ئەز و ئەور پێك ناكەین
عزەت یوسف
ئەور و د زمانێ تە ناگەهین!… سەرێ مە د وێنەیێن تە دەرناكەڤیت…
جار تۆ یێ گۆڕگۆڕی، جار بێدەنگی…جار پەردا گوهی دپەقینی، جار ژی كەڕ و ڵالی… جار ئاڤزی و تژی ئاڤی، جار ژی زوهای و هشكی…جار باران و بەفر ژ تە دباریت، ل ئەردی لەهی و لافاو ڕادبن و گوند و باژێر وێران دبن، جار ژی یێ دێمی چپكەكا بارانێ بۆ مرادێ ژی ژ تە دەرناكەڤیت تەیڕ و تەوال دمێ خۆ پێ تەڕ بكەن، رێڤینگ و كاروانی كەلەتێنیا خۆ بشكێنن…جار تەڕگا خۆ دادرێژی و بەرێ چەم و رەزان دادقوتی، سەرێ سیار و پەیا دكەیە سیڤۆك و دشكینی، جار بتنێ بەرتڤكەكی ژی داناوەشینی..
وێنەیێن تە ئەورو د ئەنتیكەنە، جار سەرێ دەهبەیە و جار گزیرتەیە…جار یێ دلڤەكەرە و دكەنیت جار یێ دلگرتیە و دگریت… جار خاروڤیچی، جار خڕومری.. جار یێ كرێتی و جار هندێ جوانی باشە چاڤین نابی، لەوا جار من دڤێت تە ببینم، جار ژی من نەڤێت هەر ل وارا بمینم… تۆ نابێژیە من تۆ چی؟
رەنگێن تە ئەور و ئەو ژی هەر وەكی تەنە، جار یێ شینوكەی…جار یێ رەش و رەشتەعلەی و جیهانێ ل من تاری دكەی، جار ژی یێ سپی و سپیتالكی بەفر ژ تە دباریت و شەوقێ ددەی، جار ژی یێ نیڤ نیڤەی..
جار تۆ یێ پەڕش و بەلاڤ و پنی و پرتی و فرتی، جار گونتلی و موكوم و ئێكگرتی.
جار داڤێن رۆژێ و تاڤا هەیڤێ تە دسمیت، جار ژی خۆراگری.
جار یێ نزم و شۆڕی، جار ژی یێ بلند و بەر بژۆری.
جار ئەورێ پەشیمان و پەریشانایی، جار كەس نزانیت كا تۆ هەیی یان نەیی.
جار تۆ یێ بلەز و بەزی، جار ژی یێ گیرۆیی و ب تۆپا نالڤی.
جار د جهدا بتی و جار ل چ جها ناتەبتی.
ئەور و ئەز و تۆ پێك ناكەین، تۆ نە خۆدان سۆزی…دەمێ تۆ یێ گران و رەش و شۆڕی ئەز سیهوانكا خۆ ڤەددەم، لێ تۆ ناباری، لێ دەمێ ئەز سیهوانكا خۆ دپێچم تۆ دباری و دەزیێ زوها ل بەر من ناهێلی!!
نە ئەور و ئەز تە ناگەهم، ئەز و تۆ پێك ناكەین، تۆ هەرجار ب ستایلەكی خۆ دگوهۆڕی!
