پشتەڤانییا دەمکی بۆ یانەیا دهۆک بەس نینە
قەیس وەیس
سەرێ چەندین وەرزە کارگێڕیا یانەیا دهۆکێ د ناڤ بارودۆخەکێ حێبەتی و ناڕوون دا دەست ب کارێن خۆ دکەت، ب تایبەتی ل سەر پرسا گرێبەستێن یاریزانان، پسیارا مەزن ئەوە، ئەرێ کارگێڕی دێ چەوا شێت یاریزانێن ئاست بلند (سوپەر) ئینیتە دنافا ڕێزێن تیما خۆیا فوتبۆلێ دا؟، بێی کو چ چاڤ ڕوونیا ل سەر بوودجەیێ خۆ یێ سالانە هەبیت؟
کارکرن ب ڤی شێوازی وەکۆ سەرکێشیەکێ یە کو ئەنجامێن وێ پێشوەخت دیارن؛ یانە وەرزێ خۆ ب قەیرانان دەست پێ دکەت و حەتا ب دووماهی دئینیت یاریزان و ستاف د بن نالینا بێ پارهیی، نەدانا مووچەیی و گیرۆبوونا پشکێن گرێبەستان دا دنالن، ئەڤ کێشەیە تهنانهت گەهشتیە ڕادەیەکێ وهسا کو فەرمانبەرێن سادە یێن یانێ ژی چەندین مەهان مووچەیێن خۆ وەرنەگرتینە.
جوداهیا دهۆکێ دگەل یانەیێن دی یێن کوردستانێ
بەرۆڤاژی یانەیا دهۆکێ یانەیێن دی یێن ل هەرێما کوردستانێ پشکدار د خولان دا، ڕووبەڕووی قەیرانێن ب ڤی ڕادەی دژوار نەبووینە کو نەشێن مووچەیێ سەرەتایی یێ فەرمانبەر و یاریزانێن خۆ دابینبکەن، ئەڤە د دەمەکێ دایه کو بودجەیێ هندەک ژ ڤان یانەیان جار و نیڤ حەتا دو جاران ژ یانەیا دهۆکێ پترە، ئەڤ چەندە نادادپەروەریەکا ڕوون د دابەشکرنا پاڵپشتیا دارایی دا نیشان ددەت.
بەلێنێن کاتی و مەترسیا نیڤا وەرزێ
د کۆمبوونا دووماهییێ یا پارێزگارێ دهۆکێ دگەل کارگێڕیا یانێ دا، بڕیار هاتە دان کو «هندی د شیان دا بیت» دێ هاریکاریا یانێ هێتە کرن. بەلێ ل ڤێرێ گومان و مەترسیەکا مەزن دروست دبیت، ئەگەر ل نیڤا وەرزێ پاڵپشتی بەردەست نەبوو، دێ چ ل پاشەڕۆژا یانێ هێت؟
د بارودۆخەکێ وەسادا، کارگێڕی دێ چ سەرەدەریێ دگەل قەیرانان کەت؟ و یاریزان دێ ب چ ڕوحیەت و دەروون ل ناڤ یاریگەهێ شەری کەت؟ ب تایبەتی د دەمەکێ دا کو مە ل ڕابردوودا دیت ل سەر کیستێ ڤان کێشەیان چەندین یاریزانان بایکۆتا ڕاهێنان و یاریان کریە، پسیار ئەوە ئەگەر ئەڤ چەندە دووبارە ببێتەڤە، کێ بەرپرسیاریا وێ هەڵدەت؟
ئەرکێ ل سەر ملێ بەرپرسێن حزبی و حکومی
بوچی پێدڤییە ئەڤ مامەلەیە دگەل یانەیا دهۆکێ بهێتە کرن؟ ئەڤ یانەیە ژی یانەیەکا حکومی یە و سەر ب پارێزگەها دهۆکێ ڤەیە، لەوما ل سەر حکومەتێ یا فەرە و پێدڤی یە کو پشکا هاریکاری و پێدڤیێن وان یێن سالانە ب شێوەیەکێ یاسایی و جێگیر دابین بکەت.
یا پێدڤی یە ل سەر بەرپرسێن حزبی و حکومی یێن ئەڤی باژێڕی و ڤێ پارێزگەهێ کو دەنگێ یانەیا خۆ بگەهیننە جهێن بڕیارێ، نابیت سالانە ناڤ و پێگەیێ یانەیا دهۆکێ ببیته قوربانیێ «لاڤلاڤە و داخوازیێن کاتی» حەتا کو بشێن بچووکترین کار ئەنجام بدەن. مفا ب وێ چەندێ نینە کاروانێ یانێ هەمیشە یێ ڕاوەستایی بیت؛ پێدڤییە وەکۆ هەمی یانەیێن دی، کار و بەرهەڤیێن خۆ د زووترین دەم دا بکەن دا کو بشێن ئەنجامێن مەزن ب دەستڤە بینن و پشکداریەکا لایق و شایستە ب ناڤێ مەزنێ باژێڕێ دهۆکێ پێشکەش بکەن.
