هندەک بڕیارێن گرنگ د بەرژەوەندیا كرێكاران دا
تارق عەبدال
كرێكار ئەو كەسێ ئاسای یە ئەوێ ژ لایێ مێشكی و لەشی ڤە یێ ساخلەم، دشێت كار بكەت، ئەڤ كرێكارە ل ژێر چاڤدێریا خۆدان كارەكی دا كاردكەت، بەرانبەر كریەكا دیاركری خۆدان كار ژی بەرانبەری وی كرێكارێ ل دەف وی كاردكەت دڤێت ل دویڤ قانوونا كاری و یا دابینكرنا جڤاكی و قانوونا رێكخستنا سەندیكایی هەمی مافێن وی بدەتێ، بەلێ ب مخابنی ڤە هندەك خۆدان كار هەول ددەن كرێكاری بچەوسینن، مافێن وی وەكی پێدڤی و لدویڤ قانوونێ دابین بكن، لەورا ل پڕانیا وەلاتێن جیهانێ قانوون و رێنمایێن توند هەنبەر خۆدان كاران دگرنە بەر ژبۆ پاراستنا مافێن وان، دیسا رۆلێ سەندیكایێن كرێكاران گەلەكێ كاریگەرە ژبەر هندێ خۆدان كار زوی ب زوی نەشێت مافێن كرێكاران پێشل بكەت، لێ وەلاتێن رۆژهەلاتی ب گشتی قانوون وەكو پێدڤی رۆلێ خۆ ناگێریت، ئەڤەژی بۆ چەندین هۆكاران ڤەدگەرن ژ وان ژی حوكمەتێن وان زێدەتر پشتەڤانیا خۆدان كاران دكەن، هەمی تشت د بەرژوەندییا وان دا دهێتەكرن و نەدادپەوەرییا دەستهەلاتێن وان و نەسەقامگێریا باردۆخێن سیاسی و نەجێگربوونا بارێ ئابووری و چەندین پرسێن دیتر، دیسا ژلایەكێ دیڤە سەندیكایێن كرێكارێن ڤان وەلاتان نەشاینە رۆلەكێ باش بگێرن و ببنە نوونەرێن راستقەیێن كرێكاران بەلكو كەفتینە بن فشارێن دەستهەلاتدارێن وەلاتێن خۆ ل هندەك وەلاتان بتنێ وەك ناڤ سەندیكایێن كرێكاران هەنە هیچ بەرەڤانیەكێ ژ مافێن كرێكاران ناكەن ئەڤە دەمەكی دایە كو دڤێت ئەو خۆ ل ئێش و ئازارێن كرێكاران بكەنە خودان، بەلكو تاكە مەرجع و جه كو بەرەڤانیێ ژ ماف و داخوازیێن كرێكاران بكەن، بتنێ سەندیكانە ئەگەر ئەوژی نەشیان چ بۆ كرێكاران بكەن ئێدی كرێكار بەرێ خۆ بدەتە كیڤە، لەورا یا پێدڤی یە حوكمەت و خۆدان كار و سەندیكایێن كرێكاران زێدەتر خوە ل ئێش و ئازارێن كرێكاران بكەنە خۆدان ژبۆ هندێ كرێكار ل مافێن خوە شاد بن ب دلخۆشی ڤە حوكمەتا هەرێما كوردستانێ كابینەیا نەهێ چەندین بریار و رێنمایێن گرنگ د بەرژوەندییا كرێكاران دا هاڤێتن، ئەوژی بریارا (١٧٢) كو نابیت د هەر پرۆژە و جهەكێ كاری دا زێدەتر ٢٥٪ ژ كرێكارێن بیانی تێدا كار بكەن دڤێت ٧٥٪ كرێكارێن خومالی تێدا كاربكەن و دیسا بریارەكا هەرە گرنگ د بەرژوەندییا كرێكاران دا هاتیە هاڤێتن ژ لایێ حوكمەتێ ڤە، ئەوژی نابیت مووچەیێ كرێكارێن ئاسای ئانكو نەكارامای ل (٤٥٠) هزار دیناران كێمتر بیت ئەڤە ژی مزگینیەكا گەلەك دلخۆشكەر بۆ كرێكاران ب ئۆمێدا وێ چەندێ بریار و یاسا و راسپاردێن هۆسا یێن گرنگ كو د بەرژەوەندیا كرێكاران دا بەردەوام ژلایێ حوكمەتا هەرێما كوردستانێ ڤە بهێنە هاڤێتن، ژبەركو تەخا كرێكاران تەخەكا گرنگا جڤاكی یە، لەروا ژی دڤێت گرنگی و پیتەكێ زێدەتر ب كرێكاران بهێتەدان ژبۆ هندێ وەلاتێ مە هەر پیشكەڤیت و ئاڤەدان بیت.
