كورد و كلتوورێ هاریكاریێ و رۆلێ راگەهاندنێ
غیاس خـالد زێباری
هەڤكاریكرنا ئێكودو كلتوور و پەشەركێ گرنگیێ مرۆڤایەتیێ یە، ب تایبەت ل دەمێن روودان و كارەساتا، قەدەرا كوردان وەسا بوویە ژبەر روودانێن سیاسی و وێ زۆداریا رژێمێن داگیركار كارەساتێن مەزن بسەر كوردا هاتینە، مینا ئەنفال و كیمیاباران و وێرانكرنا گوندا و ئاوارە و دەربدەبوونێ، لێ ژبەر هەبوونا گیانێ هەڤكاریكرنێ د ناڤ جڤاكا كوردستانێ دا ئەو بارێ گران یێ كەفتیە سەر خێزان و مالباتان هاتیە سڤككرن، هەر وەكی هاریكاریا خەلكێ هەولێرێ بۆ وان خێزانێن كورد یێن لێقەومایی ل ئۆدۆگایێن دەوروبەرێ هەولێرێ ل ئەنفالێن سالا 1988 ب تایبەت یێن بارزانیان و ئەنفالێن بەهدینان و یێن بەری وان ژی، هەر وەسا یێن خێزانێن كیمیابارانكری ل هەلەبجە و دەڤەرێن دیتر، هەڤكاریكرن زۆر د كەڤندا دناڤ جڤاكێ كوردستانی دا هەبوویە چ بۆ چارەسەركرنا ئاریشەیەیان یان ئاڤاكرنا خانی و ژن ئینانێ، یان ژی زبارەكرنێ و هەتا نهۆ ژی یا بەردەوامە، كارەساتا لەهیێن ڤێ دۆماهیێ ل چەمچەماڵ و دەڤەرێن دور و بەر كو زیانێن مەزن گەهاندنە ژمارەكا زۆرا خێزانا، تەكەز كر كو گیانێ هەڤكاریكرنێ دناڤ جڤاكێ كوردستانی دا یێ زیندی یە، چونكی ل دەمژمێر ئێكێ خەلكێ دەڤەرێن كوردستانێ مینا هەولێر و دهۆك و سلێمانیێ و رێكخراوێن خێرخوازی زۆر هەڤكاری بۆ كۆمكرن و گەهاندنە زیان ڤێكەفتیان، ب تایبەت دەزگەهێ خێرخوازیێ بارزانی و روانگەه و كوردستان فاوەندێشن شیان ڤێكارەساتێ زۆر ل سەر وان سڤككبكەن، دڤێرەدا نابیت رۆلێ راگەهاندنێ و سۆشیال میدیایێ بۆ كۆمكرنا هاریكاریا ژبیر بكەین چونكی د رێكا وان را دەنگێ وان گەهشت و زۆر سەرمایەدارێن كوردستانێ ب مەردانە پشكداربوون و ب ملیاران دینار بۆ هاتنە كۆمكرن، ئەڤە ژی جهێ دەستخۆشیێ یە و نیشانێ ئێكگیانی و ئێكرێزیا خەلكێ كوردستانێ . یا جهێ حیبەتیێَ ئەوە هندەك ئالیێن سیاسی پرسا هاریكاریا هندەك دەڤەرا بۆ خەلكێ زیان ڤێكەفتی كرە پرسەكا سیاسی و ئاستەنگ ل هەنبەر گەهاندنا وان دروستكرن، پێدڤیە خەلكێ چەمچەمال و دەڤەرێن دیتر یێن زیان دیتی رێگریێ لهەمبەر ب سیاسیكرنا ڤێ پرسێ بگرن، چونكی جڤاكێ كوردستانێ ئێك جڤاكە و خوەدێ ئێك حوكمەت و دەستهەلاتە و هەڤكاریكرنا ئێكو دوو ئەركەكێ مرۆڤایەتی و نشتیمانی یە، هەر وەسا سەرۆكێ حوكمەتێ رێزدار مەسرور بارزانی هەمی بەرهەمی بۆ هاریكاریكرنا وان تەرخانكرن و سازیێن حوكمەتێ یێن پەیوەندیدار راسپاردن بۆ داربینكرنا پێدڤیێن وان، ئەڤە ژی نیشانێ دلسۆزی و خەمخۆریا جەنابێ وی یە، پێدڤی یە خەلكێ كوردستانێ و سازیێن راگەهاندنێ ب گیانەكێ نشتیمانی سەرەدەریێ لگەل ڤان رەنگە بوویەرا بكەن و حوكمەتا هەرێمێ ژی رێكێ ل دووبارەكرنێ بگرین ئەگەر كێماسی و فاكتەر هەبن.
