رەوشەنبیریا یاریزانان و گرێبەستا ڤەگوهاستنێ
ئیحسان حەسەن
ب تنێ فینالا كوپا ئیراقێ مایە كو وەرزێ فوتبۆلێ بداوی بهێت، ئێدی جارەكادی دێ دەرگەهێ ڤەگوهاستنا یاریزانان ب تایبەتی یێن هەردو یانەیێن پارێزگەهێ دهۆك و زاخۆ هێتە ڤەكرن، هەر چەندە بەری نها هندەك گرێبەست بۆ وەرزێ بهێت گرێداینە، لێ مە بەحسێ وانە یێن كو هەتا نها ماینە دگەل تیمێ، دیسان ئەوێن دێ هێنە زێدەكرن دگەل تیمێ، بێ نەڤێت یاریزانێن مە وەكو هەموو یاریزانێن دی لسەر ئەنجامێ بلندبوونا ئاستێ وان یێ تەكنیكی، دیسان ئەو دەستكەڤتێن لڤی وەرزی بدەستڤە ئیناین، دبیت هندەك گرێبوست باشتر بۆ وان ژلایێ هژمارەكا یانەیێن دی چ دناڤا ئیراقێ دا یان ل دەڤەرە بۆ بهێن، بۆ هندێ مفای ژ شیانێن وان بینن كو بەرگیریێ ژ ناڤ و درێسێ وان بكەن، بێ نەڤێت ئەڤ پروسێسە پشكەكا سەرەكییە ژ پێشەكارییا وەرزشی ل هەر وەلاتەكی، دیسان دەرگەهەكە كو هەر وەرزشڤانەك بشێت بگەهیتە هیڤی و ئومێدێن خوە دژیانا خوە یا وەرزشی دا، لڤێرە رەوشەنبیریا یاریزانی رۆلەكێ سەرەكی و گرنك بۆ دەستنیشانكرنا چارەنڤیسێ خوە دبینیت، ژبۆ وەرگرتنا بریارا دروست كو بكەڤیتە دبەرژوەندیا ویدا دگەل بەرچاڤ وەرگرتنا وان هەموو خالێن شاش یێن كو دبیت كارتێكرنێ ب شێویەكێ ئێكسەر ل سەر پاشەرۆژا یاریزانی بكەت، ئەگەر بریار دا بچیتە یانەیەكا دی، لڤێرە وەكو دیار مە سێ جۆرێن یاریزانان هەنە، یێ ئێكێ ئەون كو كورێن پارێزگەهێ نە، سەرباری هەبوونا گرێبەستێن باشتر حەز دكەن بەردەوام بن دگەل یانەیا خوە یا دایك ژبو تۆماركرنا دیرۆكەكێ دگەل یانەیێ و جەماوەرێ خوە، ئەڤ رەوشەنبیرییە وەدكەت كو ئەو هەموو وان گرێبەستێن مەزن یێن یانەیێن دی ڕەتبكەن، یا دویێ هندەك یاریزان دی یێن مە یێن هەین رەوشەنبیریا هەڤڕكییێ هەیە، حەز دكەن بەردەوامییێ بدەنە سەركەڤتن و پێشڤەبرنا خوە، ئەڤ رەنگێ یاریزانان بخوە ددەلیڤەكا دی دگەریێن بۆ هندێ درێسێن یانەیێن مەزنتر بكەنە لبەر بخوە و پتر دەستكەڤتان دگەل یانەیێن جودا تۆماربكەن، جورێ سێیێ ئەو یاریزانێن یێن كو بخوە ل گرێبەستێن مەزنتر دگەریێن ئانكو كارتێكرنا رەوشەنبیریا دراڤی یا زالە لسەر وان، بۆ هندێ تشتەكی بۆ پاشەرۆژا خوە و خێزانا خوە بكەن، و پارێ خوە دمەیدانێن وەرزشی دا زێدەتر لێ بكەن، یا من دڤێت بێژم چونكو فوتبۆلا ئیراقێ و كوردستانێ و هەتا یا پارێزگەهێ نەیا دوورە ژ ڤان هەر سێ جوران و ئەڤە مافێ هەر یاریزانەیەكێ، لێ ئەز هووسا دبینم كو گرێبەستێن یاریزانان یێن مەزن دبیت ئێك ژ هۆكاران بیت كو یاریزان پتر خولەكێن یاریێ بكەت، ژبەر كوچەند یاریزان پتر یاریان بكەت دێ پتر شارەزاهییێ وەرگریت، ژبلی هندێ دێ بیتە جهێ سرنج راكێشانا راگەهاندنێ و دەرگەهەك كو چاڤێن راهێنەران بكەڤنە لسەر بۆ هندێ مفای ژ شیانێن وی بۆ یانەیێن مەزنتر هەتا یێن هەلبژارتیێن نیشتمانی بینن، ژبلی هندێ ژی ئەو یانە ژی یێن كو بخوە یاریزانێن خودان شیان دهێلیت، ئەگەر شیا دەستكەڤتێن باشتر بینیت، دبیت ل پاشەرۆژێ بخوە مفای ژ ماركتینكا وان بینیت، لێ هەر دێ مینیت ئاستێ یاریزان پێشكێش دكەت، كلیلا پێشڤەچوونا وی دمەیدانێن فوتبۆلێ دا.
