڤێت مەژیێ وی ب رێبازا پارتی و بارزانیێ نەمر چەكداربیت، ڕێبازا پارتی و بارزانییە چارەنڤیسێ ڤی مللەتی یێ پێڤە گڕێدای، هەر ئەوە یا شیای هەبوونا كوردان بپارێزیت و سەركەفتنا دەستكەفتێ ئەڤرۆ مە هەی بینیت د هەبوونێ دا، هەر ئەوە یا شیای سەركردایەتییا شۆرەشا ئیلۆن و گولانێ بكت، ئەو پارتییە ئەوا ب خەباتا كادر و پێشمەرگە و جەماوەرێ خوە، شیایە بەیانا 11 ئادارێ ١٩٧٠ بدەستڤەبینیت و شیایە سەرهلدانا ١٩٩١ دەستپێبكت و هلبژارتنێن ١٩٩٢ پێكبینیت و پەرلەمانی و حوكمەتێ دامەزرینیت و شیایە پشتی روخانا رژێما گۆر ب گۆر پشكداریێ د حوكمەتا ئیراقێ دا بكت. ئەڤرۆ مە دەستكەفتێن خوە یێن پاراستین و خودان زانینگەه و فرۆكخانە و قونسلخانەیێن چەندین دەولەتێن زلهێزین جیهانێ ل كوردستانێنە، هەر وەسا خودان ئەكادیمی و كۆمپانێن زەبەلاحێن ئیستراتیژینە. لەوماژی دڤێت كادرێ پارتی ببیت پارێزەرێ ئەڤێ هەمیێ و بەرڤ وێڤەتر خەونا مللەتێ كورد كو ئەڤرۆ ئەم خودان ریفراندۆمین و بەرەڤ وێ ئارمانجێ ڤە دچین كو ئەوا مللەتێ مە هەمی پێدڤی پێ هەی كو سەرخوەبوونا كوردستانێ یە.
هەردیسا بەردەوامی دا ئاخڤتنا خوە و گۆت: مرۆڤێ ئاڤا دەزگەهێن ئاڤا پێ ئاڤا دبن، ئەوژی ژبەری خواندنێ پێدڤیە پەروەردەیا مرۆڤایەتیێ و نیشتمان پەرورییێ بێتە وەرگرتن، ئەڤەژی دەستپێ دكت هەر ژ باخچێ زارۆكا هەتا خواندنگەها بنگەهی و ناڤەندی و ئامەدەی هەتا دگەهیتە زانینگەهێ، ئانكو قووناخ ب قووناخ ژ ژیێ مرۆڤی ڤەدگریت، ئەڤە دڤێت بەرنامە ژ بۆ بێتە دانان، ژبەركو مخابن ئەم ژ هەستا مرۆڤایەتیێ و هەستا نێشتیمان پەروەریێ گەلەك لاوازین.
هەروەسا ڤەنەبری گۆت: هەر ژ سەرۆكایەتیا هەرێمێ هەتا بچویكترین دەزگەهێ برێڤەبرنێ، پێدڤیە چار تشت بێنەكرن بۆ ئاڤاكرنا مرۆڤی ١- رێنمای ٢- دویڤچوون ٣- سزادان٤- خەلاتكرن. دیساڤە خواندنگەها پارتی و بارزانی یا بەردەوام بیت، ئەڤ خۆلێن كادران گەشە بكن و بەردەوامبن، هەروەكی جەنابێ سەرۆك بارزانی فەرمان دای، دڤێت ئەڤ خولە هەر هەبن و بەردەوام بن لەوما ژی بەری ئەم ڤێ خولێ ب دووماهی بینن دێ یەكا دی ئامادەكن، ئەڤە بزاڤەكا رەوشەنبیریە و ئەڤە ژبۆ مە ژ هەمی بزاڤێن دی پێدڤیتربوو و پێدڤیترە و دێ پێدڤیتربیت.
هەر دیسا ناڤبری گۆت: مە پتر خواندەڤان یێن هەیین ژ رەوشەنبیران، ئەگەر ئەڤ پەروەردە و پرۆگرامێ مە بەحس ژێ كری بێتە چەسپاندن و سەری بگریت و خواندنگەها پارتی و بارزانی بەردەوامیێ بدەینێ و كادڕێ مە شیا بچیت ناڤ جەماوەری و شیا دلێ جەماوەری بكریت و داخوازێن وی ب دروستاهی بگەهینتە سەركردایەتیێ و راسپارێن سەركردایەتیێ بگەهینتە جەماوەری و ببنە جهێ باوەریا جەماوەری، هینگێ ب خوە خەلك دێ نێزیكی مە بیت و دێ وەكی مەگناتیسەكێ لێ هیت ژبۆ راكێشانا خەلكێ، بەلكی ئالیێن دی یێن پارتێن دی ل دویڤ خەلكێ دگەڕن و خەلك ژ بەر وان درەڤیت، بەس گەلەك جاران مخابن كادرێ مە ژی، ژ بەر خەلكێ درەڤن وەكی بارزانێ نەمر فەرمان كری و گۆتی هەڕن ناڤ مللەتی، مللەت مەزنترین مامۆستایە.
