یانەیێن پارێزگەهێ د ناڤبەرا هەڤڕكییا پلێتا دەربازبوونێ و پاراستنا مانا خوە د خولێ دا دجەنگن
ب دووماهی هاتنا یاریێن گەڕا 11ێ ژ خولا پلا ئێكا كوردستانێ یا فوتبۆلێ ئەوا پێنچ یانەیێن پارێزگەهێ ژبۆ بزاڤ و ئارمانجێن جودا كەڤتینە دناڤ هەڤڕكییان دا كو بڕیارە پشتی پێنچ گەڕێن دی ئەڤ خولە ب دووماهی بهێت، ئەوا بڕیارە چار یانەیێن ڕێزبەندییا ئێكێ ئێكسەر دەربازبنە پلا نایاب و چارێن دووماهیێ پاشڤەبچنە پلا دو.
دهۆك و سێمێل پلێتێن دەربازبوونێ دڤێن
هەردو یانەیێن دهۆك و سێمێل پتر خوە نێزیكی ب دەستڤە ئینانا پلێتێن دەربازبوونێ بۆ پلا نایابا كوردستانێ دكەن، ئەلهۆیێن چیا د نوكە دا 17 خال كۆمكرینە ل ڕێز چارێ دهێت ژ چار سەركەڤتن، پێنچ وەكهەڤی و خوسارەتیەك هەیە، یاریزانێن وێ 20 گۆل تۆماركرینە و حەفت گۆل هاتینە تۆماركرن.
ژلایێ خوەڤە یانەیا سێمێل یا دناڤ هەڤڕكییان دا ئەوا ب هەمان خالێن دهۆكێ هەنە ل ڕێزا پێنجێ دهێت ژ چار سەركەڤتن، پێنچ وەكهەڤی و دو خوسارەتی هەنە، 19 یاریزانێن وێ تۆماركرینە لێ 16 گۆل ل سەر هاتینە تۆماركرن.
هیڤیێن بەردەڕش د لاوازن
تیما یانەیا بەردەڕەش د نوكە دا 12 خال كۆمكرینە ل ڕێزا 10ێ دهێت ژ سێ سەركەڤتن، سێ وەكهەڤی و چار خوسارەتی، یاریزانێن وێ 12 گۆل تۆماركرینە لێ 15 گۆل ل سەر هاتینە تۆماركرن، لدووڤ ڕێزبەندیێ و یانەیێن پێشییا وێ دبیت هیڤیێن بەردەڕەش د لاوازن بن بۆ دەستڤە ئینانا پلێتەكێ.
تەناهی و شێخان بزاڤێن خوە قورتالكرنێ دكەن
تیما یانەیا تەناهی ئەوا د یارییا بۆریدا تووشی خوسارەتیەكا مەزن بووی دەربەك ب هیڤیێن مانا وێ كەڤتینە لێ بزاڤێن خوە قورتالكرنێ دبەردەوامن ئەوا نوكە ب نەهـ خالان ل ڕێزا 14ێ دهێت ژ دو سەركەڤتن، سێ وەكهەڤی و پێنچ خوسارەتییان، بتنێ هەشت گۆل هەنە و ڕێژەیا مەزنترین گۆلان د خولێ دا ل سەر بوویە كو دگەهنە 21 گۆلان.
ژلایەكێ دووڤە هەلوەستێ یانەیا شێخان ژی باش نینە ئەوا هەشت خال كۆمكرین ل ڕێزا 15ێ دهێت بتنێ ئێك سەركەڤتن، پێنچ وەكهەڤی و چار خوسارەتی هەنە، هەشت گۆل كرینە و 14 گۆل ل سەر هاتینە تۆماركرن.
هەلوەستێ گشتی پشتی ب دووماهی هاتنا یاریێن گەڕا 11ێ.
1- شەقلاوە 26 خال.
2- بابان 22 خال كێمترییا یارییەكێ.
3- زانكۆیا جیهان 20 خال كێمترییا یارییەكێ.
4- دهۆك 17 خال كێمترییا یارییەكێ.
5- سێمێل 17 خال.
6- بازیان 15 خال، كێمترییا یارییەكێ.
7- هەولێر 15 خال، كێمترییا یارییەكێ.
8- كفری 14 خال.
9- كۆیە 14 خال.
10- بەردەڕەش 12 خال، كێمترییا یارییەكێ.
11- خاك 11 خال، كێمترییا یارییەكێ.
12- چەمچەمال 11 خال كێمترییا یارییەكێ.
13- شۆرچە نەهـ خال، كێمترییا یارییەكێ.
14- تەناهی نەهـ خال، كێمترییا یارییەكێ.
15- شێخان هەشت خال، كێمترییا یارییەكێ.
16- سۆران حەفت خال، كێمترییا یارییەكێ.
17- ئاڕاڕات شەش خال، كێمترییا یارییەكێ.
