ل سالا 1967مە رێكخستنێن نهێنی ل زانكۆیا مویسل دروستكـرن
سالار محەمەد دۆسكی:
1- 7
د.سەباح خەندان ئاغا ئاكرەیی، ژ دایك بوویێ سالا 1950 دەرچوویێ كولیژا پزیشكی ل زانكۆیا مویسل ل سالا 1973ێ، بەكالوریس ئاكادیمی یا لەشكرییا ئیراقێ 1973 وەرگرتیە، بوردێ نەخوشیێن دەروونی ل دانیمارك ل سالا 2005 وەرگرتیە، ل سوید 2006 و ل نەرویچ ل 2007 وەرگرتینە، شیرەتكاری یا نەخوشیێن دەروونی ل نەخوشخانا زانكۆیا (مالمو) ل سوید بۆ دەمێ شەش سالان، ناڤبری بەرپرسێ شانێن نهێنیێن قوتابیان سەر ب ئێكەتیا قوتابیێن كوردستانێ و ئەندامێ سكرتاریەتا هەمان رێكخراو ل سالێن حەفتێیان، ئێك ژ سەركردێن دەسپێكی یێن سەرهلدانا باژێرێ ئاكرێ، نوكە جەنەرال خانەشین ل لەشكرێ ئیراقێ یە.
د. سەباح خەندان ئاغا ئاكرەیی، د دیدارەكێ دا ل گەل رۆژناما ئەڤرۆ گۆت: ل دەسپێكا سالا 1967 مە رێكخستنێن نهێنی دروستكرن ل كولیژا پزیشكی ل زانكۆیا مویسل وی دەمی كاودان باشی چوون و چالاكیێن باش مەهەبوون بۆ زێدەكرن ئەندامەكێ پارتی و ژ نیشكەكێ ڤە بناڤێ(عەبدولرەحمان) هاتە دەستەسەركرن و دئەنجام دا گەلەك پێزانیێن مەیێن نهێنی كەفتنە دەستی حوكمەتا بەعیسان و نووچە گەهشتە مە ژ دەف (حەجی میرخانی) ل هێزا ئاكرێ و شێخان كو خوە باش ب پارێزین و چالاكیێن خوە دناڤا كولیژێ دا گەلەك بەربەلاڤ نەكەین، و هەر هەڤالەكێ مە بهێتەگرتن دەستەسەركرن ئێكسەر پەیوەندیێ ب شۆڕەشێ بكەین، خوش بەختانە دیارە هەمی پێزانین نە گەهشت بوونە حوكمەتێ و خێزانا كاك (عەبدولرەحمان) یا زیرەك بوو و شیا كاغەزێن نهێنی ل سەر بانیڕا و بانێن جیرانان دەرباز بكەت، و نەگەهنە دەستێ حوكمەتێ، و سوپاس بۆ خودێ شیاین رێكخستنێن خوە باشتر لێ بكەین، و بنهێنی ب پارێزین و ئەم شیاین بەردەوام بین هەتا بەیانا 11 ئادارێ بەلێ چالاكیێن ئەم شیاین بكەین گەلەك ژ هەڤالێن دی زێدەتر بوون، كارێ مە ل سەر دو تەوەران بوو سەرۆكاتیا زانكۆیێ جودا و كولیژا نوشداری جودا لەوما پێشچاڤتر بووین و ئەوان چالاكیان گەلەك هاریكاریا مەدكر، دەمێ پشتی 11ی ئادارێ مە كونگرە گرێدایی ئەم شیاین دەنگەكێ باش ب دەست خوە ڤە بینین ل سكرتاریەتا قوتابیان.
ئاكرەیی هەروەسا گۆت: وەك وەفاداریەك بۆ ئەوان هەڤالێن ب رێكا من بووینە ئەندام و ئەوان ژی چەندین هەڤال كرینە ئەندام و مە پێكڤە خەباتكرین ل رۆژێن شۆڕەشێ دا حەز دكەم هندەك ناڤا بێژم وەك ( د. عەبدوللا عەبدولكەریم، د. عیسام، د.عەبدوسەلام، د.مەردان خەلیل، د. سەفەر سلێمان، د.سادق عەبدوللا، د. ئازاد نوری بەگ) كومەكا دی كو چالاكیێن باش ل ئامادەیا و ناڤنجی ئەنجام دا وی دەمی د. ئازاد نوری بەگ مە راسپارد كو ببیتە بەرپرسێ ناڤنجییان و دەست ب رێكخستنێ بكەت، خودێ ژیێ وان درێژ بكەت د. سادق چوویە بەردلوڤانیا خودێ.
