یانەیا دینارتێ بڕیارەكا دلخوەشكەر بۆ پشتەڤانێن خوە دەركر و چاڤ ل ناسناڤی یە
رەمەزان زەكەریا
د داخویانیەكێ دا سەرۆكێ یانەیا دینارتە یا وەرزشی ئاشكراكر پشتی كو جەماوەرێ وەرزشی ل دەڤەرا دینارتە دلگران و بێ هیڤی بوون ژبەر بڕیارا پاشەكێشانا تیما خوە یا فوتبۆلێ ژ خولا پلە دویا كوردستانی دای.
زێدەتر ڕەشید جمعا بۆ رۆژنامەیا ئەڤرۆ گۆت: هەموو دزانن كو یانەیا دینارتە خودان دیرۆكەك و جەماوەرەكێ دلسۆزە، بەلێ بارودۆخێ دارایی و نەبوونا چ پشتەڤانیەكا مادی وەكر كو بڕیارەكا ب نەچاری بدەین ئەو ژی خوەڤەكێشان بوو ژ خولا پلە دو یا كوردستانێ. مە نەدڤیا پشكدار بین و نەشێین پێدڤیێن یاریزانان دابین بكەین، لەورا مە ب فەرمی داخازا لێبۆرینێ ژ حەژێكەرێن خۆ كربوو.
ناڤبری گۆتژی: د دەمەكێ دا كو مە هەموو دەرگەهـ ب رویێ خۆ دا گرتی ددیتن، ئەندامێ پەرلەمانێ ئێراقێ د. زیرەك تەیار زێباری وەكو پشتەڤانەك هاتە سەر خەت و نەهێلا خەونا گەنجێن دینارتە ژناڤ بچیت و ب بڕیارەكا مەردانە و خودان دەركەفتنەكا وەرزش دۆستانە، هەموو ئەركێ دارایی یێ یانەیێ ب ستۆیێ خۆ ڤەگرت.
ناڤهاتی گۆت: ئەڤ پشتەڤانیە زەنگەكا ب هێزە كو وەرزشڤانێن مە پشت و پەنایەكا ب هێز هەیە، ئەو بوو ئەگەر كو ئەم بڕیارا خۆ ب گۆڕین و ب روویەكێ گەش و ب ئیرادەیەكا ب هێز ڤەگەڕیێینە ناڤ كێبڕكێیان و پشكداری خولا پلە دو یا كوردستانێ بكەین.
سەرۆكێ یانەیا دینارتە گۆت: یانە دێ دەست ب بەرهەڤیێن باش كەت، سۆزێ ددەینە هەموو پشتەڤانێن یانەیێ كو دینارتە دێ بیتە هەڤڕكەكا ب هێز د خولا پلە دو دا، سوپاسیا پەرلەمانتار د. زیرەك زێباری دكەین كو دەرگەهێ یانەیێ ل سەر گەنجێن خودان شیان ڤەكریە.
هەژی گۆتنێ یە ل 25ێ ئادارا بهێت دێ دەست ب هەڤڕكیێن خولا پلا دو یا كوردستانێ هێتە كرن ئەوا بڕیارە 16 یانە دێ پشكداربن و دێ یاریێن وان ب شێوەیێ خول ئێك قووناغ هێنە كرن چار یانەیێن ڕێزێن پێشیێ دێ دەربازبنە پلا ئێك، یاریێن وان هەر پێنچ رۆژان گەڕەك هێتە كرن.
