ل بەغدا دێ بینە سەنگەرەكێ بهێز بۆ پاراستنا مافێن هەرێما كوردستانێ یێن دەستووری
سالار محەمەد دۆسكی:
ئەیسەر دۆسكی، بەربژارێ هژمارە 7 لیستا 275 یا پارتی دیموكراتی كوردستان دا بۆ پەرلەمانێ ئیراقێ بۆ رۆژناما ئەڤرۆ گۆت: بەرنامێ كارێ من یێ سەرەكی دێ پارێزگاریكرن بیت ژ مافێن دەستووری یێن گەلێ كوردستانێ و پاراستنا قەوارێ هەرێما كوردستانێ، پرۆگرامی من ل سەر چەند خالێن گرنگ راوەستیایە، پاراستنا مافێن دارایی: كاركرنا رژد بۆ جێگیركرنا پشكا هەرێما كوردستانێ د بودجەیا فیدرالی دا ب شێوەیەكێ دادپەروەرانە و دوور ژ ململانێیێن سیاسی.
ئەیسەر دۆسكی، بەربژارێ هژمارە 7 د دیدارەكێدا ل گەل رۆژناما ئەڤرۆ دیار كر، هەلبژارتنا من ژلایێ پارتی ڤە ئەركەكێ گرانە و د هەمان دەمدا جهێ شانازیێ یە، باوەرم پارتی ل دووڤ مێژوویا من یا خزمەتكرنێ و بسبوریا من یا یاسایی و دلسۆزیا من بۆ ڕێبازا پیرۆزا بارزانی و گەلێ كوردستانێ ئەڤ باوەریە ب من دایە، ل بەغدا، دێ بمە دەنگێ وە یێ بهێز.
هەمان بەربژار گۆت: ئێكرێزی چەكێ مەیە یێ هەرە، بهێزە و دوژمن و نەیارێن مە ژ پەرتەوازیا مە مفای وەردگرن. دەمێ ئەم ل بەغدا د ئێكگرتی بین، چو لایەن ناشێن مافێن مە بنپێ بكەن. كێشەیێن بودجێ، پێشمەرگەی، و ماددێ 140 كێشەیێن هەمی خەلكێ كوردستانێ نە، نە یێن حزبەكێ ب تنێ.
ئەیسەر گۆتژی: دروشمێ پارتی بۆ ئەڤان هەلبژارتنان ژ سێ پەیڤێن بنەرەتی پێك دهێت كو هەر ئێك ژ وان رامانەكا سیاسی یا گرنگ هەیە و د هەمان دەم دا، پارتی دیموكراتی كوردستان ب كریار، نە ب تنێ ب گۆتن، كار لسەر ڤان پرەنسیپان كریە و دكەت، هەڤپشكی رامانا وێ ئەوە كو ئەم باوەری ب كاری پێكڤەیی دئینین و چ كارەك ب تنێ ناهێتە كرن، دەرگەهێ مە دێ بەردەوام بۆ وەلاتیان ڤەكری بیت. ئەم دێ كار كەین بۆ راگرتنا هەڤسەنگیێ د چەندین بواران دا، د پارڤەكرنا خزمەتگوزاریان دا ئەم ناهێلین پرۆژە و خزمەتگوزاری ب تنێ ل سەنتەرێ باژێری بن، بەلكو دێ ب هەمان گرنگی سەحكەینە قەزا، ناحیە و گوندێن دەوروبەر، ئاڤاكرنا رێك و پران، گەهاندنا ئاڤ و كارەبێ، ڤەكرنا بنگەهێن ساخلەمیێ و قوتابخانان، هەڤسەنگی دناڤبەرا پێكهاتەیان دا.
پارێزگەها دهۆكێ نموونەیا پێكڤەژیانا ئایینی و نەتەوەییە، دێ كار كەین بۆ پاراستنا مافێ هەموو پێكهاتەیان (كورد، كریستیان، ئێزدی و…) و دابینكرنا هەڤسەنگیێ د دەلیڤێن كاری و پۆستێن ئیداری دا ل دووڤ شیان و شارەزاییێ، ل دەمێ ئەنجامدانا هەر پرۆژەیەكی، ئەم دێ رەچاوی پاراستنا ژینگەها جوان و سروشتێ دەڤەرێ كەین، ئاڤەدانی دێ بەردەوام بیت، لێ ب رێیەكا هەڤسەنگ كو زیانێ نەگەهینیتە ژینگەها مە، لەهەڤكرن ئانكو ئاشتی و تەبایی و پێكڤەژیانا ئارام، ئەڤە ستوونا سەرەكی یا ئارامی و سەقامگیریێ یە ل هەرێما كوردستانێ و ب تایبەت ل دهۆكێ، دێ ب هەموو شیان كاركەین بۆ پاراستنا وی گیانێ برایینی و پێكڤەژیانێ یێ كو خەلكێ كوردستانێ.
ئەیسەر دۆسكی گۆتژی: چارەسەركرنا كێشەیا مووچەی د لیستا كاری یا هەرە پێشین یا مە دایە، ڕاستەوخۆ گرێدایە ب پشكا هەرێمێ ژ بودجەیا فیدرالی، ئێدی نەبیتە كارتا فشارا سیاسی ل سەر خەلكێ كوردستانێ، دێ داخوازا میكانیزمەكا ڕوون و ئاشكرا كەین بۆ هنارتنا مووچەی و بودجەی ب شێوەكێ ڕێكخستی.
