دەنگێ تفەنگا پێشمەرگـەی پـەیـامەك و هشیاركـرنەکە كو ئـەم ل ڤێرەنە و نامرین
دلۆڤان ئاكرەیی
د دیرۆكا گەلێن جیهانێ دا، هندەك چەمك و ناڤ هەنە كو نابیت تنێ د چارچووڤەیێ فەرهەنگۆكێن سەربازی یان پێناسەیێن ئاسایی دا بهێنە كورتكرن و پێشمەرگە بۆ گەلێ كوردستانێ، نە تنێ ناڤێ شەڕڤانەكێ چەكدارە، بەلكو كۆمبوونا دۆزەكێ، ناسنامەیا نەتەوەیەكی و سیمبۆلا مان و بەردەوامبوونێ یە و ئەگەر دوهی چەكێ پێشمەرگەی ئامرازێ ڕووب ڕووبوونا ڕژێمێن داگیركەر و پاراستنا مان و نەمانێ بیت، ئەڤرۆ ئەو چەك سیمبۆلێ پاراستنا دەستكەفتێن قانوونی و كیانێ نیشتیمانی یە، چونكو چەكێ دوهی چەكێ پارتیزانی و بەرەڤانییا ل گوند و چیایان بوو ل دژی ئۆپەراسیۆنێن قڕكرنا نەتەوەیی (ئەنفال و كیمیابارانێ)، و چەكێ ئەڤرۆ ژی چەكێ پاراستنا دەولەتداری، دیموكراسی و پێكڤەژیانا ئاشتیانەیە ل دەڤەرێ و پێشمەرگەی د شەڕێ دژی مەزنترین ڕێكخراوا تێرۆرستی یا جیهانی (داعش) دا، سەلماند كو ئەڤ چەكە نە تنێ كوردستانێ، بەلكو مرۆڤایەتیێ ژی دپارێزیت.
پێشمەرگە نە ژدایكبوویێ سەربازگەهێن رێكخستی و بڕیارێن سیاسی یێن ئاسایی یە، بەلكو ئەو ژدایكبوویێ خوین، رەنج و روندكێن گەلێ كوردستانێ یە و ئەو بەرهەمێ وان هەمی ستەم و زۆردارییانە ئەوا دەهان سالان ل دژی ڤی گەلی هاتینە كرن و دەمێ دایكێن دلبرین رۆندك دباراندن، بابان رەنج ددا و گەنجان خوینا خۆ دبەهژاند، ژ ناخێ وێ ئێش و ئازارێ، هێزەك ب ناڤێ پێشمەرگە سەرهەدا دا كو ببیتە مەتالێ بەرەڤانیێ ژ هەبوونا كوردینیێ.
د تێگەهێ سەربازی یێ كلاسیك دا، چەك تنێ كەرەستەكێ پێكهاتی ژ ئاسن و جبەخانەیێ یە كو بۆ شەڕی دهێتە بكارئینان، بەلێ دەمێ ئەڤ چەكە دكەڤیتە دەستێ پێشمەرگەی، رامانا وی ب تەمامی دگوهۆڕیت، چونكی هەر تفەنگەكا د دەستێ پێشمەرگەی دا، دیرۆكە، فیداكاری یە و چیرۆكا شۆرش، داستان و سەرهلدانێن چیا ل خۆ دگرت و رامانا وێ تێكۆشین، قوربانیدان و دەستبەرداربوونە ژ ژیانا ئاسایی ل پێناڤی پاراستنا ئاخێ دا.
د دیرۆكا گەلێ كوردستانێ دا، چیا هەردەم پشت و پەناها هەییا دۆزا كورد بووینە، بەلێ چیا ب تنێ نەدشیا ببیتە پارێزەر ئەگەر ئیرادە و تفەنگا پێشمەرگەی تێدا نەبایە و ئەڤ پەیوەندییە بوویە جۆمگەكێ پێكڤەگرێدایی، چیایێ سەربلند و پێشمەرگەیێ چەك ل مل. ئەڤ تفەنگا ل سەر ملێ پێشمەرگەی، د سەرمایا دژوار یا زفستانێ و د گەرمایا پڕشۆك یا هاڤینێ دا، بوو زمانێ ڕاستەقینە یێ نەتەوەیەكێ بێدەنگكری، دەما جیهانێ چاڤێن خۆ ل ئازارێن وی دگرتن، دەنگێ وێ تفەنگێ تنێ دەنگێ هشیاركرنێ بوو كو دگۆت: ئەم ل ڤێرەنە و نامرین.
چەكێ پێشمەرگەی بیروباوەرە و ئامرازێ پاراستنا شەرەف، كەرامەت و بها پیرۆزێن نشتیمانی یە و ئەو گوزارشتێ ژ بیروباوەرەكا نەهەژەك دكەت كو مرۆڤ بەرهەڤە گیانێ خۆ ل پێناڤ دا فیدا بكەت، ئەو چەك گوزارشتێ ژ وێ سۆز و پابەندییا كوور دكەت ئەوا هەردەم بۆ گەل، خاك و نشتیمانێ خۆ هەی و ئەو چەك نە بۆ دەستبەسەرداگرتنا خاكا كەسێ یە و نە بۆ زۆرداریێ یە، بەلكو هێمایێ سۆز و پەیمانەكێ یە كو پێشمەرگەی ل گەل چیا و رۆندكێن دایكێن شەهیدان گرێدای كو هەتا دۆز مابیت، بەرەڤانی دێ بەردەوام بیت و پێشمەرگە و چەكێ وی، دو پشكن ژ دیرۆكا نەڤەقەتیای و چەك د دەستێ پێشمەرگەی دا نابیتە ئامرازێ توندوتیژیێ، بەلكو دبیتە خامێ نڤیسینا دیرۆكا قوربانیدان و ئازادییا كوردستانێ، پێشمەرگە چ جاران شەڕخواز نەبوویە و چەكێ وی بۆ هێرشكرنێ و داگیركاریێ نەتەقتیە و دیرۆك دیدەڤانیێ ددەت كو پێشمەرگە جۆتیار، مامۆستا، قوتابی و كاسبكارێ ناڤ بازاری بوو، یێ كو نەچاربووی خام و داسێن خۆ دابنێت و چەكی هەڵگرێت و ئەو حەزژێكەرێ ژیانێ و ئاشتیێ بوو، بەلێ پێشوازی ل مرنێ دكر دا كو نفشێ بهێت د ئاشتیێ دا بژین.
چەكێ پێشمەرگەی، ئەلندەكا گەشە ل سەر مەزارێ شەهیدان و سۆزنامەیەكا هەردەمی یە د دەستێ نفشێ نوو دا، كو كەرامەت و ئاخا كوردستانێ دپارێزیت و چ جاران ناهێلیت دیرۆكا پڕ ل سەرفەرازی بهێتە ژبیركرن.
