ڕێكێن سەركەڤتنێ د خولا ئیراقێ دا
ئیحسان حەسەن
خولا ستێرێن ئیراقێ یا فوتبۆلێ گەهشتە قووناغێن داویێ و دیار گورانكاریێن بەر چاڤ ب خوەڤە دبینیت، هندەك تیم هەنە نها بوونە هەڤركیێن سەرەكی لسەر هەر سێ رێزێن پێشییێ و وەرگرتنا پلێتێن پشكداریێ دقارەمانیێن ئاسیا و یێن كەنداڤی دا، هندەكێن دژی لبن مەترسییا داكەڤتنێ نە بۆ خولا نزمتر، هژمارەوكا دی ژی نها ل رێزبەندیێن نیڤێ هاتن و چوونێ دكەن و تا رادەیەكی مانا خوە دخولێ دا مسوگەركرینە، ئەڤ داینامیكیەتە سرۆشتی خولا ڤی وەرزی دا دیاردكەت، یێ كو بەرێ خوە دایە رەوشا خولا ڤی وەرزی یانەیێن پشكدار دیارە هێزا وان ڤەدگەریێتە لسەر چەند خالێن سەرەكی، گرنكترینا وان هێزا دارایی یە، ئانكو ئەو یانەیێن شیاین یاریزانێن خودان بەهرە و راهێنەرێن خودان ئەزموون راكێشن، دەلیڤەیان بۆ هەڤركییێ لسەر ناسناڤان زێدەتر لێكریە، ژبەر كو دشێن پێداویستیێن خوە ژ یاریزانێن نافخو و یێن بیانی دابین بكەن، ئەڤە رامانا هندێ نادەت كو تنێ پارە دشێت ناسناڤان بۆ یانەیێ بدەستڤە بینیت، بەلكو هەلبژارتنا دروست خالەكا هەرا گرنگە ژبۆ بجه ئینانا هیڤییان و پشكداریەكا سەرفەرازتر، هەروەسا نابیت ئەم جێگیریا كارگێریێ ژ دەستەكا راهێنانێ دیسان سەرپەرشتێن تیمێ ژی ژبیر بكەین، ئەو یانەیێن كارگێریێن وان پتر نێزیكی تیمێن خوە و ئارمانجێن خوە دەستنیشانكرین و خودان هزرێن ستراتیژی یێن روون پتر شیاینە سەركەڤتنێ بدەستڤە بینن، خالادی ئەو تیمێن شیاین باشتر سەرەدەریێ گەل یاریزانێن خوە یێن هنگاڤتی بكەن، دیسان خودان یەدەك و پێگوهۆرێن باشتر بن، دشێن ب ساناهیتر جهێ یاریزانێن سەرەكی پر بكەن رەوشا وان باشترە، زێدەباری ڤان هەمییان گڤاشتنێن دەرونی لسەر یاریزانان كارتێكرنێ لسەر ئاستێ وان دكەت، ڤێجا لبەر هەر ئەگەرەكی بیت، ئەوێن شیاین ب شێوەیەكێ سەركەڤتی ڤێ گڤاشتنێ كونترۆل بكەن، دیاریێن ئێكلاكەردا ئاستەكێ باشتر نیشان بدەن، لەوما ژی بۆ بەردەوامییا سەركەڤتنێ و بدەستڤە ئینانا قارەمانییان، پێویستە یانە ب تایبەتی هەر چار یانەیێن كوردستانێ یێن پشكدار دخولێدا كو تنێ ئێك یانە نها هەڤركا سەرەكی یە لسەر رێزێن پێشییێ، ئەوژی یانەیا هەولێرێ یە، بۆ وەرزێ بهێت هەر ژنها لسەر چەند تەوەرێن سەرەكی كار بكەن، یا ئێكێ پێشخستن و بلندكرنا ئاستێ شارەزاهییا كارگێری و پلاندانان ستراتیژی، یا دویێ هەڤسەنگییا دارایی ئەوژی برێڤەبرنا بودجەی ب شێوەیەكێ دروست بۆ دووركەڤتن ژ قەیرانێن كو كاردكەنە لسەر جێگیریا تیمێ، یاسێیێ كاركرن لسەر بەرهمئینانا یاریزانێن خودان شیان برێكا ئەكادیمیان ئەوژی ب پێشخستنا بەهرەمەندێن گەنج، یا چارێ وەبەرهێنان دژێرخانەیێ دا ئەوژی ب باشكرنا یاریگەه و جهێن راهێنانێ كو ببیتە ئەگەرێ گەشەپێدانا ئاستێ تەكنیكی، یا من دڤێت لدووماهییێ بێژم گرنگیدان ب ڤان فاكتەرێن بنەرەتی، یانەیێن كوردستانێ دشێن هەڤسەنگیێ پەیدابكەن و بهێزتر بهێنە دناڤا هەڤركیێن خولا ئیراقێ دا، بەلێ پشت بەستن 95 ژ سەدێ لسەر یاریزان و راهێنەرێن دەرڤە و هەلبژارتنا نەدروست دئینانا یاریزان و راهێنەران دا، پێگەهێ وان دناڤ مەیدان و هەڤركیێن وەرزشی بهێز نا ئێخیت و رێكا وان ژبۆ بدەستڤە ئینانا ناسناڤان دێ یا بزحمەت و ئەستەم بیت.
