پێنوسێن زێندی و وەفادارییا نەتەوەیی
سالح دۆسكی
ل ئێڤارییەكا پڕی عەشق و ئەدەب، ل ڕۆژا ئێكشەمبی ڕێكەفتی ٧ی حوزەیرانا ٢٠٢٦ێ، بەشێ ڕەوشەنبیری و ڕاگەهاندنا پارتی دیموكراتی كوردستان، د مەڕاسیمەكێ هەژی و تژی ڕێز و پێزانین دا ل باخچێ ئێكەتییا نڤیسەرێن كورد/ تایێ دهۆكێ، ڕێز ل نڤیسەر و هۆزانڤانێ دیارێ كوردستانێ (محسن قۆچان) ی گرت. ئەڤ ئێڤارییە نە بتنێ روودانەك رەوەشنبیری بوو، بەلكو سەلماندن و رەنگڤەدانەك بوو كو چەوا جڤاك و هێزێن پێشەنگ گرنگییا مەزن ددەنە داهێنەرێن خۆ، و دیسان دووپاتكرنەكا نوو بوو ل سەر وێ چەندێ كو ڕەنجا خودان پێنوسان چ جاران بەرزە نابیت.
خەلاتكرن و ڕێزگرتنا نڤیسەر و هۆزانڤانان، تنێ ڕێورەسمەكێ تەشریفاتی یێ سادە نینە؛ بەلكو دانپێدانەكا فەرمی یە ب ڕۆلێ وان یێ گەوهەری د ئاڤاكرنا هۆشیارییا جڤاكی دا. دەمێ نڤیسەرەك د ژیانا خۆ دا دهێتە خەلاتكرن، ئەڤ چەندە نامەیەكا بهێزە بۆ وی كو: «ماندیبوونا تە، رەنج و بزاڤا تە، بەرهەمێن تە و خەباتا پێنوسێ تە ب سالان، ژ ئالیێ نەتەوەیێ تە ڤە ل بەر چاڤە و نە هاتییە ژبیركرن.»
ئەڤ جۆرە پەیامە دبنە مەزنترین هاندەر دا كو پیڤاژۆیا داهێنان و نڤیسینێ بەردەوام بیت و نەراوەستیت. گەنج و نەوێن نوو یێن د گۆرەپانا نڤیسینێ دا، دەمێ دبینن كو رێز ل پێشەنگ و مامۆستایێن وان دهێتە گرتن، باوەرییا وان ب بهایێ پەیڤێ و پێنوسی پتر لێ دهێت، و ب ڤی شێوەیی بزاڤا ڕەوشەنبیری دناڤ جڤاكی دا بەردەوام و زندی دمینیت.
د ڤی چارچۆڤەیی دا، دیارە كو بەشێ ڕەوشەنبیری و ڕاگەهاندنا پارتی دیموكراتی كوردستان ب ئەركێ خۆ یێ نەتەوەیی و ڕەوشەنبیری ڕادبیت، ب هندێ كو خۆ ل نڤیسەر، هۆزانڤان و ڕۆمانڤیسێن وەلاتی دكەتە خودان. پارتی وەك قوتابخانەیەكا كو د هەمی قۆناغێن خەباتا خۆدا گرنگی ب پێگەهێ ڕۆشنبیران دایە، ئەڤرۆ ژی دووپات دكەت كو باشترین سەروەت بۆ پاراستنێ، سەروەتێ هزری و ئەدەبی یە.
ئەڤ رێزگرتنە نیشانا هندێ یە كو پارتی ڕەنجا ئافرێنەرێن پەیڤێ ژبیر ناكەت. دەمێ لایەنەكێ سیاسی یێ خودان دێروك وەسا ل داهێنەران بپرسیت، جوداهییا د ناڤبەرا «سیاسەتا پاقژ» و «سیاسەتا بازرگانی» دا دیار دبیت؛ سیاسەتا كو پەیڤێ و هۆزانێ وەك سهنگەرێ ئێكێ یێ پاراستنا ناسنامەیا نەتەوەیی دبینیت.
مەزنترین و بهادارترین خال د پەیاما نڤیسەرێ كورد دا ئەوە كو ئەڤ خودان پێنوسە، ب درێژاهییا دیرۆكێ و هەتا ئەڤرۆ ژی، خەباتێ بۆ ئارمانجەكا پاك و بلند دكەن، چاڤێ وان ل ماددە و دهستكەفتێن بەروەخت و بەرامبەرێن دارایی نینە. قەلەمێ وان چەكە، د دژوارترین قۆناغان دا، دگەل دەنگێ تڤەنگێ و پشتی دەنگێ تڤەنگێ، پێنوسێ نڤیسەری ب خەباتا هزری و كولتۆری رێكێ ب رۆناهی دئێخیت. دۆزا وان گەلە؛ كاركرنا وان تنێ و تنێ بۆ سەرئێخستنا دۆزا ڕەوا یا گەل و نەتەوەیێ كوردە.
ناسنامە ئارمانجە؛ ل دژی هەمی هەولێن حەلیاندن و بوهژینا كولتۆری، وان ئەدەبێ كوردی و زمانێ ڕەسەن یێ كوردی هەمبێز كریە دا كو ناسنامەیا نەتەوەیی زندی بمینیت.
ڕێزگرتن ل هۆزانڤان (محسن قۆچان) ی ل باخچێ ئێكەتییا نڤیسەران، نە تنێ ڕێزگرتن بوو ل كەسایەتییا وی، بەلكو سۆزەكا نوو بوو بۆ بەردەوامییا خەباتا هزری. ئەڤ جۆرە ئێڤارییە ئالیێ گەش یێ وەلاتێ مە نیشان ددەن؛ وەلاتەكێ كو شانازیێ ب نڤیسەرێن خۆ دبیت و پەیڤا جوان و داهێنەر یا زمانێ كوردی ل سەر سەرێ چیایێن خۆ دكەتە تاج و فەرهەنگا خۆ پێ زەنگین دكەت. تاكو ئەڤ وەفادارییە و ئەڤ رێزگرتن و بەرچاڤوەرگرتنە بەردەوام بن، دێ پێنوسێ كورد داهێنەرتر و زندیتر بمینیت.
