د. سارا تەلایی: کەڤالێن من هەلگرێن پەیامێن هەمەجۆرن
زاخۆ، دلۆڤان:
هونەرمەندا شێوەکار د. سارا تەلایی د دیدارەکێ دا بۆ ڕۆژناما ئەڤرۆ دیارکر کو هەر ل ژیێ زاڕۆکینیێ حەز و هیڤیا من نەخشاندنا کەڤالان بوو، لەوما ڕۆژ بۆ ڕۆژێ حەزا هونەرێ شێوەکاری ل دەف من زێدەبوو، پشتی کو ئەز مەزن بوویم هەر ل سەر ڤێ چەندێ بەردەوام بووم هەتا کو من کۆلیژا هونەرێن جوان خواندی و پاشان باوەرناما دکتۆرایێ ب هونەرێ شێوەکاری ب دەستخوەڤە ئینایی.
ناڤهاتیێ ئاماژە ب وێ چەندێ ژی کر کو هەتا نوکە من پشکداری د سەد پێشانگەهێن شێوەکاری یێن تایبەت و هەڤپشك دا کرینە، و بۆ دەمێ نەهـ سالان ئەز مامۆستایا ڕاهێنانێن هونەری و سەرپەرشتا بەشێن هونەری بووم ل دەزگەهێن ڕەوشەنبیری یێن زانکۆیان، و من چار پەرتووکێن چاپ کری د بیاڤێن هونەری و مێژوویی دا هەنە وەکو هونەرێ نەخشاندنێ و زانستێ نەخش و ڕەنگان، گڕافیك و کورد د نەخشەیێن شینواری دا.
هونەرمەندا شێوەکار د. سارا تەلایی دبێژیت:»ئەز پتر وان کەڤالان دروست دکەم یێن کو دەربڕینێ ژ شۆڕەشێ بکەت کو د ناخێ مرۆڤی دا ڕوودا بیت، و
کەڤالێن من هەلگرێ پەیامێن چەندین بابەتێن هەمەجۆرن وەکو جوانیا ژین و ژیانێ و ئاشتی و ئاڤەدانی و ئەڤینی و ئارامی و ژن و ئازادی و نیشتیمانی».
گۆت ژی:»هونەرەکێ باش ژ ناخێ هونەرمەندەکێ ڕاستگۆ و ڕەسەن دەردکەڤیت، لەورا دڤێت هونەرمەند هەستێ خوە یێ ڕاست ب ڕەنگان دانیتە سەر کەڤالان و ب ڤێ ڕێکێ خزمەتا گەل و وەلاتێ خوە بکەت، ل هەر جهەکێ چالاکیەکا هونەری هەبیت و ڕێزێ ل هونەرێ من بگریت ئەز دێ ب خوەشحالی ڤە پێشوازیێ لێ کەم و تێدا پشکداربم».
زێدەتر ژی گۆت:»ئەز خودانا شێوازێ خوە یێ تایبەت و تەکنیکا خوە یا جوودا مە و ئەز بخوە ڕەنگان دورست دکەم، و ژبلی هونەرێ شێوەکاری من شارەزایی د چەندین بیاڤێن دی دا هەیە وەکو پەیکەرسازی و نەخشاندنا ل سەر بەران و گرافیك و چاپا دەستی و هەلبەست و ڤەکۆلینێن مێژوویی، و د نوکە ژی دا ئەز مژوولی پڕۆژەیەکێ مێژوویی مە ل سەر بەرێن گران بها».
