فێستیڤالا خانی 3 ب سەركەفتیانە ب دووماهی هات
شاكر ئەتروشی،
سندس سالح سلێڤانەیی:
بەرنامەیێ رۆژا دویێ و دووماهیێ یێ فێستیڤالا خانی، دوهی 6/ 10
ل دەمژمێر دەهی سپێدێ، هەر ل هۆلا كونفرانسان ل سەرۆكاتیا زانكۆیا دهۆكێ دەستپێكر و دپەنەلێ چارێ دا سێ سمینار هاتنە پێشكێشكرن، كو ئەو ژی بڤی رەنگی بوون:
ئازاد حەمە ئەمین، سمینارا وی ل ژێر ناڤێ (رۆلێ یاسایێ د كونترۆلكرنا سۆشیال مەدیا نەرێنی دا) بوو.
د. سادق سەركەتی، سمینارا وی ل ژێر ناڤێ (باندۆرا سۆشیال مەدیایێ ل سەر جیهانێ) بوو.
د. مەهدی شەعبان، سمینارا وی ل ژێر ناڤێ (ئاسۆیێن سۆشیال مەدیایێ یێن پاشەرۆژێ) بوو.
دپەنەلێ پێنجێ و دووماهیێ ژی دا سێ سمینار دی هانە پێشكێشكرن، كو ئەو ژی گرێدای زیرەكیا چێكری بوون و بڤی رەنگی بوون:
د. شێرزاد سەبری، سمینارا وی ل ژێر ناڤێ (زمانێ كوردی زارێ بەهدینی).
د. جیهان عەبدولعەزیر ئەحمەد، سمینارا وێ ل ژێرناڤی (بیاڤێن مفا وەرگرتنێ).
هەكار هەركی، سمینارا وی ل ژێر ناڤێ (راگەهاندن).
پشتی ب دووماهی هاتنا وان سمیناران دەرگەهێ دانوستاندنێ هاتە ڤەكرن و ب ئاراستەكرنا چەندین پرسیار و تێبینبان ژلایێ بەرهەڤبوویان ڤە ئەو سمینار زەنگینتر لێ كرن.
ل دەمژمێر دوازدەی نیڤرۆ ژی خەلات ل سەر هەموو پەنەلێستان و كۆمپانێن پشكداری د فێستیڤالێ دا كرین هاتە بەلاڤكرن.
پاشان (ئیحسان ئامێدی) بەرپرسێ ناڤەندا خانی یا رەوشەنبیری و راگەهاندنێ كو د هەمان دەمدا سەرۆكێ فیستیڤالا خانی 3 بوو، پەیڤەكا سوپاسیێ پێشكێشر و ب ناڤێ ناڤەندا خانی سوپاسیا وان لژنەیان كر ئەوێن ب كارێ رێكخستنا ڤێ فێستیڤالێ رابووین، هەروەسا سوپاسیەكا تایبەت ئاراستەی بەرێز(د. سالا عوسمان) بەرپرسێ بەشێ رەوشەنبیری و راگەهاندنا پارتی دیمۆكراتی كوردستان كر بۆ پشتەڤانیا وی یا بەردەوان بۆ ڤێ فیستیڤالێ و هەموو چالاكیێن ناڤەندێ، هەروەسا سوپاسیان وان هەموو كەس و لایەنان كر ئەوێن ب هەر رەنگەكی پشتەڤانیا ڤێ فێستیڤالێ كرین و گۆت ئەو راسپاردەیێن ژڤێ فێستیڤالێ دهێتە دەركرن دێ ب گرنگی و ل بەرچاڤ وەرگرین ژ بۆ هندێ بۆ فێستەڤالا بهێت مفای ژێ وەربگرین.
ل دووماهیێ راسپاردەیێن فێستیڤالێ ژلایێ (د. درباس مستەفا) رێڤەبەرێ نڤیسینێ ل گۆڤارا مەتین هاتنە خواندن، ل دەمژمێرچاری ئێڤاری ژی هەموو پشكدار و مێهڤانێن فێستیڤالێ سەرەدانا جهێن گەشتیاری و كلتۆری ل زاخۆ كرن و ب هەماهەنگی ل گەل ئیدارەیا سەربەخۆیا زاحۆ ئاهەنگەكا هونەری هاتە گێڕان و شیڤ خوارنەك بۆ بەرهەڤبوویان هاتە دانان وبڤی رەنگی فێستیڤال ب سەركەفتیانە ب دووماهی هات.
