كارێ ب كۆم سەردكەڤیت
ئیحسان حەسەن
د هەر كارەكی دا هەردەم بڕیارێن ب كۆم باشترین ڕێكە بۆ سەركەڤتنێ، بەروڤاژی وێ ئەو پرۆسا كار پێ دهێتە برێڤەبرن، دێ یا ئالۆز بیت و رەنگە نەگەهیتە چ ئارمانجێن دلخوشكەر، د یانەیان دا ب تایبەت دیاریا فوتبۆلێ دا سیستەمێ كاركرنێ تمامكرێ ئێكە هەر ژ یاریزانی هەتا دگەهیتە راهێنەری و كارگێری، هەموو ب ئێك ئارمانج كار دكەن، ئەگەر بڕیارێن گرێدای ڤێ یاریێ بەرۆڤاژی كارێ كوم بێهنە برێڤەبرن، ئەنجام دێ هەبن بەلێ دێ بەرۆڤاژی هیڤییان بن، د كوردەواریێ دا ژی یا هاتیە گۆتن دەستەكێ ب تنێ دەنگ ژێ ناهێت، داكو ئەز ژ ناڤەرۆكا بابەتی دەرنەكەڤم و وێ بیرۆكەیا دخوازم بگەهینمە خواندەڤانی، د گوتارا ڤێ حەڤتییێ دا مە نەڤێت ئەز فوكسا خوە بێخمە لسەر پشكداریا هەر چار یانەیێن كوردستانێ د خولا ستێرێن ئیراقێ دا یان بەحسێ خولا كوردستانێ بكەم، شرۆڤێ بدەمە كاروان و ئاستێ وان یێ تەكتیكی و تەكنیكی، دیسان ئەو ئاستەنگ و شاشیێن تا نها كەڤتینە تێدا، ئەز ناهێم بەلگەیا بینم كا بۆچی ئەڤ یانە یا سەركەڤتی یە، بۆ چی یانەیا دی یا پاشكەڤتی یە، بەلكو سەركەڤتن و بدەستڤە ئینانا ئەنجامان یا گرێدای بەرهەڤییا راست و دروستە ژ هەموو لایەكی ڤە، ژبلی پشتەڤانی و بەرنامەیەكێ رێكوپێك و بڕیاردانێ یە، لەوما تنێ دێ ئامۆژكاریەكێ پێشكێشی هەر كەسەكێ كەم ئەگەر ژمن قەبوول بكەن، ب تایبەت یێن كو داخوازا سەركەڤتنێ و بدەستڤەئینانا قارەمانیان دكەن، ب تایبەتی قارەمانیێن مەزن، داخوازێ ژێ دكەم كو پشتا خوە ب بۆچوونێن كۆم گەرم بكەن وەك بنەمایەك جێگیر بۆ برێڤەبرنا كارۆبارێن یانەیێ و كار پێ بكەن، ب دیتنا من ئەڤ باشترین رێكە چارەیە كو ببیتە ئەگەرێ نەهێلانا كێشیان و دوور كەڤتنێ ژ وان ئالۆزی و ئاریشەیان ئەوێن دكەڤنە درێكا كارگێریێ دا، بەلێ لڤێرە پرسیار ئەوە ئەرێ ئەوێن تا نها د ئەرك و بەرپرسیارەتیێن خوە دا سەرنەكەڤتین یان هەست دكەن كو نەشیاینە بگەهنە وێ ئارمانجێ ئەوا وان بخوە دانای، دێ گوهێ خوە دەنە ڤێ ئامۆژگاریێ، یان دێ هەر خوە مەزنتر بینن، ئەز نوزانم ئەز یێ ب هیڤی مە ببینم لدووڤ ڤێ بیرۆكێ بچن داكو یانەیێن مە یێن وەرزشی بهێز و سەركەڤتی بریارێن خوە یێن كۆم بدەن و وەبكەن كو پشتگیریا دارایی یا پشتەڤان و لایەنگرێن خوە یا بەردەوام بیت، یا من دڤێت بێژم ب گورەیی ئەوا ئەم دبینین، ئەڤە بەنگوازییە بۆ هەموو كارگێرێن یانەیان و بێ جوداهی، یان دێ بەر ب بریارێن ب كۆم چن وەكو رێكا چارەسەریێ، یان ژی دێ تاكە كەسی كاركەن و بێ ئەنجام بن، ژبەر كو یانەیا مەزن ئەو نینە یا ناڤێن مەزن كۆم دكەت، بەلكو ئەو یانەیە یا دزانیت دێ چەوا كارێ خوە ب بریارەكا گشتی رێك ئێخیت، ژبەر كو دیرۆكێ هووسا نیشا مەدایە كو یانەیێن مەزنێن جیهانێ، نە تنێ كو یاریزانێن باش هەنە سەركەڤتی بووینە، بەلكو سیستەمێ كارێ ب كۆم یێ بهێز هەیە كو هەموویان پێكڤە دئێخیتە قالبێ سەركەڤتنێ دا.
