هـەڕنـە گـونـدان
غیاس خـالد زێباری
دەمێ زێدەتر ژ 30 سالایە ژبەر رەوشەكا تایبەت یا ئێمناهیێ بەردەوام گوندێن كوردستانێ دهێنە چولكرن و حوكمەتێ ژی نەشیایە دەستێ هاریكاریێ و خزمەتگۆزاریا بگەهینتێ، ڤێ چەندێ گڤاشێن زێدەتر لسەر باژێرێن كوردستانێ زێدەتكریە و جڤاكێ كوردستانی كریە جڤاكەكێ باژێری، جڤاكەكێ باژێری ژلایێ ئاكنجیبوونەكا پێل ب پێل و نە رێكخستی، ڤێ دیاردێ كاریگەریەكا زۆرا نەرێنی لسەر ئابوورێ كوردستانێ كریە، ژبەركۆ ب هزاران گوندێن كوردستانێ یێن ب خێر و بێر ژلایێ چاندنێ و بەرهەمێن چیایی و ئاژەلداری، ئەڤە ژی دربەكا مەزنبوو ب ئابوورێ كوردستانێ كەفتی، چونكی چاندن و ئاژەڵداری ستوونەكا بهێزا ژێر خانا ئابوورێ نشتیمانیە، ژبلی گرانتركرنا بارێ حوكمەتا هەرێمێ ژلایێ زێدەبوونا بێ كاریێ، حوكمەت نەچار كریە ب لەز گرنگیێ ب پرۆژێن خزمەتگۆزاری و ئاڤەدانیا باژێران بدەت و چالاكیێن وێ ب تایبەت كابینا نەهێ دڤێ رەوشا قەیرانیا ئیراقێ لسەر سەپاندنی جهێ دەستخوەشێ نە و زێدەتر ل شیانێن خوە بجهئینانە، لێ هێشتا باژێرێن مە د ناڤ كۆمەكا ئاریشان دایە مینا یەكەیێن ئاكنجیبوونێ و دەرفەتێن كاری و رێك و پر ..وهتد . ئەڤە ژی بارگرانیەكا زۆرە . نهۆ دەمێ هاتی بەرێ وان خزمەت و پرۆژەیان بدەتە گوندێن كوردستانێ و گاڤێن بلەز بهاڤێژیت بۆ ئاڤەدانیا گوندان، بتایبەت پشتی رەوشا ئارامیا گوندا بەرەڤ سەقامگیریێ دچیت و خەلكێ وان ژی چاڤەرێ ڤێ چەندێ نە، گرنگیدان ب گوندا پێلەكا بەرۆڤاژیا ئاكنجیبوونێ دێ دەستپێكەت، بئاڤەدانیا گوندا بەشەكێ زۆرێ پێدڤیێن كوردستانێ یێن چاندنێ و ئاژەڵداریێ و بەرهەمێن سرۆشتی و شیرەمەنی و پەلەوەری دێ دابین بن، ئەگەر گرنگی و پاڵپشتیا حوكمەتێ هەبیت زێدەتر ل پێدڤیاتیێ بەرهەم دێ هەبیت و د زۆر بواران دا داهێنان ژی دێ هەبن، ژبلی زەنگینیا گوندێن كوردستانێ ب جهێن گەشتیاری. ئەڤە ژی بارێ حوكمەتێ دێ سڤك كەت و داهاتەكێ زۆر دێ هێتە سەر داهاتێ كوردستانێ. یا گرنگ ئەوە خەلكێ وان گوندان ژ مێژەیە چاڤەرێ دەرفەتا ڤەگەراندنێ، لێ ڤەگەریانەكا ب هەبوونا پاڵپشتیا حوكمەتێ و بۆ كەرتێن چاندنێ و ئاژەلداریێ و گەهاندنا رێك و كارەب و ساخكرنەڤا بەرهەمان . تەكەز دكەین نهۆ دەمێ هاتی حوكمەتا هەرێمێ بەرێ كاروانێ ئاڤەدانیێ و خزمەتگۆزاریان بدەتە گوندا داكۆ گڤاشێن لسەر باژێران كێمتر ببن و زۆر ئاریشێن ئاكنجیبوونێ و ژینگەهێ ژی دێ هێنە چارەسەركرن و بارێ ئابووریێ حوكمەتێ ژی دێ سڤگتر بیت، چونكی پێدڤیێن گوندا ل یێن باژێران كێمترن و رێژا بێ كاریێ ژی دێ كێمتر بیت و بەرامبەر قەیرانێن بەغدا ژی دێ خوە راگرن.
