خـۆڕاگری و هەلوەستێ نەگـۆڕ یێ كـوردان د شـەڕێ ئـەمریكا و ئیرانـێ دا
نایف مەحموود
هەرێما كوردستانێ ئەو پارچەیا ب دەولەتا ئیراقێ ڤە هاتیە بەستن، جودا ژ هەمی پارچێن دی یێن كوردستانێ تایبەتمەندیا خۆ هەیە، هەر چەندە خاستا كوردان ئەڤە نەبوویە كو ئەڤرۆ ب ڤی ڕەنگی وێنە بكەین و جوداهیێ د ناڤبەرا پارچێن كوردستانێ دا بكەین، لێ ئەڤە وەكو ئەو واقعێ ب زۆری و كوتەكی ل سەر كوردان هاتیە سەپاندن و هاتینە ژێكڤەكرن. گەر ڕەهەندێ دیرۆكی یێ ڤی بەشێ كوردستانێ بینینە زمان و چەند ڕاستیەكان دیار بكەین دێ بۆ مە خۆیا بیت كو سەركردایەتیا سیاسی یا كوردی هەر ل سەر دەمێ شێخ عەبدولسەلام بارزانی، مەلا مستەفا بارزانی و هەتا ئەڤرۆ كاروانێ وێ سەركردایەتیێ ب سەركێشیا سەرۆك بارزانی وەك لێڤەگەر و بەراهیێ كوردان، نێچیرڤان بارزانی وەك كارێزمایێ ڕاگەهاندن و بەرپاكرنا ئاشتیێ، مەسرۆر بارزانی وەكو كارەكتەر و چەڤەنگێ خۆڕاگری و ئاڤەدانیێ شیاینە دۆزا ڕەوایا گەلێ كوردستانێ د وێستگەه و قووناغێن جودا جودا دا بگەهیننە ئارمانجێن وێ یێن نەتەوەیی و نیشتمانی، شیاینە بۆ هەر قووناغەكێ ب سیاسەتەكا حەكیمانە مللەتێ كورد ژ پیلان و شەڕەنگێزیا دوژمنان بپارێزن، هەتا ڕادەیەكێ باش كوردان بگەهیننە كەنارێ ئازادی و ئارامیێ، نەكو ئەڤە ژ ڤالاهیەكێ نەهاتیە و كەسێ ژی ب بەرمنەت و ب قەر نەدایە مە، بەلی بەرهەمێ ڤەڕێژا وێ حیكمەت و خەبات و قۆربانیدانێ بوویە و تا نوكە ل بەر ڕۆناهیا ڤێ سیاسەتا سەركەفتی ل سەر پێت خۆینە، د كوردستانەكا ئاڤا و تەنا ڤە ژیانێ دشۆپینین. یا گرنگ و پێدڤی ب هەلوەستەكرنێ ئەوە ئەڤ شەڕێ د ناڤبەرا ڤان هەردو جەمسەران دا ڕووی دای ژ وی شەڕێ ١٢ ڕۆژی ئەوێ ل ١٣ی خزیرانا سالا ٢٠٢٥ بەرپا بووی د ناڤبەرا وەلاتێ ئیسرائیلێ و ئیرانێ ب پشتەڤانیا وەلاتێ ئەمریكا دژی ڕژێما ئیرانێ، هەروەسا ئەڤ شەڕێ ل ٢٨ی سباتا ئەڤ سالە دوبارە دەستپێكریە ڤە د ناڤبەرا ڤان وەلاتان دا، كوردان هەر ژ دەستپێكێ ڕەتكرنا شەڕی ڕاگەهاند و داخوازا ئاشتیێ كر، مێزا دان و ستاندن و ڕێكەفتنێ وەك باشترین چارەسەری ل قەلەمدا و خۆ ژ ڤێ ڕەوشا نالەبار دوورخست و نەچوونە ناڤ ڤێ گەمەیا سیاسی و ڤێ یاریێ دا، بەلكی ب حوكمێ ژیرانە یێ ڕێبەر و بەرپرسێن كوردان ئەڤ هەڤسەنگیە ڕاگرت، خۆ تالۆقەتی ڤی شەڕی نەكر. لەوما یا پێدڤیە ڤێ چەندێ بەرز و بلند بنرخینین و ڤێ سیاسەتێ باش بپەژرینین. بێگۆمان سەرەدەری و تێفكرینا كوردان د بازنەیێ ڤی شەڕی دا چ دگەهینیت و چ پیڤەرێن سیاسی و دیپلۆماسی كورد ژ كریسكێن ڤی ئاگری پاراستن؟ هەلبەت خۆیا و ئاشكەرایە ڕۆلێ سەركردایەتیا سیاسی یا كوردی و خۆدویركرن ژ لایەنگیریێ بۆ هیچ جەمسەرەكی، خۆ ڤەدەركرن ژ هەر تاگیریەكێ، نەچوونا پال داخوازی و ئەجێندایێن هیچ لایەنەكی، بەلكی بەرۆڤاژی یا كوردان ڤیای خۆ پارستن و خۆڕزگاركرن ژ هەر پێشهاتەكا خراب و نەچاڤەڕێكری كو كارتێكرنێ ل سەر قەوارە و ئەمن و ئاسایشا كوردستانێ بكەت. هەر دیسا خۆڕاگری و هەلوەستێ نەگۆڕێ كوردان بەرانبەر وێ بڕیارا سەربەخۆ یا ئەو پەیرەو دكەن و دویر ژ بڕیارێن عاتفی و نە لۆژیكی، هەروەسا سەرۆك و ڕێبەرێن گەلێ كوردستانێ كارین ڤێ گەڕێ ژی ئاخا كوردستانێ و خەلكێ كوردستانێ ژ وێ ئاگرێ مەزنێ ل دۆرمانێن مە هەلبووی بپارێزن، لێ سەرەڕای گەلەك ژ وان سیناریۆ و پیلانێن دوژمنان ب ڕێكا هندەك میلیشیات و گرۆپ و ژ یاسادەرچوویان كو دڤیا ڕەوشا كوردستانێ تێكبدەن و مە ژی تێكەلی ڤی شەڕێ نەخاستی بكەن، ڤێجا ب هەر ڕێكا بیت پلانێن خۆ ب ڕێكا تەقاندنا دڕۆن و مۆشەكان ل سەر ئاخا كوردستانێ جێبجێكرن داكو ئەڤێ ڕەوشێ جاردن ئالۆز بكەن و هندەك ژ مەرەمێن خۆ یێن چەپەل ب پێكن، بەس بەرانبەر ڤان پیلان و سیناریۆیێن تژی ژەنگ و قڕێژگرتی، ئارام ڕاگرتن و وی هەلوەستێ نەگۆڕ، كورد شیان ب ڤێ دیپلۆماسیەتێ هەمی مین و بۆسە و تەلهێن وان پوچەل بكەن و بچەقینن بێی زیانەكا وەها بەر ب كوردستانێ بكەڤیت، لێ خۆشبەختانە و یا جهێ ئومێدا هەمی خەلكێ كوردستانێ ئەو بوویە نەیارێن كوردستانێ نەشیان كوردان پەلكێشی ڤی شەڕی بكەن ژ بۆ هندێ ڤێ سەقامگێریا هەی جارەكا دی تێكبدەن و بەرێ وێ دوكێل و ڕەشەبایێ شەڕێ وێرانكەر بدەنە هەرێما كوردستانێ، تاكو ئەڤ وەلاتێ خۆش و شرین ببیتە گۆرەپانا شەڕی ڤە و بكەڤیتە د گۆما كارەسات و مالوێرانیێ دا، لێ ل دوماهیێ و حەتا ڕاگەهاندنا ئاگربەستا ڤێ داویێ، كورد شیان سەركەفتیانە و ب كێمترین زیان و زەرەر ژ ڤی بارودۆخێ نەخۆش دەركەڤن، پێگەهێ كوردستانێ و قەوارێ دەستووری یێ هەرێما كوردستانێ پاراستی مان، ژبەر ڤێ چەندێ وەسا دهێتە زانین كو ئاسۆیێن گەشتر چاڤەڕێی پاشەڕۆژا كوردستانێ دكەن و درۆن و مۆشەكێن نەیاران ژی دێ ب سەروچاڤێن وان ب خۆڤە پەقن، ئەڤ وەلاتەژی ب سایا ڤێ سیاسەتا ژیرانە و ڤێ خۆڕاگریێ دێ هەر یا سەقامگیر و تەنا و ئارام بیت.
