دهۆك و نەورۆز د دیدارەكا كلاسیكۆیا كوردستانی دانە
قەیس وەیس:
چاڤەڕێ دهێتە كرن ئەڤرۆ دەست ب هەڤڕكیێن گەڕا 20ێ كو دبیتە یارییا ئێكێ ژ قووناغا دویێ یا خولا ستێرێن ئیراقێ یا فوتبۆلێ، یانەیا زاخۆ دێ هەڤڕكیێن ڤێ گەڕێ ڤەكەت ئەوا بڕیارە هەتا دوشەمبییا بهێت ل دووڤ خشتەیەكێ هەموو یاری بهێنە ئەنجامدان.
زاخۆ بەرانبەر ئاستەنگا ئەلغراف
بڕیارە ئەڤرۆ جەماوەرێ وەرزشی یێ یانەیا زاخۆ ل دەمژمێر 9:30 دناڤا یاریگەها خوە ئامادەبیت ژبۆ پشتەڤانییا تیما خوە ئەوا دێ مێڤاندارییا یانەیا ئەلغراف یا باژێرێ ناسرییە كەت كو دهێتە هژمارتن ئێك ژ یاریێن بهێز بۆ كوڕێن خابووری ئەوا هەتا نوكە ل ڕێزا شەشێ دهێت ب كۆمكرنا 34 خالان ژ نەهـ سەركەڤتن، شەش وەكهەڤی و چار خوسارەتی هەنە، یاریزانێن وێ 26 گۆل ئیناینە لێ 15 گۆل ژی ل سەر بووینە، دبەرانبەر دا یانەیا ئەلغراف ئەوا ل ڕێزا نەهێ دهێت ب كۆمكرنا29 خالان دێ ب مۆرالەكا بلند هێتە دناڤ یاریگەهێ دا پشتی سەركەڤتنەكا مەزن یا گەڕا بۆری ل سەر یانەیا دهۆكێ ب 4-3 گۆلان د یارییەكا ماراسۆنی دا، لێ یانەیا زاخۆ ژی د گەڕا بۆری شیابوو سەركەڤتنێ ل سەر نەفتێ بینت و دێ بزاڤێ كەت ئەڤ سەركەڤتنە د بەردەوامبن.
هاتنا ئۆدیشویی گەشبینی بۆ كۆپا كەنداڤی ژی جێكرییە
پشتی هاتنا ئەیۆب ئۆدیشۆ بۆ سەرپەرشتییا ڕاهێنەراتییا یانەیا زاخۆ شیان دو سەركەڤتنا ل دووڤ ئێك د خولا ستێرێن ئیراقێ دا بینیت بینیت دگەل هەولێرێ 1-چنە، و دگەل نەفتێ 2-چنە و تیمێ پێشبیخینە ڕێزا شەشێ، د كۆپا كەنداڤی دا سەركەڤتن ل سەر سیترە یا بەحرێنی ئینابوو ب گۆلەكێ و دەربازبووینە قووناغا چارگۆشەیا زێرین، ژبلی گەشبینی د خولا ئیراقێ دا جەماوەر گەشبینە د كۆپا كەنداڤی ژی دا بشێن دەستكەڤتەكی ژی بینن.
دهۆك و نەورۆز د كلاسیكۆیەكا كوردستانی دا
ل دووڤ خشتەیێ هاتیە بەڤكرن، بڕیارە ل دوشەمبییا بهێت تیما یانەیا دهۆك د ناڤ ئەرد و جەماوەرێ خوە دا مێڤاندارییا یانەیا نەورۆز بكەت د كلاسیكۆیەكا كوردستانی دا ئەوا دهێتە چاڤەڕێ كرن ل دەمژمێر نەهی شەڤ جەماوەرەكێ ئێكجار زوور بەرهەڤبیت، ئەلهۆیێن چیا ل ڕێزا 11ێ دهێت ب27 خالان ژ حەفت سەركەڤتن، شەش وەكهەڤی و شەش خوسارەتی هەنە، یاریزانێن وێ 22 گۆل تۆماركرینە و 18 گۆل ل سەر تیمێ هاتینە تۆماركرن، د بەرانبەر دا نەورۆز ل ڕێزا 12ێ ب كۆمكرنا 22 خالان ژ حەفت سەركەڤتنان، ئێك وەكهەڤی و 11 خوسارەتییان، 21 گۆلان تۆماربكەن لێ 26 گۆل ل سەر هاتینە تۆماركرن، ئەڤ یارییە یا ب سانەهی نابیت بۆ هەردو تیمان لێ پشتەڤانێن ئەلهۆیێن چیا ژ تیمێ د تۆرەنە و دڤێت ب سەركەڤتنێ بهێنە ئاشتكرن.
