ژبەر دهۆك تیڤی خەلك رێزێ ل مە دگرن
دلۆڤان هالۆ
مەدیاكار (هەیوار ستار نهێلی) د دیدارەكێ دا بۆ رۆژنامەیا ئەڤرۆ گۆت: ئەز دەرچۆیێ پشكا رۆژنامەڤانیا ئەلكترۆنی مە ل كولیژا تەكنیكی و كارگێڕی ل زانكۆیا پولیتەكنیكی یا دهۆكێ، وێستەگەها من یا ئێكێ ل ناڤەندا خانی یا رەوشەنبیری بوو ل (ئاژانسا خانی) من وەكو پەیامنێر كاردكر ل قەزا ئامێدیێ، پاشان چوومە تەلەفزیۆنا دهۆك و ئەڤە شەش سالن وەكو پەیامنێر ل كەنالێ ناڤهاتی یێ بەردەوامم.
هەروەسا گۆت: من راگەهاندن هەلبژارت دا كو بشێم خزمەتێ بكەم و پەیاما مللەتێ خۆ و خەلكەكی بگەهینم، ئانكو دا ببمە پرەك دناڤبەرا خەلكی و دەستهەلاتێ دا و داخوازی و گازندەیێن وان ب مەرەما چارەسەریێ بگەهینم، ل دەف من دهۆك تیڤی تەلەفزیۆنا دایكە و خزمەتا هەموو دەڤەران بەهدینان كریە، لەورا دەمێ ئەم دچینە جهەكی خەلك ژ بەرناڤێ دهۆك تیڤی رێزێ ل مەدگرن و راگەهاندن گەهاندنا پەیامانە ب رێكا ئالاڤیێن هەین مەدیاكار دشێت وێ پەیامێ بگەهینیت و هەستەكێ خۆشە دەمێ مرۆڤ دشێت پەیاما خەلكەكی بگەهینیت و یا ژوێ خۆشتر ئەوە دەمێ ل دووف داخوازیا مە دهێن و ئەو بابەت چارەسەر دبیت.
