كۆپا ئیراقێ دێ بادینی و كوردستانی بیت
ئیحسان حەسەن
دیدارا فینالا كوپا ئیراقێ دناڤبەرا هەردو یانەیێن پارێزگەهێ دهۆك و زاخۆ ئەوا چاڤەریێە ل ئەینییا بهێت ل یاریگەها شەعب یا پایتەختێ ئیراقێ بەغدا بهێتە كرن، دهێتە هژمارتن ئێك گرنكترین روودانێن وەرزشی ددیرۆكا فوتبۆلا پارێزگەها دهۆكێ و ئیراقێ دا، ژبەر كو بۆ جارا ئێكێ دو تیمێن ئێك باژێر و كوردستانێ دگەهنە ڤێ پلا سەرفەرازیێ، ژبلی هندێ ناسناڤێ ڤێ قارەمانییێ دێ بۆ جارا ئێكێ بۆ تیمەكا كوردستانێ بیت و دێ ژ پایتەخێ ئیراقێ دەركەڤیت، بگورەیی ئەو ئاستێ هەردو تیمان بدرێژاهییا هەڤركیێن كوپا ئیراقێ نیشاندای ئەز باورناكەم چ رەخنەكر یان شرۆڤەكار بشێن پێشبینیا پێش وەخت بۆ ئەنجامێ ڤێ یاریێ بكەن، ژبەر نێزیكبوونا ئاستێ وان، ژبلی هندێ دیدارێن وان پتر لایەنێ دەرونی و زاخا یاریزانان بخوەڤە دگرن، هەروەسا هژمارەكا ئەگەرێن دی یێن تەكنیكی هەنە وەدكەن كو ئەنجامێ ڤێ دیدارێ یێ ڤەكری بیت، یا ئێكێ، هەردو تیمان دو راهێنەر زیرەك و شارەزا هەنە، هەر ب وەرگرتنا ئەركێن خوە وەكو راهێنەرێن پێگهۆر هەتا نها هیچ دۆراندن نەداینە، پاش دزانن دێ چەوا رەفتارێ دگەل ڤان رەنگە یاریان كەن، هەر چەند رەوشێن وان بزحمەت ژی بن، یا دویێ هەردو تیما هژمارەكا یاریزانێن خودان شیان دناڤ دانە دشێن جوداهییێ پەیدابكەن، ژبلی هندێ كومەكا یاریزانێن یەدەك ژی لبەر دەستێ دەستەكا راهێنانێ هەنە دشێن گوهورینێ دپلانێن خوە یێن تەكتیكی دا بكەن، دبیت دچێكرنا هێرشان دا دهۆك باشتر بیت، لێ دهێلا پێشییێ زاخۆ مەترسیدارتر دهێتە دیتن، یا سێیێ دهۆك پتر پشت بەستنێ د دروستكرنا هێرشاندا لسەر هەر ئێك ژ هارۆن ئەحمەد، زاكیری و سیابەند عەكید دكەت، دبەرامبەردا زاخۆ لسەر هەر ئێك ژ ئەمجەد عەتوان و مفا وەرگرتن ژ لیڤینێن ئیشا دیبوتی و ناسر محەمەدو و گوستاڤوی دهێلا هێرشبرنێ دا دبینیت، دهۆك هێرشێن خوە ژ كویراتییێ و لەزاتییا هەردو لایێن خوە یێن هێلا ناڤین دكەت، دبەرامبەر دا زاخۆ پتر مفای ژ تەپێن خوەجه و تەپێن ڤەگەریای دناڤا دەڤەرا تیما بەرامبەر دبینیت، یا چارێ هەردو تیمان كولپارێزن زیرەك و هێلا بەرەگیریێ یا بهێز هەیە، ئەڤە چەندە پتر دڤێ قارەمانییێ دا هەتا نها هاتیە دیتن، ب تایبەت بۆ زاخۆ ئەوا هیچ گۆل لسەر نەهاتیە تۆماركرن، لێ دڤێت ژبیر نەكەین كو گۆلكارێ كۆپا ئیراقێ ژ دهۆكێیە، یا پێنجێ، هەردو تیمان لەشكەرەكێ پشتەڤانێن دلسۆز هەنە ژبۆ بلندكرنا مورالا یاریزانێن خوە ژبۆ پێشكێشكرنا باشترین ئاستێ خوە بتایبەت ددیدارێن مەزن دا، ئەز دبێژم چونكو یا ئەستەمە تو پێشبینیا ئەنجامێ یاریێ بكەی، دیدارا دێربییێ پارێزگەهێ ب رەئیا من دێ ناڤ ونیشانێ وێ تەكنیك وكارزانییا ئەلهویێن چیا، بەرامبەر هێزو زاخا كەلها سور بیت، یێ كو ئەنجامێ یاریێ ژی بدەستڤە دئینیت، دێ دو چیچكان ببەرەكی كوژیت، یا ئێكێ دێ دمەزنترین دەرگەه ڕا چیتە ددیرۆكا كۆپا ئیراقێ وەكو قارەمانا ڤێ قارەمانییێ، یا دویێ ب دۆراندنا هەڤركێ خوە یێ دێرین، دبیت ئێك ژپلێتێن پشكداریێ د ئیك ژ قارەمانیێن كێشوەری یان ئەرەبی بدەستڤە بینیت، هەر ئەڤەیە دەستكەڤتا ژ هەمیا مەزنتر.