ڕاهێنەرێ دهۆكێ بۆ سەركەڤتنێ ب هیڤییە
عەبدولغەنی شەهەد ڕاهێنەرێ یانەیا دهۆكێ گەشبینە بۆ یارییا ڤێ حەفتیێ تیم ب هێز ڤەگەڕیت و قەرەبوویا خالێن یارییا بۆری بكەت، دهێتە گۆتن ستێرا تیمێ و دینامۆیێ ناڤا یاریگەهێ دا هارۆن ئەحمەد یێ بەرهەڤبیت ئەڤەژی دەنگۆیەكێ دلخوەشكەر لێ پشتراست نەبوویە، چەكێ هەرە باش یێ ئەلهۆیێن چیا پشتەڤانێن وێ یە، لێ یانەیا نەورۆز ژی تیمەكا سەردەمانەیە و هەڤڕكە بۆ هەر تیمەكا دی.
هەولێر دێ دیالا مێڤان كەت
ل شەفا ئێكشەمبییا بهێت دەمژمێر 11:15 شەڤ تیما یانەیا هەولێرێ دێ ل یاریگەها شەهید فرانسۆ حەریری مێڤان یانەیا دیالا كەت، هەولێر ل ڕێزا چارێ ب 37 خالان ژ 11 سەركەڤتنان، چار وەكهەڤی و چار خوسارەتییان، یاریزانێن وێ 24 گۆل هەنە و 16 گۆل ل سەر هاتینە تۆماركرن، ژلایێ خوەڤە یانەیا دیالا ل ڕێزا 11ێ دهێت ب كۆمكرنا 27 خالان.
ژ یاریێن دی یێن ڤێ گەڕێ
رۆژا شەمبی 28-2-2025ێ
نەفت میسان- تەلەبە، دەمژمێر نەهێ شەڤێ
ئەلقاسم- كەرخ، ل دەمژمێر نەهی شەڤێ.
جەوییە- نەجەف، ل دەمژمێر 11:15 شەڤ.
رۆژا ئێكشەمبی 1-3-2026ێ
مینا- ئەلگەرمە، دەمژمێر نەهی شەڤ.
ئەمانەت بەغدا- نەفت، نەهی شەڤ.
رۆژا دوشەمبی 2-3-2026ی
شورتە- كارەبا، ل دەمژمێر نەهی شەڤ.
زەورا- مووسل، دەمژمێر 11:15 شەڤ.
هەلوەستێ گشتی بەری دەستپێكرنا گەڕا 20ێ ژ خولێ.
1- جەوییە 43 خال.
2- شورتە 38 خال كێمترییا دو یارییان.
3- ئەلگەرمە 38 خال.
4- هەولێر 37 خال.
5- تەلەبە 34 خال.
6- زاخۆ 33 خال.
7- زەورا 31 خال و كێمترییا دو یارییان.
8- كەرخ 31 خال.
9- ئەلغراف 29 خال.
10- دیالا 28 خال.
11- دهۆك 27 خال.
12- نەورۆز 22 خال.
13- مووسل 22 خال.
14- ئەمانەت بەغدا 21 خال كێمترییا یارییەكێ.
15- نەفت 21 خال، كێمترییا یارییەكێ.
16- كارەبا 18 خال.
17- مینا 18 خال.
18- نەفت میسان 16 خال.
19- نەجەف هەشت خال.
20- ئەلقاسم دو خال.
