یانەیا هەولێرێ بەر ب كویڤە!
ئیحسان حەسەن
یێن كو دووڤچوونا وەرزشا كوردستانێ دكەن، باش دزانن كو دەسكەڤتێن وەرزشڤانێن یانەیا هەولێرێ لسەر نەخشێ وەرزشا ئیراقێ ب گشتی و كوردستانێ ب تایبەتی ژكەڤن دا تا نها ددیارن، ژبەر كو دیرۆكەكا دێرین و پری شانازی هەیە، سەركەڤتن و ئەنجامێن نافخۆ و ئیراقێ و هەتا ئاسیا ژی بەلگەنە لسەر وان دەستكەڤتن زێرین یێن كو لسەر دەستێن كچ و كورێن باژێرێ قەلا و منارە هاتینە تۆماركرن، ژبەر هندێ یا پێشبینیكری ئەوە كو ئەڤ یانە بەردەوامییێ ب كاروانێ خوە یێ پێشكەڤتنێ و سەرفەرازیێ دمەیدانێن وەرزشی بدەت، لێ ئەوا ئەم دبینین و جهێ راوەستاندنێ ئەوە كو ئەڤ یانە یا دڕەوشەكا بەرزەبوونێ دا دژیت، ژئەنجامێ وان كاودانێن تێدا دبوریت، نها ئەو شیان نینن بڤێ رەوشێ جارەكادی هەیبەتا خوە ڤەگەرینتە ڤە، ئەنجامێن وەرزێن بوری یێن تیمێن وان بەلگەیێ ڤێ چەندێ نە، ئانكو یا دووركەڤتی ژ هەڤركییا خوە یا بهێز، دیسان ژ ئاریشە و ئاستەنكان، رەنگە لڤێرە پشتەڤان و حەژێكەرێن هەولێرێ پرسیارەكێ بكەن، ئەرێ جهێ یانەیا وان ڤیان لسەر هەی نها ل كیڤەیە؟ بۆچی رەوشا وێ ناهێتە گۆهارتن؟ سەرباری پشتەڤانییا حكومەتا هەرێما كوردستانێ یا بەردەوام بۆ تیمێن یانەیێ، ئەز دبێژم ئەوا نها ب شێوەیەكێ گشتی ل یانەیێ دهێتە روودان ژئەنجامێ شاشیێن كارگێریێن یانەیێ یێن جودا بووینە، دیسان وان گورانكاریێن نەسەركەڤتی بووینە یێن كو كارتێكرن لسەر خوە گونجاندن و باوەریا وەرزشڤانێن یانەیێ و هەتا جەماوەری ب یانەیا خوە، ژبلی هندێ هۆكارێ مایتێكرنا هندەك لایەنان دكاروبارێن ڤێ یانەیێ دا هاتینە پێش، هەر چەندە هندەك ژڤان كارگێریان بزاڤ كرن كو رێكە چارەیەكێ ببینن كو رەوشا یانەیێ ب گۆهورن، بەلێ ڤان بزاڤان ژی سەرنەگرت، من نەڤێت لڤێرە ئەز بەحسێ لایەنەكێ خەمسار لدۆر رەوشا یانەیا پایتەختی بكەم، ژبەر كو ئەڤە بەرپرسیارەتییەكا هەڤپشەكە، ڤەگەراندنا یانەیێ بۆ جهێ خوە یێ دروست پێدڤی ئیرادەكا ساخلەم و بهێزە، ئێدی دەرڤەت نەهێتەدان ب وان كەس و لایەنان یێن یاریێ ب چارنڤیسێ ڤێ یانەیا مەزن بكەن، پێدڤییە لسەر لایەنێن پەیوەندیدار ب تایبەتی رێڤەبەریا گشتی یا وەرزشێ ل هەێما كوردستانێ، دیسان لژنەیا ئۆلمپی یا كوردستانێ و پارێزگەها هەولێرێ، وەرزشڤانێن دێرین و دلسۆزێن یانەیێ هەر زوو رێكە چاریەكا بنەرەت بۆ ڤێ رەوشێ بینن، ژبەر كو ل چ دونیایێ چ نەبوویە تو دكارگێریا یانەیەكێ دا سێ تا چار گۆهورینان د سالەكێ دا ژبەر هەر ئەگەرەكی بكەی، یا دروست ئەوە هەموو ناكوكیێن خوە بدانە لایەكێ، ژبەر ناڤێ هەولێرێ و هەولێریان، هەر زوو كار لسەر پێكئینانا دەستەكەكا كارگێری و بەردەوامییا وان بكەن، ئەوێن خوە كاندیدكەن یان هوون د هەلبژێرن، ئارمانجا وان تنێ ناڤ و دەنگییا وان نەبیت، بۆ هندێ سەنگا وەرزشا پایتەختی ڤەگەرینە ڤە، ئەگەر نە دبیت یا بهێت خراپتر بیت ژ وێ ئەوا ئەم هزر بۆ دكەین.
