تۆلڤەكرن ژ دەنگدەران
غیاس خـالد زێباری
ژ بۆی هێزێن دیموكراتخواز و باوەردارێن ب سیستەمێ دیموكراسیێ، ئەنجامێن هەلبژارتنا بریارا خەلكی یە و رێز لێ دهێتەگرتن، ئەڤ رێزگرتنە ژی ب دانپێدان ب هەلبژارتناندا دیار دبیت، دانپێدان ب ئەنجامێن هەلبژارتنان رێزگرتنە ل ئیرادەیا خەلكی و رەوشتەكێ سروشتیێ دیموكراسیەتێ و مرۆڤایەیێ یە، هەلبژارتن مینا راپرسیەكێ یە ژلایێ خەلكێ وەلاتی ڤە؛ بۆ هەلسەنگاندنا هێز و ئالیێن سیاسی یێن دەستهەلادار و دەرڤەی دەستهەڵاتێ. هەر هەول و رەفتار و كارڤەدانەكا دژی ئەنجامێن هەلبژارتنان، دچیتە د چارچووڤێ بێرێزیێ دا ل بریارا خەلكی و نەباوەربوونێ ب سیستەمێ دیموكراسیێ، ژبووی هێزێن دەستهەلاتدار ئەڤ رەنگە رەفتارە دچنە چارچووڤەیێ دكتاتۆریەتێ. پشتی هەلبژارتنێن پەرلەمانێ كوردستانێ یێن بەری سالەكێ زێدەتر، هێشتا ئالیێن سیاسی یێن كوردستانێ نەشیاینە بگەهنە چ رێككەفتن و لێتێگەهشتنان بۆ پێكئینانا حوكمەتا هەرێما كوردستانێ، ژبەكو چ ئالی نەشیاینە و پارتی دیموكراتی كورستان ژی وەكی هێزا سەركەفتیا ئێكێ سەرەرای چەندین گەڕێن دانوستاندنان ب تایبەت ل گەل ئێكەتیێ نەشیایە دگەل چ ئالیێن دیتر بگەهیتە رێكەفتنێ، چونكی مەرجێن زۆر زێدەتر ل سەنگا وان، نەهاتنا پێشیا ئێكەتیێ و هندەك ئالیێن دیتر نیشانێ پاشڤەچوونا وانە ب باوەریبوون ب دیموكراسیەتیێ و ئەنجامێن هەلبژارتنا ب تایبەت وێ باوەریا خەلكێ كورستانێ دایە پارتی ب تایبەتتر پشتی وێ سەركەفتنا مەزنا پارتی ل هەلبژارتنێن جڤاتا نوونەرێن ئیراقێ. تشتەكێ نۆڕمالە پشكداری حوكمەتێ ببن یان نە لێ ئەوا نە نۆرمال ئەوە تۆڵڤەكرنێ ل خەلكێ كوردستانێ بكەن، هەر وەكی گەفێن بڕینا ووزێ لسەر خەلكی، ئەو لێدانا شەڤا پێنج شەمبی ل زەڤێن غازا كۆرمۆر كو ژێدەرێ سەرەكیێ كارەبا كوردستانێ ئاماژێن تۆڵڤەكرنا وانە ل وێ باوەریا خەلكێ كوردستانێ دایە پارتی و پرۆژێ رۆناهیا كارەبا بەردەواما حوكمەتا هەرێمێ یە، ئەگەر ئێكەتی ژی نەبیت ئەو كەفێن وان بریارا پێشوەختا دیار دكەن. ئەڤە ژی جهێ مەترسیێ یە و پێتڤییە ئێكەتی بەر پارتی و حوكمەتا هەرێمێ ئەنجامدەرێن ڤێ تاوانێ ئاشكرا بكەن چونكی ل سنوورێ وایە و باوەریا خەلكێ كوردستانێ ب وان دێ لاوازتر بیت، چونكی كارەكێ تیرۆرستیێ مەزنە دژی پێدڤییێن رۆژانە یێن خەلكی و ژێر خانا ئابووریا كوردستانێ و وان كۆمپانیێن جیهانی ئەوێن ل كورڕستانێ كار دكەن. ژلایەكێ دیتر ئەركێ دەولەتا ئیراقێ یە سنوورەكی بۆ ڤان كارێن تیرۆرستی دابنێت و ئەنجامدەر بهێتە دادگەهكرن چونكی بێ رێزیە بەرامبەر سەروەریا وێ و زیانێ دگەهینتە ئابوورێ وێ ژی. پێدڤییە خەلكێ كورستانێ زێدەر برگریێ ل سیستەمێ دیموكراسیێ بكەت و لایەنێن بەڕەڤانكارێن وێ ل گەل دژبەرێن بێ ژێك جودا بكەن و رێكێ نەدەن هیچ لایەنەك ب هێزا خوە خۆ بسەپینیت و هەر دەمێ ڤیان خەلكێ كوردستانێ بێ خزمەت و سامانێن گشتی ب سامانێ تایبەت هژمار بكەت و بكەتە كارتەكا سیاسی.
