کۆنفرانسەک ل دۆر گرنگیا ئێکەتیا کوردان هاتە ساز کرن
دوهی ل باژێرێ بایەزیدێ ل باکورێ کوردستانێ کۆنفرانسەک ل ژێر ناڤێ گرنگیا ئێکەتیا کوردان هاتە ساز کرن، د کۆنفرانسێ دا سەرکردەیێن گەلەک پارتێن سیاسی یێن باکورێ کوردستانێ، ئەندامێن پەرلەمانی، سیاسەتمەدار، مامۆستایێن زانکۆیێ و کەسایەتیێن ناڤدار پشکدار بوون.
پشکداربوویێن کۆنفرانسێ بەحسێ گوهۆڕینێن نها ل دەڤەرێ کرن و ئاماژە ب ڤێ یەکێ کرن، نها ژ بۆ کوردان رەوشەکا گەلەک تایبەت هاتیە پێش، ژ بۆ کورد بشێن مفایێ ژ گوهۆڕینێن نها ل دەڤەرێ وەربگرن دڤێت د زووترین دەم دا ئێکەتیا سیاسی یا هێزێن سیاسی یێن کوردستانی بهێتە ئاڤاکرن و گرنگە کورد پێکڤە کار بکەن، چونکی هەکە کورد ئێکگرتی بن دێ بهێز بن و دەمێ بهێز بن دێ گەهنە مافێن خوە.
د کۆنفرانسێ دا بەحسێ قووناغا ئاشتیێ و رەوشا رۆژئاڤایێ کوردستانێ هاتە کرن و داخواز ژ هەموو هێزێن سیاسی هاتە کرن، کو پشتەڤانیێ ل رۆژئاڤایێ کوردستانێ بکەن دا ل وێرێ ژی کورد بگەهنە هەموو مافێن خوە.
