پێدڤییە یاسایا سزایێ سێدارەدانێ بهێتە جێبەجێکرن
بێوار حەمدی:
پارێزەرەکی بۆ ڕۆژنامەیا ئەڤرۆ دیار کر کو سزایێ سێدارەدانێ دهێتە دانان لسەر تاوانباری خۆ ئەگەر نەهێتە جێبەجێکرن ژی و گۆت؛ لێ بدیتنا من پێدڤیە ئەڤ یاسایە بهێتە جێبەجێکرن، چونکە سێدارەدانێ چ پێگوهوڕێن دی نینن.
پارێزەر، هەوار سەلاح دیار کر کو سزایێ سێدارەدانێ ل هەرێما کوردستانێ هەیە، بەلێ ناهێتە جێبەجێکرن و گۆت: گەلەک حالەت یێن هەین کو دڤێت تاوانبار بهێتە سزادان ب سێداەدانێ و یاسایا ئیراقێ ژی ئاماژە پێدایە ژ وان ژی تاوانا کۆشتنێ یا بەندێ 406 و 421 ژ یاسایا سزایێ ئیراقێ و گەلەکێن دی.
پارێزەری د بەردەوامیا ئاخفتنێن خۆدا دیار کر، سزایێ سێدارەدانێ دهێتە دانان لسەر تاوانباری خۆ ئەگەر نەهێتە جێبەجێکرن ژی، چونکە دادگەهێن هەرێمێ ژی یاسایێن ئیراقێ جێبەجێ دکەن وەکو یاسایا سزادانا ئیراقێ یا ژمارە 111 یا سالا 1969 کو ئەرکێ دادگەهێ ژی جێبەجێکرنا یاسایێ یە و گۆت؛ دەما دادگەھ بڕیارێ ددەت کار دکەڤیتە سەر ملێن حوکمەتێ ژبۆ جێبەجێکرنا وێ و ئێک ژ مەرجێن جێبەجێکرنا یاسایا سێدارەدانێ دڤێت سەرۆکێ هەرێمێ ئیمزایێ لسەر بکەت.
پارێزەر هەوار گۆتژی؛ بدیتنا من وەکو پارێزەر هیچ پێگوهوڕەک ژبۆ سێدارەدانێ نینە و پێدڤییە بهێتە جێبەجێکرن، هەرچەندە (ڕێکخراوا لێبوردەیا نیڤدەولەتی) ل دژی جێبەجێکرنا ڤێ یاسایێ یە، لێ جێبەجێکرن باشترە داکو هەرکەسەک بزانیت کۆشتن نەیاریە و دڤێت ترس ل دەڤ خەلکی بهێتە چێکرن سەبارەت ڤی بابەتی.
