ئەڤرۆ پشتەڤانێن زاخۆ چاڤەڕێ شەڤبێریەكا ب ئاهەنگن
چاڤەڕێ دهێتە كرن ئەڤرۆ ل دانێ شەڤێ دو یاریێن مایی ژ هەڤڕكیێن گەڕا 19ێ و دووماهییا قووناغا ئێكێ یا خولا ستێرێن ئیراقێ یا فوتبۆلێ بهێنە كرن، یانەیا زاخۆ دێ مێڤاندارییا یانەیا نەفت كەت و یانەیا كارەبا دێ ل یاریگەها زەورا مێڤاندارییا ئەمانەت بەغدا ل دەمژمێر 11:15 شەڤ كەت.
زاخۆ ب مۆرالا كەنداڤی دێ هێتە دناڤ یاریگەهێ دا
جەماوەر و پشتەڤانێن یانەیا زاخۆ ب ژڤانن ئەڤرۆ د شەڤبیریەكا رەمەزانی دا ل دەمژمێر نەهی شەڤ دناڤا یاریگەهێ دا بەرهەڤبن ژبۆ پشتەڤانییا تیما خوە دەمێ مێڤاندارییا یانەیا نەفت یا بەغدایی دكەت، كوڕێن خابووری ڕێزبەندیەكا دوورە ژ سەرێ لیستێ ئەوێن 30 خال كۆمكرین ل ڕێزا حەفتێ دهێت دەرئەنجامێ هەشت سەركەڤتنان، شەش وەكهەڤی ژلایەكێ دووڤەی چار خوسارەتی هەنە، دڤێ یاریێ دا ئەوا دێ بیتە پێنگاڤا ئێكێ دناڤ ئەردێ خوە دا و یا دویێ پشتی یارییا كۆپا كەنداڤی ڕاهێنەرێ وێ ئەیوب ئۆدیشۆ سەركێشیا تیمێ دكەت، دبەرانبەر یانەیا نەفت یا بەغدایی ئەوا 21 خال هەین و ل ڕێزا 12ێ دهێت نە تیمەكا ب سانەهی یە سەركەڤتن ل سەر بهێت، لێ جەنگاوەرێن زاخۆیا دێ ب مۆرالا سەركەڤتنا یارییا كەنداڤی هێنە د ناڤ یاریگەهێ دا و بەردەوامیێ دەنە پێشڤەچوونا خوە.
ڕاهێنەرێ زاخۆ ڕێزێ ل هەر تیمەكێ دگرین
د كۆنگرەیێ رۆژنامەڤانی یێ بەری یاریێ دا ئەیۆب ئۆدیشۆ ڕاهێنەرێ یانەیا زاخۆ گۆت: خولا ئیراقێ یاری بۆ یاری یا ب هێزتر دكەڤیت و هەڤڕكی بۆ خالان بەردەوامە، تیما مە د نوكە دا ئێكانە یا لبن گڤاشتنێن یارییان دا، ژ هەڤڕكیێن كۆپا كەنداڤی ئێكسەر بۆ خولا ئیراقێ، ژ خولا ئیراقێ بۆ كەنداڤی و بەرۆڤاژی، ل دەرڤەیی وەلاتی ژی یارییان دكەین، ئەڤەژی كارتیكرنێ ل سەر جەستە و دەرۆنێ یاریزانان دكەت و چەندین هنگاڤتن پەیدابووینە، یانە هەبووینە وەكو مە یاری ل دەرڤەیی وەلاتی دكرن لێ یاریێن وان یێن خولا ئیراقێ هاتنە پاشئێخستن و یێن مە دبەردەوامبوون.
ژلایەكێ دووڤە ناڤهاتی گۆت: ئەم ڕێزێ ل هەر یانەیەكێ دگرین و ئەو ژی خودان یاریزانن و ئارمانج هەنە، یارییا ئەڤرۆ ئەڤچارە دگەل نەفتێ ب سانەهی نابیت و ڕێزبەندییا مە یا حەفتێ یە دڤێت ئەم هەلوەستێ خوە باشتر بكەین، ئەم پێدڤی ب سەركەڤتنێ نە بۆ ڤێ ئارمانجێ، ب هیڤی نە ب گەهینە سێ خالان، جەماوەرێ زاخۆ ژ هەژی كەیفخوەشیێ یە.