د. سەباح ئاكرەیی زێدەتر دیاركر: بەری رێككەفتنا 11ی ئادارێ یا سالا 1970 بهێتەكرن مە پێزانین هەر ل رێكخستنێ و هەم ل ڕاگەهاندنێ ژی هەبووینە كو شاندێن شۆڕەشێ سەرەدانا بەغدا دكەن، و بەرۆڤاژی شاندێن بەغدا ژی دهێنە ناڤ شۆڕەشێ و رۆژا بەری 11ی ئادارێ دەنگو هەبوو كو رێككەفتن هاتیەكرن، و دێ هێتە ڕاگەهاندن و ئەم كومەك كوم بووین دا گوهداریا بەیانێ بكەین (ئەحمەد شەریف كوچە) بەرپرسێ ناوچا ئاكرێ بوو، و ئەم ل مالا وی بووین و چەند هەڤالێن قوتابیان ل گەل مە بوون كا هەتا چ ئاست دێ ئارمانجێن كوردان تێدا هێنە بجهئینان، و تشتەكێ جوان و خوش بوو و لەما رۆژا دوڤدا ئەم كوم بووین ل پێش ئاڤاهیێ پارێزگەها مویسل، و كومەكا باش یا قوتابیان مە برن و رێكخراوا رێكخستنێ یا پارتی دیموكراتی كوردستان ئەو ژی بەرهەڤبوون، و ناوچا پارتی یا نهێنی خوە ئاشكرانەكرن، چونكە چ رێنما نە گەهشت بوونێ هێشتا و لەوا من سەرپەرشتیا وێ خوپیشاندنێ دكر، و ئەم بەرەف جادا (حەلەب) چووین و چووین هەتا (باب سنجار) پشت و پشت چووین و من دروشم دگۆتن و هەڤال بەرسینگێ من دهاتن و بدەنگەكێ بلند ڤەدگێران، و پتریا دروشمێن مە سەركەفتنا بزاڤا كوردی و پێشرەوی یا جەنابێ بارزانی بوو ، بۆ دامەزراندنا حوكمێ زاتی بۆ كوردستانێ و تشتەكێ گەلەك بهێز بوو، چونكە رێكخستنا پارتی پشكداری نەكربوو دوڤدا رێكخستنا پارتی بەرنامەك دانا كو بچینە (بلكێبێ) ئاهەنگەكێ بكەین، و ئەم چووین و مە ئاهەنگەكر ب هەلكەفتا 11ی ئادارێ و كاودان هوسا چوون كو رێكخستنا خوە ئاشكرا بكەین، و مە هڤالێن خوە هاندان كو خوە ئاشكرا بكەین كو ئەندامێن رێكخستنا پارتی دیموكراتی كوردستانن دا سەنگا خوە دیار كەین بۆ حزبا بەعس و هەڤالێن خوە ژی و پشتی ئاشكرا بوو وەزنێ مە دیار بوو كو خودان سەنگین و دەمێ رێكخستنێن خوە كوم ڤەدبووین خەلكێ مویسل حێبەتی دبوو كو كوردان هندەك رێكخستنێن بهێز هەنە و هەژمارا هەرە زور قوتابی بووینە، و حزبا بەعس حێبەتی بوون و هەتا رێكخستنێن فەلەستنی ژی هەبوون، و هێزا وان گەلەك یا مەزن بوو و بەرامبەر حزبا بەعسی، و تایبەت دناڤ قوتابیان دا و حزبا شوعی یا ژی گەلەك یا بهێز بوو و پشست بەستنا مە كەفتە سەر رێكخستنا فەلەستینیا و شوعییا و هەتا گەهشتیە وی ئاستی حزبا بەعس هزرەكێ بۆ مە بكەت.
