تو گـەنجەكـێ پیری یـان پیرەكـێ گـەنجی؟
بێوار حەمدی
ب شێوەیەكێ سروشتی ئەم هەموو دزانین كو خۆدایێ مەزن ب وی شێوەی تاك ئافراندیە كو ب زارۆكینی ژدایك ببیت و بەر ب قووناغا پێگەهشتنێ ڤە بچیت و پاشی قووناغا دوماهیێ یا ژیێ مرۆڤی كو پیراتییە، د هەر جڤاكەكێ دا سروشتێ مرۆڤان ل گۆر كاودانان دهێتە گوهۆرین، بۆ نموونە: دێ بینە د ناڤ جڤاكەكا ڕۆژئاڤا دا تاكەكێ هەی ل ژیێ 50 سالیێ یە لێ ئەگەر ب چاڤ دێمێ وی و لاشێ وی ببینی وەكو گەنجەكێ 25 یان 30 سالی دهێتە پێش چاڤ، ل گەل وێ چەندێ ژی بەروڤاژی و ب تایبەت د ناڤ جڤاكێ مە دا دێ بینی گەنجەك ل ژیێ 25 سالیێ یە لێ كاودانێن ژیانێ ئەو وە كو كەسەكێ 40 سالی ئینایە پێش چاڤ، وەكو مە گۆتی كو ئەڤ رەوشێن هەنێ ل دویڤ جڤاكان و كاودانان جیاوازیا خوە هەیە، چونكو ئەو نموونەیێن مە ئیناین ڕەنگە بەروڤاژی ژی هەبیت و د جڤاكێ مە دا كەسێن پیر خۆنادەن ب گەنجەكێ 15 سالی، لێ ب شێوەیەكێ گشتی ئەگەر بەرێخوەدانێ بۆ بكەین پتر كاودانێن ڤان كەسان دروست دكەن، ئەڤجا چ كاودانێن (بێكاری، هەژاری، دەروونی یان.. هتد) لێ ئەگەر ل ڤێرە هەر ئێك ژ مە ڤێ پرسیارێ ژ خوە بكەت؛ ئەرێ ژیان ژی وێ چەندێ یە كو مرۆڤ ب وی راددەی خەما وێ هەلگریت كو مرۆڤی وەكو پیرەكی بینتە پێش چاڤ د ژیەكێ بچویك دا؟ ئەم ئینكارا وێ چەندێ ناكەین كو بتایبەت دڤی دەمیدا و هەبوونا نەخۆشیێن دەرونی یێن جوراو جور و كاودانێن تێدا دەربازدبین دبنە ئەگەرێ ڤێ چەندێ، لێ دیسان ئەگەر ڤێ پرسیارێ ژی ژخوە بكەین: ئەرێ ب هەلگرتنا خەما ژبەر بارگرانیا ژیانێ دێ تشتەك پێڤە هێت ؟ ئەرێ تشتەكێ دی دگەهیتەمە ژبلی كو ئەم زیانێ دگەهینینە خوبخو، لەوما ژی گەلەك یا گرنگە ئەم هەمی خوە هشیاركەین و ب مێشكەكێ بەرفرەھ هزربكەین و نابیت خوە ب تشتەكی بتنێ رازی بكەین كو بێژین تەمەن بتنێ ژمارەیە،، بەلكو دڤێت ب كریار ڤێ چەندێ بكەین و بزاڤێ بكەین نەخۆشی و كاودانێن ژیانێ مەنە ئێخن و نە كەنە روحەكا ساخ د كەلەخەكێ مری دا، گیانێ مە مرۆڤان ژ وێ چەندێ مەزنترە ئەم خوە ب هندەك بارودۆخێن سڤك یان هەتا گران ژی ئازار بدەین.
