ڤار و كوشتنا دەمی
ئیحسان حەسەن
دگەل دەستپێكرنا تەكنۆلۆژیا ڤارێ (VAR)د ناڤ سیستەمێ دادڤانییا یاریا فوتبۆلێ دا، گەلەك هیڤی هەبوون كو ئەڤ تەكنۆلۆژیا جیهانی ببیتە هاریكار بۆ دادڤانێن مە یێن خولا ستێرێن ئیراقێ كو دادپەروەریەكا تمام د ناڤبەرا تیمێن پشكدار و هەڤرك دا بكەن، لێ ب مخابنی ڤە بۆ ئەگەرێ پتر پەیداكرنا شاشییان و نەرازیبوونێن مەزن ژلایێ كارگێر و راهێنەر و یاریزانان ڤە، دیسان بوویە ئەگەرێ ژناڤبرنا خوشییێ بۆ جەماوەر و حەز ژێكەرێن فوتبۆلێ چ یێن ئامادە د یاریان دا دیسان یێن ل پشت شاشەیێن تەلەفزیونێ، ئێدی هەست ب بها و رۆل و كەسایەتییا بهێز یا دادڤانی ناهێتە كرن، وەكو دادوەرەكێ خودان بریار دناڤ یاریگەهێ دا، هەروەسا خوشییا یاریێ ئێكجار نەمایە ژبەرراوەستاندنێن یاریێ و ڤەگەریان بۆ ڤارێ بۆ هەر تشتەكێ بچووك و مەزن لسەر داخوازا یاریزانان یێن كو بەردەوام لدووڤ دادڤانی دكەڤن بۆ هە شاشییەكێ و داخوازا ڤارێ ژێ دكەن، ژبلی ئەو نەتێگەهشتن و دیسان باوەری بخوەنەبوون یا دانا بریارێ چ ژلایێ دادڤانێ نیڤا یاریگەهێ، هەروەسا یێ ڤارێ بۆ هەر رەوشەكێ، كو دبنە ئەگەرێ ساربوونا سەقایێ هەڤركییێ، ددەمەكی دا كو ئێكەتییا دەولەتی فیفا بەردەوام شەری لسەر هندێ دكەت كو ئەڤ سیستەمە نەبیتە ئەگەرێ بەرزەكرنا دەمی، پرسیار لڤێرە ئەوە ئەرێ هێشتا زوو بوو ئەڤ سیستەمە بگەهیتە ئیراقێ ، یان پێدڤی ب دەمەكێ زێدەتر بوون داكو بزانین كا دێ چەوا ل میكانزما كارێ ڤی سیستەمی گەهن، یان دادڤانێن مە پتر پێدڤیی نە كو باوەریێ بدەنە خوە و ب وێرەكی بریارێن خوە بدەن و كێم بچنە ڤارێ، ژبەر كو ئەوا نها ئەم دیبینین ژبلی بریارێن شاش و لاوازییا برێڤەبرنا یاریان ژلایێ دادڤانییا خولێ و وان تیبینێن دی یێن كو لسەر هەین، بۆ هەر رەوشەكێ هندەك جاران پتر ژ 10 خولەكان یاری دهێتە راوەستاندن، ئەڤ رەوشە یا بەردەوامە و فیدراسیونا ئیراقێ یا بێ دەنگە، ئەز دبێژم هوون هەمی دگەل ڤێ بۆچوونێ نە، كو ئەوا نها ئەم دبینم دیمەنێن نەشارستانی نە و ئەز باوەرناكەم بڤی رەنگێ نها، چ خولێن دی لسەرانسەری جیهانێ هەبن، ژبەر كو زێدەبوونا نەرازیبوونان و دەركەڤتنا بەیانامەیێن زوور لڤێ داویێ ژلایێ یانەیان ڤە، لبەر ڤان شاشیێن بەردەوام یێن كو دادڤانێن خولێ دكەڤنێ، كارتێكرنێ لسەر ئەنجامێن یاریان دكەن، پێدڤی ب هەلویستەكێ ئاشكرا و روون و پێنگاڤێن پراكتیكی ژلایێ فێدراسیونا فوتبۆلا ئیراقێ هەیە، داكو هەر تیمەك بگەهیتە مافێ خوە و هەڤركییا پاقژ بهێتە پاراستن، دیسان شكویا دادڤانان یێ ناسیار ب خودانێ یاریگەهێ بهێتەچەسپاندن، ئەڤە ژی دێ هووسا هیتە بجهئینان ئەگەر دادڤانێن لاواز و بێ كەسایەتییا بهێز بهێنە سزادان و دووركرن ژ خولێ، دیسان دادڤانێن ڤارێ ژی بەردەوام پشكداریێ دخولێن بهێزكرن و فێربوونا ڤی سیستەمێ نوو بكەن، ژبەر كو ئەوا نها ئەم دبینین، تنێ دادڤانییا یاریا فوتبۆلێ نینە و خودێ هاریكارێ مە هەمییان بیت.
