ل دەڤـەرا بـارزان دەمێ كەسەك دبوو پێشمەرگـە.. دگـۆتـن فلان كـەس عەشـقی بوو چـوو چیای
عەبدولعەزیز محسن بارزانی
دەمێ ل كۆمارا كوردستان (میرزا مەجید)ێ چایچی بۆ پێشەوا قازی و جڤاتا وی پێشنیاركری ناڤێ لەشكرێ كوردستانێ ببیتە (پێشمەرگە)؛ ل وی دەمی هەتا ڤێگاڤێ پێشمەرگەی درێغی نەكریە و هەردەم پارێزڤانێ ئاخ و ئالاو زمان و كولتوور و كەمەرامەتا مرۆڤایەتیێ و گەلێ كوردستانێ بوویە. د شۆرەشێن ئێك ل دویڤ ئێك یێن گەلێ كوردستانێ بتنێ پێشمەرگە ب پشتەڤانیا خەلكی شیاینە وان شۆرەشان ب ئەنجام بگەهینن. دیسا داستانێن مەزن هەر پێشمەرگەی تۆماركرینە و سالا (1991)ێ پێشمەرگە بوو سەرهلدان دەستپێكری و پشتەڤانیا جەماوەری مسۆگەر كری و ئەڤرۆكە ئەم خۆدان ئەڤ دەستكەفتێن مەزنین. دیسا د سالا (2003)ێ دا ئەگەر پێشمەرگە نەبایە؛ گەلەك یا ب زەحمەت بوو رژێما گۆر بە گۆرا سەدامێ دیكتاتۆر هاتبایە هەڕفاندن و هەر دیسا ئەگەر پێشمەرگە نەبایە دوبارە لەشكرێ ئیراقا فیدرال نە دهاتە دامەزراندن.
ئەگەر پێشمەرگە نەبایە كەس نەبوو ل بەغدا زێرەڤانیێ ل پەرلەمان و حوكمەتا ئیراقا فیدرال بگریت و گەلەك سەركردەیێن وان بتنێ باوەری ب پێشمەرگەی هەبوو وان بپارێزن.
دیسا ل سالا (2005) دا پێشمەرگە د دەستوورێ هەمیشەیێ ئیراقا فیدرال دا هاتە چەسپاندن، بناڤێ زێرەڤانێن هەرێما كوردستانێ مینا پشكەك ژ مەنزومەیا لەشكرێ ئیراقا فیدرال.
دیسا ل سالا (2014) دا د شەڕێ پاراستنا كەرامەتا مرۆڤایەتیێ ل سەرانسەرێ جیهانێ بتنێ پێشمەرگە بوو شیا شەڕێ ئازادیا مرۆڤایەتیێ بكەت و شكەستنێ ب رێكخراوا تیرۆرستی یا داعش بینیت كو نوكە ناڤێ پێشمەرگەی د جیهانیا ئازاد و دیموكراسی دا بوویە ناڤەكێ مەزن و پیرۆز.
نوكە ئەگەر هندەك كەس وێرەكیێ بدەتە خۆ و بێژیت؛ دڤێت پێشمەرگە چەكێ خۆ دابنیت.. ئەز دبێژمە وان كەسان و وان هزر و بیر و باوەران ژ بلی شەرمەزاریێ؛ هیچ تشتەكێ دی بۆ وان نامینیت. چونكو هەر دەمێ بوو تەنگاڤی ژ بلی پێشمەرگێن فەرمی هەمی خەلكێ كوردستانێ و ب هەمی تەخ و چینێن جڤاكی ب ئێك بیرو باوەر و ب دەنگێن بلند دێ هەوار كەن و بێژن ئەم هەمی پێشمەرگەینە.. دیسا بۆ هەمی مرۆڤان رح گەلەكا عەزیزە لێ بۆ پێشمەرگەی بتنێ كوردستان یا عەزیزە، لەورا هەمی دەمەكێ پێشمەرگە یێ بەرهەڤە رحا خۆ گوری كوردستانێ بكەت وەكو د دیرۆكێ دا ئەڤە هاتیە سەلماندن. د نوكەدا كوردستان و پێشمەرگە دو ناڤێن پێكڤە گرێداینە و چو جاران ژێك ناهێنە جوداكرن. پەیاما جەنابێ سەرۆك بارزانی ئاخفتنا دلێ هەمی كوردستانیانە و یا گرنگ و پێدڤیە هەمی لایەك گەلەك ب باشی د وێ پەیامێ بگەهن و زێدەتر ل جارەكێ بخوینن كانێ هەر پەیڤەك چ رامان ددەت.
ئەز ب پیشەیا خۆ نڤیسكارم و قەلەمێ من تفەنگا منەن لێ ب هزروبیر و باوەریا خۆ پێشمەرگەمە و من دڤێت ل پێناڤێ پاراستنا ناڤێ پیرۆزێ پێشمەرگەی و قەوارەیێ دەستووری یێ هەرێما كوردستانێ شەهید ببم. چونكو شەهادەت مەزنترین مەرتەبەیە ل دەڤ خۆدێ و ل دەڤ نیشتیمانپەروەران. د دیرۆكێ ژی دا مەزنترین دیكتاتۆران ب مەزنترین چەكێ گران نەشیاینە خۆ ل بەر لولیا تفەنگا پێشمەرگەی و بیروباوەرێن وان بگرن. ڤێجا بۆ ئاگاداری من هنگ هشیاركرن.
