گـەلـێ کوردسـتانـێ چـاڤ یێ ل پێکئینانا حوکمەتێ
عەمەر هەرگوشی
هیمەت و هەولێن لایەنێن سیاسی بۆ پێکئینانا حوکمەتێ یا بوویە ئومێدا خەلکێ کوردستانێ و هەمی دخوازن هندی زویکا دەستێ برایەتێ ب ئێخنە ناڤ دەستێ هەڤدۆ، ئەڤرۆ گەلێ کوردستانێ ل سەر ئاستێ تاکە کەسی و ل سەرئاستێ جڤاکی ب ئێک روح و ب ئێک هەز حەز ژ تەبایێ و برایەتیێ دکەن و هەمی حەزکەن ب گیانەکی تەبا ئێکگرتی ل ئاستێ روودانان بن و هاریکار و خەمخۆرێن هەڤدۆ بن، ئەو لافاوا چەمچەمال ژی ئەو خۆشەویستی و رێز و تەباییا د ناڤ گەلێ کوردستانێ دا بوو دیارکر، ژ بەر ڤێ چەندێ لایەنێن سیاسی دڤیا پێش خەلکی بکەڤن بۆ ئێکگرتنێ و تەباییێ چ جاران پلەو پۆست یان بەرژەوندیێن حزبی نە بنە ئاستەنگ د رێکا برایەتیێ و پێکئینانا حوکمەتێ دا.
ئەڤە سال تەمام بوو هێشتا وەلاتیان مووچێ مەها دەه وەرنەگرتیە، گرفتێن زۆرێن ناڤخۆ و دەرڤە یێن مای هلاویستی ل بەند پێکئینانا حوکمەتێ ژبلی هندێ کو گەف و هەرەشەیێن مەزنێ ل سەر دەڤەرێ هەیی و ئەگەر حوکمەتەکا ب هێز و ئێککرتی نەبیت، رەنگە ئالوزی و گرفتێن مەزن ب سەردا بێن.
ئەرکێ لایەنێن سیاسیە د ئاستێ بەرپرسیاتیەتیێ دابن و هەمی خۆ ب خەمخۆر و دلسۆزێن ڤی مللەتی بزانن یێن کو ئیرۆ ژ هەمی دەمەکی پتر پێویستی یاب ئێکرێزی و حوکمەتەکا هەلبژارتیا کوردی هەی کو بشێت ببیتە قەلخانێ پاراستنا گەلێ کوردستانێ و هێزا کاریگەرا پاراستنا مافێن رەوایێن گەلێ مە٠
دەرفەتەکا دیرۆکی و مەزن یا ل پێشیا گەلێ مە ئەگەر هێز و لایەنێن سیاسی تەبابن و ڤێ دەرفەتێ ل دەست نەدەن دێ ناڤەروکی مەزن و دیرۆکەکا پر شانازی بۆ خۆ و بۆ میللەتێ خۆ تۆمار کەن کو چ جاران نا هێتە ژبیر کرن، گوناهەکا مەزنە هەر لایەنەکی کوردی ببیتە ئەگەرێ ژدەسەتدانا ڤان دەلیڤانە و گەراندنەڤا گەلێ کوردستانێ بۆ قۆناغێن بێ ئومێدیێ و تەپەسەریێ.
ڤێ جارێ لایەنێن سیاسی راستەوخۆ دێ کەڤنە سەر مێزانا سەنگ و نرێخێ خۆ ل دەڤ جەماوەری نە خۆزیکە ل ڤی لایەنی یێ ڤێ جارێ گەلێ کوردستانێ نەفرەتان خۆ لێ کەت و پتر ببیتە ئەگەرێ گیرۆکرنا پێکئینانا حوکمەتێ، ڤێ جارێ دۆخێ هەرێمێ جیاوازە و چ هەجەت و بەهانە ئەو نرخ نینە کو ببنە ئەگەرێ ئالۆزیان و لێکترازانا و ب هزارا هەجەت و ئەگەر ژی یێن هەی بۆ ئێکرێزی و ئێکبوونێ، ڤێجا یا ب فەر ئەوە بەری دەستێ بیانیان پتر بکەڤیتە ناڤ کاروبارێن ناڤخۆیێن هەرێمێ بلا کورد ب پشتیوانیکرنا حوکمەتا هەرێمێ رێکێ ل هەمی رەنگێن دەستوەردانێن بیانی بگرن ل ناڤ کاروبارێن نافخۆیێن هەرێمێ٠
نابیت بهێت ژبیرکرن کو پێشی چاڤێن مە ل پشتەڤانی و هەڤکاریا هێزێن دیموکراتخواز و دۆستێن گەلێ کوردستانێ بیت گەرەکە ئەم پشتا خۆ ب خۆ گەرم کەین و چاڤێ مەل ل هاڤکاریا د ناڤبەرا هێزێن کوردستانیدا بیت ئەو هێزێن کو گەلێ مە باوەری و متمانە دای دا بشێن حوکمەتەکا شایستەی خەلکێ کورستانێ پێکبینن٠
