نهێنیێن خێزانێ
بێوار حەمدی
وەكو دیار خێزان ئێك ژ گرنگترین و سەرەكیترین فاكتەرە دناڤ جڤاكی دا و دشێین بێژین كو بنیاتێ ئاڤاكرنا جڤاكەكێ پێشكەفتی و ئاڤاكەر خێزانەكا ئاڤاكەرە، بێگۆمان دەسپێكا مە هەموو مرۆڤان ژ خێزانەكێ دەسپێكریە و بنیاتێ وێ ژی دەیك و باب بووینە، ئەڤ خێزانە ژی دناڤ هەموو جڤاكان دا هەنە لێ ژینگەهێن خێزانێ وجڤاكان ژێك جودانە، بو نموونە ئەو خێزانێن ل ڕۆژئاڤای دژین ژینگەها وان جودایە ژ ژینگەها خێزانێن ڕۆژ هەلاتا ناڤین، دناڤ جڤاكێ مە ژی دا عەشیرەت هەنە و دناڤ وان عەشیرا ژی دا مالبات هەنە و ژنوو ئەو مالباتە ژ چەند خێزانێن بچووك ومەزن پێك دهێن، ل ڤێرە بابەتێ سەرەكی ئەوە كو دناڤ وێ خێزانێ ژی دا نهێنیێن خێزانێ هەنە، چ خێزان نینن كو هندەك نهێنی نەبن ئەگەر ئەو نهێنیە دبچووك بن یان ژی دمەزن بن، لێ پاراستنا ڤان نهێنیان یاگرنگە، دەركەڤتنا نهێنیا ژ خێزانێ گەلەك خالێن نەرێنی ل پشت خوە دهێلن مینا (ژێك ڤاڤارتنا خێزانێ،، تێكچۆنا پەیوەندیێن دەیك وبابا یان خۆیشك وبرایان، نەمانا باوەریێ دخێزانێ دا، دەست تێوەردانا دەستێ دەرەكی بو ناڤ تایبەت مەندیێن خێزانێ و مایتێكرنا زێدە یا وان كەسێن چ گرێدان ب بابەتی ڤە نەبیت) هەلبەت دەرئێخستنا نهێنیان چ ژلایێ ئەندامەكێ خێزانێ بیت یان ژی دەیك و بابان ب خوە، بێگۆمان چ خالێن ئەرێنی پێشكێشی خێزانێ ناكەت ژبلی هەڕفاندنا وێ، لەوما یا گرنگە هەر تاكەك خۆ فێری ڤێ ڕەوشەنبیریێ بكەت كو هەر تشتێ تایبەت بیت ب خێزانا وی ڤە ب پارێزیت داكو ببیتە ئەگەرێ وێ چەندێ پەیوەندیێن هەموو ئەندامێن خێزانێ دگەل دەیك وبابان ب جوانی و بەختەوەری بمینن، ژبەركو نە كەسێ دی بومە دبیتە دەیك و باب و نەكەس دبیتە خۆشكو برا، ئێكگرتنا خوینێ یا خێزانێ گەلەك یا گرنگە و ل شوینا ڤێ چەندێ یا پێدڤیە ئەڤ ئەندامێن خێزانێ ببنە دەرمان ژبۆ برینێن ئێكدو و هاریكاربن ژبۆ چارەسەركرنا ئاریشەیێن گشتی یێن خێزانێ، ژبیرنەكەین هەكە دونیا هەموو دوژمنێ مە بیت خێزان هەردێ مینیت پشتەڤانەكا سەرەكی و هەروهەر.
