كـچ ب ناڤـێ پرۆسەیـا هـه‌ڤژینیێ دهێنه خـاپاندن
پارێزه‌ره‌كا شیره‌تكار بۆ ڕۆژنامەیا ئەڤرۆ دیار کر کو ل هه‌رێما كوردستانێ خاپاندنا كچان بناڤێ ئه‌نجامدانا پرۆسا هه‌ڤژینیێ زێده‌بوویه و گۆت: ده‌مێ كچ دهێنه خاپاندن و ده‌ستدرێژیا سێكسی لسه‌ر دهێته كرن و کۆڕ دهێلیت، پێدڤیه کچ نەترسن و سكالایێ تومار بکەن.
لانه ئامانج، پارێزه‌ر و شاره‌زایا قانوونی دیار كر، رۆژانه ل هه‌رێما كوردستانێ كچ ژلایێ كوڕانڤه دهێنه خاپاندن بناڤێ ئه‌ڤینیێ و ب مه‌ره‌ما ئه‌نجامدانا پرۆسا هه‌ڤژینیێ كچا بۆ مه‌ره‌مێن خۆ بكاردئینن، پاشی كوڕ ده‌ستان ژ كچا به‌ردده‌ن و گۆت: ژلایێ قانوونیڤە هه‌ر كه‌سه‌كێ ئه‌ڤی كاری بكه‌ت ل گوره‌ی قانوونێ دێ هێته سزادان.
پارێزەرێ گۆت: مخابن به‌رده‌وام ئه‌و كه‌یسێن خاپاندنێ دچنه دادگه‌هێن هه‌رێما كوردستانێ و پشكه‌كا زۆر یا كچان ژ ئه‌گه‌رێ كه‌لتوور و نه‌ریتێن جڤاكی یان بێده‌نگ دبن یانژی نه‌چار دبن خۆ ژناڤ ببه‌ن، به‌لێ ب خۆشحالیڤه نوكه رێڤه‌به‌ریێن توندوتیژیێ و دادگه‌هێن هه‌رێما كوردستانێ بشێوه‌یه‌كی کو د به‌رژه‌وه‌ندیا كچاندا بیت سه‌ره‌ده‌ریێ دگه‌ل وان كه‌یسان دكه‌ن.
لانەیێ گۆتژی: ئه‌ز بخۆ وه‌كی پارێزه‌ر وان كچان هاندده‌م یێن دهێنه خاپاندن بناڤێ ئه‌ڤینیێ و ئه‌نجامدانا پرۆسا هه‌ڤژینیێ، بلا بێده‌نگ نه‌بن هه‌مبه‌ری مافێ خۆ، به‌رۆڤاژی رێكارێن قانوونی هه‌نه و دشێن ب رێیا قانوونێ سكالایێ تۆمار بكه‌ن، ژبەرکو تۆماركرنا سكالایێ مافێ وانایه، داکو چو كه‌سه‌ك چ كوڕ بیت یان زه‌لام زۆلمێ ل كچێ نەكه‌ت و لبن هه‌ر ناڤه‌كێ هه‌بیت سۆز و ڤیانا ئافره‌تێ بکارنەئینیت وه‌كی كالایه‌كی بۆ حه‌زێن خۆ بکارنەئینیت ده‌مێ كار ژی پێ نه‌ما ده‌ستا ژێ به‌رده‌ن، له‌وڕا ب رێیا قانوونێ كچ دشێن وان كه‌سان سزا بده‌ن.
پارێزه‌را شیره‌تكار لانه ئامانج د بەردەوامیا ئاخفتنێن خۆدا دیار کر کو لگوره‌ی قانوونا عێراقی هه‌ر كه‌سه‌ك كریارا سێكسی دگه‌ل كچه‌كێ ئه‌نجامبده‌ت و ته‌مه‌نێ كوڕی گه‌هشتبیته هه‌ژده سالیێ و سۆز دابیت دێ پرۆسا هه‌ڤژینیێ دگه‌ل پێك ئینیت، به‌لێ تنێ خاپاندن بیت پشتی ئه‌ڤێ كریارا سێكسی ده‌ستا ژ كچێ به‌رده‌ت ئەو کەسە دێ هێته سزادان ئه‌وژی زیندانكرن کو ژ 24 ده‌ژمێران كێمتر نه‌بیت و ژ پێنج سالان زێده‌تر نه‌بیت، به‌لێ ب مه‌رجه‌كی كریارا سێكسی هاتبیته ئه‌نجامدان و سۆزا هه‌ڤژینیێ هاتبیته دان، ئه‌ڤه‌ژی لگوره‌ی ماددێ 395 ژ قانوونا سزایێن عێراقی،.
پارێزەرێ زێدەتر گۆت: مه‌رجێ دویێ ئه‌وه كوڕ یێ به‌رهه‌ڤ نه‌بیت هه‌ڤژینیێ دگه‌ل ئه‌ڤێ كچێ پێك بینیت، مه‌رج نینه هه‌مبه‌ری كچان سۆزا هه‌ڤژینیێ بهێته‌دان هه‌مبه‌ری ژنانژی ئه‌ڤ سۆزه دهێته‌دان، زۆر مه‌رجێن دی هه‌نه قانوونێ دیار كرینه وەکی هەکە كوڕی خازگینی هنارتن و مالا كچێ رازی نه‌بوون ئەو تاوان دهێته گۆهۆڕین، هەکە كچ یا رازی نه‌بیت ب ئه‌نجامدانا كریارا سێكسی و ب زۆری سێكس دگه‌ل هاتبیته كرن ئه‌ڤه دێ ل گوره‌ی ماددێ 393 هێته سزادان و تاوان هێشتا مه‌زنتر دبیت.
پارێزەر لانە ئامانج ئەو چەندە ژی گۆت: بشێوه‌یه‌كێ گشتی دڤێت كچ و ژن د هشیار بن و نه‌هێنه خاپاندن، به‌لێ ده‌مێ تاوانه‌كا بڤی شێوه‌ی ل هه‌مبه‌ر هاته كرن دشێن ب رێیا قانوونێ سزایێ كه‌سێ به‌رامبه‌ر بده‌ن و نه‌ترسن.
