ئەم رۆژانە دۆرێن 700 كیلۆیێن تەحینێ بەرهەم دئینین
ئامێدیێ، مەحمود نهێلی
ژ بەر تام ومفایێن وێ د ڤان سالێن داویێ دا داخوازی ل سەر تەحینا خۆمالی زێدەبوویە زێدەباری وێ یەكێ كو بهایێ وێ گەلەك گرانترە ژ تەحینا دەرڤە. نوكە چار ئاشێن تەحینێ ل سەنتەرێ ناحیا دێرەلۆكێ هەنە و هەموو ژی بەردەوام د كاری دانە و بۆ پركرنا خواستا خەلكی ل سەر تەحینا دەڤەرێ ئەڤە زێدەبارێ وێ یەكێ ل ئامێدیێ و شێلادزێ ژی هەژمارەكا ئاشێن تەحینێ هەنە.
عەگید سەرنی، خودانێ ئاشێ تەحینا سەرنی ل دێرەلۆكێ بۆ رۆژناما ئەڤرۆ دیار كر، سال بۆ سالێ داخوازی ل سەر كڕین و خوارنا تەحینا خۆمالی زێدە دبیت و گۆت: د ڤان سالێن داویێ دا بەردەوام ئەو كار دكەن ژ بۆ بەرهەمئینانا تەحینا خۆمالی یا كونجیێن دەڤەرێ.
ناڤهاتی دیار كر، ئەڤە پتر ژ 150 سالایە بنەمالا وان كارێ ئاشی بەرهەمئینانا تەحینێ دكەن، پشتی ئەنفالێن رەش و گوندێن وان هاتینە خراب كرن ئەو دەربەدەربوون و ئاشێ وان ژی هاتە خرابكرن، ئەوان نوكە ئاشێ خوە ل گوندی ڤەگوهاستیە بۆ دێرەلۆكێ و ئەڤ شەش سالن ئەو ل دێرەلۆكێ كار دكەن.
ناڤهاتی دیار كر، چێكرنا تەحینێ ژ گەلەك قوناغا دەرباز دبیت و كارێ وێ یێ ب زەحمەتە و نوكە پێنج كرێكار ل ئاشێ وان كار دكەن و گۆت: چێكرنا تەحینێ شارەزایی پێدڤێت بۆ وێ یەكێ تاما وێ خوەش دەربچیت و دڤێت باش بهێتە پاقژكرن و قەلاندنا وێ یا دروست بیت.
خویا كر، ئاشێن وان یێ كارەبێ چ جیاوازی نینە ل گەل یێن ئاڤێ و چێدبیت باشتر ژی بیت، چونكو بەرێ ئاشی یێ ئاڤێ دڤێت یێ سڤك بیت و یێ كارەبێ یێ ب سەنگە و چەند بەر ب سەنگ تربیت تەحین لاوتر دەردچیت.
ناڤهاتی ئاشكرا ژی كر، هەكە ئەو بچنە گوندی ژی ئەو دێ هەر ئاشێ كارەبێ دانن ئەو ئاڤا ئەو ئاشی پێ دزڤرینن دێ كارەبێ پێ بەرهەم ئینن دێ باشتر بیت، چونكو نوكە ئامیرەیێن هەین و كار یێ ب ساناهی تر لێ هاتی وەكو بەرێ نینە.
خودانێ ئاشێ تەحیا سەرنی دیار كر، ئەو رۆژانە دورێن 600 بۆ 700 كیلویێن تەحینێ بەرهەم دئینن و گۆت: ژبلی خەلكی دەڤەرێ تەحینا مە دگەهیتە گەلەك جهێن دەڤەرێ، خۆ هەتا ئەورۆپا ژی دچیت.
رێناس نەزیر ، ئێك ژ وان كەسایە یێن خوەست ل سەر تەحینێ هەی بۆ رۆژناما ئەڤرۆ گۆت: هەموو سالان ئەو دو تەنەكێن تەحینێ ژ كونجیێن خوەیێن خوە مالێ بەرهەم دئینن و گۆت: تاما تەحینا وان گەلەك یا خوەشە و ئەو گەلەك ناقەلینن بۆ وێ یەكێ تاما تەحینا وی بەرزە نەبیت.
بەیار یاسین خودانێ ئاشێ دێرەلۆك یێ تەحینێ بۆ رۆژناما ئەڤرۆ دیار كر، ئەوان ئەڤە شەش سالە ئەڤ ئاشە دانای ژ بەر هەبوونا خواستەكا زۆر ل سەر تەحینێ و گۆت: تەحینا مە یا خۆمالی و یا كونجیێن دەڤەرێ یە و ئەو كارێ كونجیێن دەرڤە ناكەن و گۆت: كونجی ل گەلەك وەلاتان دهێت مینا وەلاتێن توركمەنستانێ و ئازەربایجانێ و مسرێ و روسیا و گەلەك وەلاتێن دیتر بەس ئەو ڤان كونجیان تێكەلی كونجیێن دەڤەرێ ناكەن.
دەربارێ قوناغێن دەربازبوونا كونجیان تا دبیتە تەحین ناڤهاتی دیار كر، ل دەستپێكێ ئەو دێ كونجیێ كەنە د بركا ئاڤێ دا تا رۆژا پاشتر و پاشان دێ كەنە جونی و قوتن پاشان دێ چیتە بركا خوێ دا و پاشان دێ هێتە زهاكرن و پاشان دێ هێتە قەلاندن و پاقژكرن و ژ نوو دێ چیتە ئاشی و هێتە هێران و گۆت: وان دو جۆرێن بكران هەنە ئێك خودانێ كونجیانە كو دهێت كونجیێن خوە دكەتە تەحین و یێ دویێ ژی بكرێن دەرڤە و ماركێتن.
