سەرۆك بارزانی د بیرەوەریا جینۆسایدا بارزانییان دا پەیامەك هەبوو
عەمەر هەڕگۆشی
سەرۆك بارزانی كو تێكەلی ئێش و ژانێن بارزانیان و هەمەمی گەلێ كوردستانێ یە و ژ بلی هندێ كو سەركردە و رێبەرەكێ پڕ سۆزێ گەلێ كوردستانێ یە وەك تاكەكی جڤاكی یان تاكەكێ بارزانی؛ شاهیدێ هەمی خوین و رۆندكێن بارزانییان بوویە و رەنگە ژ هەمی بارزانیاین پتر دەنگێ قاری و زۆرلێكریێن بارزانییان گەهشتبیتە گوهێن وی، ئەو ب خۆ ژی ژ هەمی كەسان پتر هەستێ ب دەردێ گەلێ كوردستانێ و هەمی بەلەنگاز و تەپەسەرێن كوردستانێ دكەت و ژ هەمیان ژی پتر برینێن وان یێن سڤككرین و دەردێ وان ب خەبات و ماندیبوونا خۆ یێن چارەسەركرین.
د پەیاما خۆ دا سەرۆك بارزانی تەكەز دكەت كو چو جاران ئەو تاوانێن ل دژێ گەلێ كوردستانێ هاتین ئەنجامدان؛ ناهێنە ژبیركرن و نفش ل دویڤ نفشی، گەرەكە بزانن كو گەلێ كوردستانێ ب هەمی پیكهاتان ڤە ل پیناڤی پاراستنا ناسنامەیا نیشتمانی و مافێن رەوا یین خۆ قوربانیێن زۆرێن داین.
ئەوا كو د مێژوویێ دا ب سەرێ گەلێ كوردستانێ هاتی و ئەو قوربانیێن گەلێ كوردستانێ ژ بۆ ئازادیا ولاتێ خۆ دای و ئەو رووبارێ خوینێ یێ گەلێ كوردستانێ بۆ رزگار كرنا خاكا خۆ رێتی، گەرەكە بكەنە وانەیێن قوتابخانەیان و هەمی شارەزایێ ژ مێژوو و داستانێن قارەمانەتیا پێشمەرگە و شۆرشێن كوردی وەرگرن.
سەرۆك بارزانی زۆرێ ب پەڕۆشە كو سەرباری وێ زۆرداریێ یا ل گەلێ كوردستانێ هاتیە كرن؛ هێشتا ئەو هزرا كاڤلكرنێ و شەڕێ دوژمنكارانە یێ د مەژیێ هندەك كەسان دا و گەرەكە بزانن كو گەلێ كوردستانێ تو جاران دەستان ژ مافێن خۆ بەرنادەت و دێ بەرهنگاری هەمییان بیت ئەوێن ل سەر هزرا شۆفینێ و داگیركاریێ زۆرداریێ ل كوردان دكەن. سەرۆك بارزانی ژبلی هندێ كو داخوازیێ ژ حوكمەتا ئیراقێ دكەت كو نە بتنێ مافێ گەلێ كوردستانێ بنپێ نەكەت؛ بەلكو ب ئەركێ خۆ یێ یاسایی و دەستووری بەرنمبەر جینۆسایدێن ئەنفالان و كیمیابارانكرنا كوردستانێ و هەمی قوربانیێن دەستێ رژێما پێشیێ رابیت. كو دیارە ل جیاتی هندێ كو حوكمەتا ئیراقێ قەرەبۆیا خەلكێ كوردستانێ بكەتەڤە و بەرپەڕەكی تازە ل ل گەل خەلكێ كوردستانێ ڤەكەت كو پڕبیت ژ رێز و پێزانیان بۆ خوینا شەهیدان و قوربانیێن گەلێ كوردستانێ تازە خرابتر ژ جاران یێ سزایێ گەلێ كوردستانێ ددەن و ب مووچەبرین و درۆن هنارتنا ل سەر سیاسەتا شۆفینیانە و هۆڤانە دبەردەوامن و دخوازن ب رێكێن كەڤن و ب هزرێن كەڤن دوژمناتیا گەلێ كوردستانێ بەردەوام كەن.
ئەڤرۆ ل سایا جەنابێ سەرۆك بارزانی رێبازا شەهیدان و پارتی دیموكراتی كوردستان ژ هەمی دەمەكی پتر یا بوویە جهێ ئومێدا خەلكێ كوردستانێ و ژ هەمی دەمەكی پتر؛ پلان و بەرنامێ ناحەز و دوژمنێن خاكا كوردستانێ ژناڤدبەن و بۆ هەمیان دكەنە پەند،گەرەكە دەستهەلاتدارێن ئیراقێ پەندەكا باش ژ دەسەلاتدارێن رژێما پێش خۆ وەرگرتبان كو ئەوێن مافێن كوردان بنپێ دكرن و ئەنفال و كیمیایی ل دژی كوردان ئەنجام دایی، چاڤا تووشی شەرمەزاریێ بوون ل پێش چاڤێن هەمی ئیراقیان و جیهانی شەرمەزار و بێ نرخ كەن، گەرەكە دەسهەلاتدارێن ئیراقێ تێبگەن كو سەرۆك بارزانی ژ نێزیك ڤە ئاگەهیێ ل هەمی بزاڤ و هەولێن ناحەزێن كوردستانێ هەیی و ب هشیارانە و ب رەنگەكێ گونجای و بەرسڤ یا بۆ هەمیان هەی؛ ئەوە راستیە نە هەڕەشە، بلا دەسەلاتدارێن ئیراقێ تێبگەهن كو گەلێ كوردستانێ خودان مافە و نە پارتی و نە خەلكێ كوردستانێ دەستان ژ مافێن رەوا یێن كوردستانیان بەرنادەن.
