دەرگەهەک دهێتە گرتن و هزار دەرگەهـ ڤەدبن
سهركهفت رهشید
د ژیانا مرۆڤی دا، گەلەك جاران تووشی تەنگاڤیان دبین، و دبینین هەموو دەرگەهـ ل بەر مە دهێنە گرتن. بەلێ چیرۆكا دادڤانێ ناڤنەتەوەیی یێ سۆمالی «عمر ئارتان» دەرگەهەكێ نوو بۆ مە ڤەدکەت و مە فێر دکەت کو چارهنڤیس د دەستێ خودێ دایە.
ژ ئاریشەیێ بەرەڤ سەركەفتنێ
ل دەمێ عومەر ئارتان بێ ئەگەر و ب شێوەیەكێ نەدادپەروەرانە ژ چوونا وی بۆ ئەمریكا هاتیە راگرتن، سەرەڕای وێ چەندێ کۆ دادڤانەکێ فێفایێ یە، کەلەگ کەس ژبەر ئەڤێ چەندێ بێ هیڤی ببوون. بەلێ كاردانڤا عومەری ل سەر ئینستاگرامێ یا جودا بوو، ئەوێ ب باوەریەکا مەزن گۆتی: « ئەڤە هەم هاتیە نڤیسین و سبحان الله خودێ پشتەڤانە».
بتنێ چەند دەمژمێرەك ب سەر ڤێ رویدانێ دەرباز بوون، عومەر ئارتان ل سۆمالێ وەکۆ قارەمانەکێ نەتەوەیی هاتە پێشوازیکرن، دۆزا وی بوو «رایا گشتی» و وەزارەتا دەرڤە یا سۆمالێ ب فەرمی بەیانەکا شەرمزارکرنێ ل دژی رێکارێن ئەمریكا دەرخست. پاشان بالیۆزێ سۆمالێ ل کینیا ئەو دیت و رێز لێ گرت و سیاسەتمەدارەكێ سۆمالی ژی داهاتێ 50 هزار دۆلاران پێشکێشی وی کرن.
هەموو تشت ب دووماهی نەهات.. بەلکۆ شنی دەستپێکر!
نە بتنێ گەل و حکومەتا وی، بەلکو سەرۆکێ كۆمارا سۆمالیا «حەسەن شێخ مەحمود» ب خۆ ئەو ل کۆشكا سەرۆکاتیا وەڵاتی پێشوازی لێ کر و ژ هەموویێ گرنگتر، بڕیارەکا دیرۆکی ژ لایێ «یوێفا» (UEFA) ڤە دەرچوو: کو عومەر ئارتان وەکۆ دادڤانێ یارییا فیناڵا سۆپەرا ئۆرۆپا د ناڤبەرا (پاریس سان جێرمان و ئەستۆن ڤیلا) دا هاتە دیارکرن.
ئەڤە ئێکەم دادڤانێ ئەفریقایی یە د دیرۆکا ڤێ یاریێ دا. «ئەلێکساندەر چێڤیرین»ێ سەرۆکێ یوێفایێ گۆت: «ئەڤ دەستنیشانکرنە بۆ رێزگرتنا مەزن یا شیانێن عومەر ئارتانە، و قەرەبووکرنەکا پێدڤی یە بەرامبەر وێ ستەمێ یا ل وی هاتیە کرن».
ل ڤێرە پەیامەکێ بۆ هەموو وەرزشڤانان دهنێرین کۆ
چیرۆکا عومەر ئارتان بۆ مە دیار دکەت: دەمێ تە باوەری ب خودێ هەبیت و ب شێوازێ مرۆڤێن مەزن دگەل تەنگاڤیان رەفتارێ بکەی، ئەنجام دێ یێن دیرۆکی بن. خودێ دەرگەهەکێ دگریت، داکو دەرگەهێن باشتر بۆ تە ڤەکەت.
عومەر ئارتان، تو نوکە نه بتنێ دادڤانەکی، بەلکو سیمبولەکێ ئارامیا دەرونی و مێرخاسیا ئەفریقایی.
